တရုတ်နိုင်ငံတွင် မိုးခေါင်ရေရှားမှု သတိပေးချက်ကို ပထမဆုံး ထုတ်ပြန်
ရှန်ဟိုင်း၊ သြဂုတ် ၁၉
တရုတ်အာဏာပိုင်များသည် တောမီးများနှင့် ရင်ဆိုင်နေရချိန် ယန်ဇီမြစ်ဝှမ်းတစ်လျှောက်ရှိ ကောက်ပဲသီးနှံများကိုလည်း ပူပြင်းသော အပူချိန်ဒဏ်မှ ကာကွယ်ရန်အတွက် ကျွမ်းကျင်အဖွဲ့များ ကိုစုစည်းနေရကာ ယခုနှစ်အတွက် နိုင်ငံ၏ ပထမဆုံး မိုးခေါင်ရေရှားမှု သတိပေးချက်ကို ထုတ်ပြန်ခဲ့သည်။
ကြာသပတေးနေ့ ညနေပိုင်းတွင် ထုတ်ပြန်ခဲ့သည့် အဆိုပါ နိုင်ငံတော်အဆင့် အဝါရောင် သတိပေးချက်သည် တရုတ်နိုင်ငံ အနောက်တောင်ဘက်ရှိ စီချွမ်ဒေသမှ ယန်ဇီမြစ်ဝကျွမ်းပေါ်ဒေသရှိ ရှန်ဟိုင်းတစ်လျှောက် ရက်သတ္တပတ်များစွာ အပူချိန်လွန်ကဲမှုဒဏ်ကို ခံစားခဲ့ရပြီးနောက်ပိုင်း ထွက်ပေါ်လာခြင်းဖြစ်သည်။
အစိုးရတာဝန်ရှိသူများကလည်း ယင်းဖြစ်စဉ်များသည် ကမ္ဘာလုံးဆိုင်ရာ ရာသီဥတု ဖောက်ပြန်မှုကြောင့်ဟု ထပ်တလဲလဲ ပြောဆိုလာခဲ့ကြသည်။
တရုတ်နိုင်ငံအလယ်ပိုင်း ကျန်းရှီး ပြည်နယ်ရှိဖောယန် ရေကန်သည် နှစ်စဉ် ယခုအချိန်၌ ရှိနေကျ ပုံမှန်အရွယ်အစားထက် လေးပုံတစ်ပုံခန့် ကျဆင်းသွားကြောင်း နိုင်ငံပိုင်သတင်းအေဂျင်စီ ဆင်ဟွာက ကြာသပတေးနေ့တွင် ဖော်ပြခဲ့သည်။
ချုံကင်း၏ အနောက်တောင်ပိုင်းဒေသရှိ စီရင်စု ၃၄ ခုမှ မြစ် ၆၆ ခုတွင် ရေခန်းခြောက်သွားကြောင်း နိုင်ငံပိုင်ရုပ်သံ CCTV က ဩဂုတ်လ ၁၉ ရက် သောကြာနေ့တွင် ပြောကြားခဲ့သည်။
ချုံကင်းဒေသအနှံ့ တောမီးလောင်မှုများဖြစ်ပွားခဲ့သည့်အတွက် မီးသတ်သမားများသည် အထူးသတိပြုကာ ပြင်ဆင်ထားရသည်။ နိုင်ငံပိုင်မီဒီယာကလည်း အပူလျှပ်ခြင်း ဖြစ်စဉ်များ တိုးလာကြောင်း ဖော်ပြခဲ့သည်။
ချုံကင်းစိုက်ပျိုးရေးဌာနသည် ထိခိုက်ပျက်စီးလွယ်သောသီးနှံများကို ကာကွယ်ရန်နှင့် ဆောင်းဦးရိတ်သိမ်းချိန်မတိုင်မီ ပျက်စီးဆုံးရှုံးမှုများအတွက် အလျော်ပေးနိုင်ရန် သီးနှံများ တိုးချဲ့စိုက်ပျိုးဖို့ ကျွမ်းကျင်သောအဖွဲ့များကိုလည်း စုစည်းလျက်ရှိသည်။
ရေအရင်းအမြစ်ဝန်ကြီးဌာနသည် မိုးခေါင်ရေရှားမှုဒဏ်ခံရသော စိုက်ပျိုးရေးဒေသများတွင် ရေပြတ်လပ်မှု မရှိစေရန်အတွက် အချိန်အတိအကျဖြင့် ရေအလှည့်ကျ ရယူနိုင်မည့် အချိန်ဇယားများ ရေးဆွဲကြရန် ၎င်းဒေသရှိ တာဝန်ရှိသူများအား ညွှန်ကြားထားသည်။
ကြာသပတေးနေ့ ညပိုင်းတွင် ထုတ်ပြန်ခဲ့သော တရုတ်အရေးပေါ်ဝန်ကြီးဌာန၏ အချက်အလက်များအရ ဇူလိုင်လ တစ်လတည်းတွင် အပူချိန်မြင့်မားမှုကြောင့် လူပေါင်း ၅ ဒသမ ၅ သန်း၏ စီးပွားရေးအခြေအနေ ထိခိုက်ခဲ့ကာ ယွမ် ၂ ဒသမ ၇၃ ဘီလီယံ (ဒေါ်လာ သန်း ၄၀၀) ဆုံးရှုံးခဲ့ကြောင်း သိရသည်။
Source:Reuters