တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီးမင်းအောင်လှိုင်သည် ယနေ့ ဇန်နဝါရီ ၄ ရက်မွန်းလွဲပိုင်းကကျင်းပသည့် တပ်မတော်စွမ်းရည်သတ္တိဆိုင်ရာ ဂုဏ်ထူးဆောင်တံဆိပ်ချီးမြှင့်အပ်နှင်းခြင်းအခမ်းအနားတက်ရောက်ခဲ့ကြောင်း သိရသည်။
ထိုသို့ တက်ရောက်ပြီးနောက် တပ်မတော်သည် ဆူကြုံ နိမ့်မြင့်ခရီးအသွယ်သွယ်တွင် စစ်ရေးတိုက်ပွဲများကို သာမက နိုင်ငံရေးတိုက်ပွဲများကိုလည်း မလွဲမသွေရင် ဆိုင်ဆင်နွှဲရင်း အမျိုးသားနိုင်ငံရေးဦးဆောင်မှုဟူသည့် ထူးခြားသည့်သမိုင်းမှတ်တိုင်တစ်ခုကိုပါ စိုက်ထူနိုင်ခဲ့ခြင်းမှာ သမိုင်းစဉ်များကချီးမြှင့်သည့် မိမိတို့တပ်မတော်၏ စွမ်းရည်သတ္တိဆိုင်ရာဂုဏ်ဒြပ်တစ်ခုလည်း ဖြစ်သည်ဟုပြောကြားခဲ့ကြောင်း သိရသည်။
ထို့ကြောင့် ယနေ့မျက်မှောက်ခေတ်ကာလတွင် တပ်မတော်သားများ၊ တပ်မတော်မိသားစုဝင်များအနေဖြင့် တပ်မတော်၏ဂုဏ်ဒြပ်ကို လေးစားတန်ဖိုးထားကြရမည့်အပြင် တန်ဖိုးကြီးမားသည့် လွတ်လပ်ရေးနှင့်အတူ နိုင်ငံတော်ကာကွယ်ရေးတာဝန်၏ နက်ရှိုင်းကျယ်ပြန့်မှုကိုသိရှိပြီး ကျရာကိုယ်စီတာဝန်များကို ရဲရဲဝံ့ဝံ့ကျေပွန်စွာထမ်းဆောင်ကြရန် လေးလေးနက်နက်တိုက်တွန်းမှာကြားလိုသည်ဟုပြောကြားခဲ့ကြောင်း သိရသည်။
ထို့ပြင် ယခုကဲ့သို့ထိုက်တန်သည့် ဂုဏ်ပြုချီးမြှင့်ခြင်းများအပြင် တပ်မတော်မိသားစုဝင်များ၏ နောင်ရေးစိတ်အေးချမ်းသာစေရန်လိုအပ်သည်များကို စီမံဆောင်ရွက်ပေးလျက်ရှိပြီး စွန့်လွှတ်စွန့်စားသည့် စစ်သည်တော်ကောင်းများဖြစ်လာစေရေး နိုင်ငံတော်၊ တပ်မတော်အနေဖြင့် ဆောင်ရွက်ပေးသင့်သည်မှန်သမျှကို ဆက်လက်စီမံဆောင်ရွက်ပေးရန်အမြဲအသင့်ရှိသည်ဟုလည်းပြောကြားခဲ့ကြောင်း သိရသည်။
ထို့နောက် ဗိုလ်ချုပ်မှူးကြီးမင်းအောင်လှိုင်မှ သူရဲ ကောင်းမှတ်တမ်းဝင်တံဆိပ်ရရှိသူ ဗိုလ်မှူးကြီး(၇)ဦး၊ ဒု-ဗိုလ်မှူးကြီး(၆)ဦး၊ ဗိုလ်မှူး(၁၄)ဦး၊ ဗိုလ်ကြီး(၄)ဦး၊ ဗိုလ်(၁)ဦး၊ ဒု-အရာခံဗိုလ်(၄)ဦး၊ အုပ်ခွဲတပ်ကြပ်ကြီး (၁)ဦး၊ တပ်ကြပ်ကြီး(၃)ဦး၊ တပ်ကြပ်(၅)ဦး၊ ဒု-တပ် ကြပ်(၆)ဦးတို့အား ဆုတံဆိပ်များ အသီးသီးပေးအပ်ချီးမြှင့်ခဲ့ကြောင်း သိရသည်။
ထို့ပြင် ဗိုလ်ချုပ်မှူးကြီးမင်းအောင်လှိုင်သည် တပ်မ တော်စွမ်းရည်သတ္တိဆိုင်ရာဂုဏ်ထူးဆောင်တံဆိပ်များ ချီးမြှင့်ခံရသူများကို လက်ဖက်ရည်ဝိုင်းဖြင့်တည်ခင်း ဧည့်ခံပြီးနောက် ရင်းရင်းနှီးနှီးနှုတ်ဆက်ခဲ့ကြောင်း သိရသည်။