ဧပြီလ ၂၇ ရက်
တရုတ်နိုင်ငံသည် တန်ဖိုးမြင့်သင်္ဘောတည်ဆောက်ရေးကဏ္ဍတွင် တောင်ကိုရီးယား၏ လွှမ်းမိုးမှုကို ပိုမိုစိန်ခေါ်လာစဉ် ၎င်း၏ အကြီးဆုံးသော သဘာဝဓာတ်ငွေ့ရည် တင်သင်္ဘောကို လွှဲပြောင်းပေးအပ်လိုက်ကြောင်း သိရသည်။ ယခုအခါ တရုတ်နိုင်ငံတွင် ထိုသို့သော အဆင့်မြင့်သင်္ဘောများကို ဒီဇိုင်း ပုံထုတ် တည်ဆောက်နိုင်သည့် ပြည်တွင်းသင်္ဘောကျင်း အရေအတွက်သည် ၅ ခုအထိ ရှိလာပြီဖြစ်ပေသည်။
China Merchants Group ၏ လက်အောက်ခံဖြစ်သော China Merchants Heavy Industry (Jiangsu) သည် ကုဗမီတာ ၁၈၀,၀၀၀ (ကုဗပေ ၆.၃၆ သန်း) ဝင်ဆံ့သောအဆိုပါသင်္ဘောကို တနင်္ဂနွေနေ့တွင် လွှဲပြောင်းပေးအပ်ခဲ့ကြောင်း ကုမ္ပဏီ၏ သတင်းထုတ်ပြန်ချက်အရ သိရသည်။
အလျား ၂၉၈.၈ မီတာ (၉၈၀ ပေ) ရှည်လျားပြီး “Celsius Georgetown” ဟု အမည်ပေးထားသော အဆိုပါသင်္ဘော တည်ဆောက်ရေးကို ၂၀၂၃ ခုနှစ် အောက်တိုဘာလတွင် စတင်ခဲ့ခြင်းဖြစ်သည်။ ၎င်းသည် ဒိန်းမတ်နိုင်ငံ Celsius Shipping ကုမ္ပဏီမှ မှာယူထားသည့် အလားတူသင်္ဘော ၆ စင်းအနက် ပထမဆုံး တစ်စင်းဖြစ်ပြီး ဒုတိယမြောက်သင်္ဘောကို နောက်ထပ် ၃ လအကြာတွင် လွှဲပြောင်းပေးအပ်ရန် စီစဉ်ထားကြောင်း သင်္ဘောတည်ဆောက်ရေးကုမ္ပဏီက ပြောကြားခဲ့သည်။
ကုမ္ပဏီအနေဖြင့် အဆိုပါသင်္ဘောတည်ဆောက်ပြီးစီးမှုကို အကြီးစားသန့်စင်စွမ်းအင်တင်သင်္ဘောများ တည်ဆောက်ရေးတွင် “သိသာထင်ရှားသော အောင်မြင်မှု” အဖြစ် ချီးကျူးဂုဏ်ပြုခဲ့သည်။ အနုတ် ၁၆၃ ဒီဂရီဆဲလ်စီးယပ် (အနုတ် ၂၆၁ ဒီဂရီဖာရင်ဟိုက်) ကဲ့သို့သော အလွန်နိမ့် ကျသည့် အပူချိန်တွင် လောင်စာဆီများကို သယ်ယူပို့ဆောင်ရန် တည်ဆောက်ထားသည့် LNG တင်သင်္ဘောများကို ၎င်းတို့၏ ရှုပ်ထွေးနက်နဲသော ဒီဇိုင်းနှင့် အင်ဂျင်နီယာပညာရပ်များကြောင့် သင်္ဘောတည်ဆောက်ရေး နည်းပညာ၏ အမြင့်ဆုံးအဆင့်အဖြစ် လူသိများကြသည်။
ကုမ္ပဏီခေါင်းဆောင်ပိုင်းက ယခုသင်္ဘောလွှဲပြောင်းပေးအပ်မှုကို အရေးပါသော အချိုးအကွေ့တစ်ခုအဖြစ် သတ်မှတ်ခဲ့ကြသည်။
Ref: ဆော့သ်ချိုင်းနားမောနင်းပို့စ်