တရုတ်ကထိုင်ဝမ်အားကျူးကျော်ပါက ဥရောပနည်းတူ ဆွစ်ဇာလန်ကလည်းအရေးယူပိတ်ဆို့မည်
ဇူးရစ်ခ်ျ၊ဇူလိုင် ၃၀
ထိုင်ဝမ်ကိုကျူးကျော်လာလျှင် ဥရောပသမဂ္ဂက တရုတ်နိုင်ငံအပေါ် ချမှတ်ထားသည့် ဒဏ်ခတ်အရေးယူမှုမှန်သမျှကို ထောက်ခံမည်ဟု ဆွစ်ဇာလန်အေဂျင်စီအကြီးအကဲကသတင်းစာ တွေ့ဆုံမေးမြန်းခန်းတစ်ခုတွင် ပြောကြားခဲ့သည်။
တရုတ်ပြည်မ၏ အချုပ်အခြာအာဏာကို လက်ခံရန် ဒီမိုကရေစီနည်းလမ်းတကျ ရွေးကောက်တင် မြှောက်ခံအစိုးရအား ဖိအားပေးသည့်အနေဖြင့် ထိုင်ဝမ်အနီးတစ်ဝိုက်တွင် တရုတ်စစ်တပ်က စစ်ရေးကိုအရှိန်မြှင့်လုပ်ဆောင်နေသည်။
ထိုင်ဝမ်အစိုးရကမူ ကျွန်းရှိလူ ၂၃ သန်းကသာ ၎င်းတို့၏အနာဂတ်ကို ဆုံးဖြတ်နိုင်ပြီး ငြိမ်းချမ်းရေးကို လိုလားသော်လည်း တိုက်ခိုက်ခံရပါက မိမိနိုင်ငံအားကာကွယ်သွားမည်ဟု ထိုင်ဝမ်အစိုးရက ပြောကြားခဲ့သည်။
ဆွစ်ဇာလန်သည် တရုတ်နိုင်ငံအပေါ် အီးယူ၏ ဒဏ်ခတ်ပိတ်ဆို့မှုများအတိုင်း ချမှတ်ပါမည်လားဟု Neue Zuercher Zeitung သတင်းစာ၏ မေးမြန်းမှုကို စီးပွားရေး အတွင်းဝန်ချုပ်ရုံး (SECO)ညွှန်ကြားရေးမှူး Marie – Gabrielle Ineichen – Fleisch က “ဒီလိုဒဏ်ခတ်ပိတ်ဆို့မှုတွေကို ချမှတ်လို့ယုံကြည်ပါတယ်”ဟုဆိုသည်။
“ဒါပေမဲ့ တရုတ်နဲ့အီးယူဟာ စီးပွားရေးအရဆက်ဆံရေးက ပိုအရေးကြီးတဲ့အတွက် တရုတ်ကိုပိတ်ဆို့အရေးယူမှုက (ရုရှားကို ဒဏ်ခတ်အရေးယူတာထက်) ပိုပြီးထိရောက်မှုပြင်းထန်ပါလိမ့်မယ်။ဒါကြောင့် အီးယူ၊အမေရိက၊ဆွစ်ဇာလန်တို့ဟာ ရုရှားနဲ့တုန်းကထက် တရုတ်နဲ့ပိုမိုကောင်းမွန်တဲ့ ဆွေးနွေးမှုတွေရှိလာနိုင်ပါတယ်။တကယ်ပိတ်ဆို့တဲ့အဆင့်ထိမရောက်ဖို့လည်း မျှော်လင့်ပါတယ်” ဟု၎င်းကဆိုသည်။
Ineichen – Fleisch သည် ဖေဖော်ဝါရီလက ရုရှား၏ယူကရိန်းကို ဝင်ရောက်မှုနှင့်ပတ်သက်၍ ရုရှားတစ်ဦးချင်းနှင့် ကုမ္ပဏီများအား EU ၏ဒဏ်ခတ်ပိတ်ဆို့မှုများ ချမှတ်ချိန်က ဆွစ်ဇာလန်၏ရပ်တည်မှုကို ကာကွယ်ခဲ့သည်။
မော်စကို၏ အထက်တန်းလွှာများအတွက် ရေပန်းစားသော နေရာတစ်ခုဖြစ်သည့် ဆွစ်ဇာလန်တွင် ဒဏ်ခတ်ပိတ်ဆို့ထားသော ရုရှားနိုင်ငံသား ရာပေါင်းများစွာ၏ ပိုင်ဆိုင်မှုများအားထုတ်ယူခြင်းကိုအမြန်ဆုံပိတ်ဆို့ရန်လည်း ဖိအားများတိုးလာခဲ့သည်။
ယခုလအထိ ဆွစ်ဇာလန်နိုင်ငံသည် ဆွဇ်ဖရန့်ငွေ ၆ ဒသမ ၇ ဘီလီယံ (အမေရိကန်ဒေါ်လာ ၇ ဒသမ ၄ ဘီလီယံ) တန်ဖိုးရှိ ရုရှားဘဏ္ဍာရေးပိုင်ဆိုင်မှုများနှင့်ပိုင်ဆိုင်မှု ၁၅ ခုကိုထုတ်ယူခွင့်အားပိတ်ပင်ထားပြီး Ineichen – Fleisch က ဤကိန်းဂဏန်းသည် များစွာပြောင်းလဲဖွယ်မရှိကြောင်းပြောကြားခဲ့သည်။
“ကျွန်မတို့ SECO မှာ မတွေ့ရသေးတဲ့ ဒဏ်ခတ်ပိတ်ဆို့ခံထားရသူတွေရဲ့ ပိုင်ဆိုင်မှုတွေ အများကြီးရှိတယ်လို့တော့မတွေ့မိဘူး” ဟုလည်း ၎င်းကဆိုသည်။
Source – Reuters/yb