တနင်္သာရီကမ်းရိုးတန်းဒေသ၏ အမည်ရှိနှင့် အမည်မရှိကျွန်းများအား နိုင်ငံတကာစံနှုန်းများနှင့်အညီ အမှတ်စဉ် ရေးထိုးသတ်မှတ်ပြီး အမည်မဲ့ကျွန်းများအား အမည်ပေးခြင်းလုပ်ငန်းများ ဆောင်ရွက်မည်

တနင်္သာရီကမ်းရိုးတန်းဒေသ၏ အမည်ရှိနှင့် အမည်မရှိကျွန်းများအား နိုင်ငံတကာစံနှုန်းများနှင့်အညီ အမှတ်စဉ် ရေးထိုးသတ်မှတ်ပြီး အမည်မဲ့ကျွန်းများအား အမည်ပေးခြင်းလုပ်ငန်းများ ဆောင်ရွက်မည်ဖြစ်ကြောင်း သတင်းရရှိသည်။

တနင်္သာရီတိုင်းဒေသကြီး တနင်္သာရီကမ်းရိုးတန်းဒေသ၏ အမည်ရှိနှင့် အမည်မရှိကျွန်းများအား အမှတ်စဉ်သတ်မှတ်ရေးနှင့် အမည်ပေးရေးလုပ်ငန်းကော်မတီ ပထမအကြိမ် အစည်းအဝေးကို ယနေ့ (ဇန်နဝါရီ ၂၆) နံနက် ၁၀ နာရီ က ထားဝယ်မြို့၊ တိုင်းဒေသကြီးအစိုးရအဖွဲ့ရုံး၊ အစည်းအဝေးခန်းမ၌ ကျင်းပခဲ့သည်။

တနင်္သာရီကမ်းရိုးတန်းဒေသ တစ်လျှောက် ပင်လယ်ပြင်အတွင်းရှိ ကျွန်းများအနက် တိုင်းဒေသကြီးအတွင်းရှိ အမည်ရှိ၊ အမည်မဲ့ကျွန်းများကို နိုင်ငံတကာစံနှုန်းများနှင့်အညီ အမှတ်စဉ် ရေးထိုးသတ်မှတ်ခြင်း၊ အမည်မဲ့ကျွန်းများအား အမည်ပေးခြင်းလုပ်ငန်းများကို ဗဟိုကော်မတီ၏ လမ်းညွှန်ချက်နှင့်အညီ လုပ်ငန်းများအကောင်အထည်ဖော်ဆောင်ရွက်ရန်အတွက် တိုင်းဒေသကြီးလုပ်ငန်း ကော်မတီကို လုပ်ငန်းတာဝန် (၇) ရပ်ချမှတ်ပြီး လုပ်ငန်းများဆောင်ရွက်လျက်ရှိကြောင်း လုပ်ငန်းကော်မတီဥက္ကဋ္ဌ၊ လုံခြုံရေးနှင့်နယ်စပ်ရေးရာ ဝန်ကြီးဗိုလ်မှူးကြီးသိန်းလင်းက ပြောသည်။

ကမ်းရိုးတန်း ဒေသပင်လယ်ပြင်အတွင်း၌ တည်ရှိသောကျွန်းများ၏အရေအတွက်နှင့် တည်နေရာများကို စနစ်တကျ မှတ်တမ်းတင်ဆောင်ရွက်ထားရှိခြင်းအားဖြင့် နိုင်ငံတော်အချုပ်အခြာအာဏာပိုင်စိုးသည့် ပင်လယ်ပြင် ဧရိယာနှင့် ကမ်းရိုးတန်းဒေသကို နိုင်ငံတကာစံနှုန်းများနှင့်အညီ ကာကွယ်ထိန်းသိမ်းစောင့်ရှောက်နိုင်မှာ ဖြစ်သောကြောင့်အငြင်းပွားမှုများကိုလည်း ခိုင်မာစွာ ရှင်းလင်းခုခံဆောင်ရွက်နိုင်မှာဖြစ်ကြောင်းကိုလည်း လုံခြုံရေးနှင့်နယ်စပ်ရေးရာ ဝန်ကြီးဗိုလ်မှူးကြီးသိန်းလင်းက ပြောကြားခဲ့သည်။