တရုတ် – မြန်မာနယ်စပ် မူဆယ်မြို့မှတဆင့် ယာယီဖြတ်သန်းခွင့်ကတ် ကိုင်ဆောင်ကာ တရုတ်နိုင်ငံအတွင်းသို့သွားရောက်လိုသူ သောင်းနှင့်ချီရှိနေသော်လည်း နေ့စဉ်ကတ်ထုတ်ပေးနိုင်သည့် ပမာဏမှာ (၅၀၀) ဝန်းကျင်သာ ရှိသည့်အတွက် အခက်အခဲများနှင့် ကြုံတွေ့နေရကြောင်း မူဆယ်ဒေသခံများ ထံမှ စုံစမ်းသိရသည်။
ကိုဗစ်ကာလအတွင်းက ယာယီပိတ်ထားခဲ့သည့် နှစ်နိုင်ငံ နယ်စပ်ဖြတ်သန်းခွင့်ကို ပြီးခဲ့သည့် စက်တင်ဘာလ (၄) ရက် နေ့လယ်ပိုင်းက စတင်ကာ အကန့်အသတ်မရှိ ပြန်ထုတ်ပေးခဲ့ခြင်းလည်း ဖြစ်သည်။
ယင်းကဲ့သို့ ယာယီနယ်စပ် ဖြတ်သန်းခွင့် (TBP) ကတ်များ ပြန်လည်ထုတ်ပေးနေပြီဖြစ်သည့်အတွက် မူဆယ်နယ်စပ်ဒေသခံများအပါအဝင် မြန်မာနိုင်ငံတဝန်းမှ လာရောက်စောင့်ဆိုင်းနေသူများမှာ သောင်းနှင့်ချီကာ ရှိနေကြောင်း သိရသည်။
” မနက် (၆) နာရီကနေ ညနေ (၅) နာရီအထိ ထုတ်ပေးတယ်။ ဒါပေမဲ့ စက်က (၂) လုံးတည်းပဲ ရှိတော့ ပိတ်မိနေတာတွေတော့ ရှိမှာပဲ။ ဘာမှလည်း လုပ်ပေးလို့ မရဘူး။ ဘာဖြစ်လို့လဲဆိုတော့ လူတစ်ယောက်ကို အနည်းဆုံး (၃) မိနစ်လောက်ကြာတယ်ဗျာ။ အဲဒီတော့ တစ်နေကုန် ကတ်ထုတ်ပေးနိုင်တာက လူအယောက် (၅၀၀) စာလောက်က ထန်ကုန်ပဲ။ အဲဒီထက်မပိုဘူး” ဟု မူဆယ် အခြေစိုက် လူသားချင်းစာနာထောက်ထားမှု အကူညီပေးရေးကွန်ရက်မှ ဦးစိန်လှအောင်က ပြောသည်။
လက်ရှိတွင် တရုတ် – မြန်မာနယ်စပ် မူဆယ်မြို့မှတဆင့် ယာယီနယ်စပ်ဖြတ်သန်းခွင့်ကတ် (TBP) ကိုင်ဆောင်ကာ တရုတ်နိုင်ငံ ရွှေလီမြို့ဧရိယာအတွင်းသို့ (၆) ညအိပ် (၇) ရက် သွားလာနိုင်ပြီဖြစ်ပြီး အဆိုပါ TBP ကတ် ထုတ်ယူရန် စောင့်ဆိုင်းနေသည့် မြန်မာနိုင်ငံသား အများအပြား မူဆယ်မြို့တွင် စောင့်ဆိုင်းနေကြခြင်း ဖြစ်သည်။
အဆိုပါ TBP ကတ်သည် ရွှေလီ ၊ ကျယ်ခေါင် ဧရိယာအတွင်း အလည်အပတ်သဘော ခရီးသွားလာခွင့်အတွက် ထုတ်ပေးခြင်းသာ ဖြစ်ပြီး ယင်းကတ်ကိုင်ဆောင်ကာ အလုပ်လုပ်ကိုင်ခွင့် ခွင့်ပြုမထားကြောင်း စုံစမ်းသိရသည်။
ယင်းကဲ့သို့ အလုပ်လုပ်ကိုင်ခွင့် တရားဝင်ခွင့်ပြုမထားသော်လည်း တရုတ်နိုင်ငံဘက်မှ နားလည်မှုဖြင့် မသိကျိုးကျွံပြုထားသည့်အတွက် ကိုဗစ်ကာလမတိုင်မီ ယခင်နှစ်များကအတိုင်းပင် သွားရောက်လုပ်ကိုင်လျက်ရှိနေကြသည်။
” ဒီကတ်က အလည်အပတ်နဲ့ ဈေးဝယ်ခွင့်ကတ်ပေါ့။ ဒါပေမဲ့ နားလည်မှုပေါ့ဗျာ။ တရုတ်ကလည်း အခုဝင်သွားတဲ့ တစ်ပတ်ကတ်တွေနဲ့လည်း ခိုင်းမှာပဲ။ ဒီဘက်မှာက တစ်နေ့လုပ်ခ ၅၀၀၀/၁၀၀၀၀ ရဖို့မလွယ်ဘူးလေဗျာ။ ဟိုဘက်မှာ ပန်းရံအလုပ်သမား မဆလာသယ်ရင်တောင် တစ်ရက်ကို တရုတ်ငွေ ၁၀၀ ဆိုတော့ ၅၀၀၀၀ နီးပါးရပြီလေ” ဟု ဦးစိန်လှအောင်က ရှင်းပြသည်။
လက်ရှိ အနေအထားအရ တရုတ်နိုင်ငံ ရွှေလီမြို့ ဧရိယာအတွင်း၌ပင် မြန်မာအလုပ်သမား သိန်းဆယ်နှင့်ချီ၍ အလုပ်ပေးထားနိုင်သည့် အခြေအနေရှိနေပြီး ယင်းကဲ့သို့အလုပ်အကိုင်အခွင့်အလန်း ကွာဟနေမှုကြောင့် နယ်စပ်ဖြတ်ကျော်သွားရောက်လိုသည့်ဦးရေ မြင့်တက်နေဦးမည်ဟု ခန့်မှန်းမှုများလည်း ရှိနေသည်။
” ကျွန်တော် ခန့်မှန်းရသလောက် (၃) လအတွင်းလောက်ကတော့ တော်တော်ကို ခဲခဲလှုပ်နေဦးမှာပဲ” ဟု ၎င်းက ဆိုသည်။
တရုတ် – မြန်မာ နယ်စပ် ယာယီဝင်ထွက်ခွင့်ကတ် (TBP) များကို တရုတ် – မြန်မာနယ်စပ် မူဆယ်မြို့ရှိ နန်းတော်ဂိတ်၊ ဆင့်ဖြူဂိတ်တို့တွင် နေ့စဉ် နံနက် (၆) နာရီမှ ညနေ (၅) နာရီအထိ ထုတ်ပေးနေပြီး မန့်ဝိန်းဂိတ်တွင် ကုန်တင်ယာဉ်မောင်းများနှင့် ယာဉ်နောက်လိုက်များအား စိစစ်ထုတ်ပေးလျက်ရှိကြောင်း သိရသည်။
အဆိုပါ TBP ကတ်ထုတ်ပေးခြင်းကို ယခုနှစ် နှစ်ဆန်းပိုင်းမှစတင်ကာ နှစ်နိုင်ငံနားလည်မှုဖြင့် စတင်ခဲ့သော်လည်း အကြောင်းအမျိုးမျိုးကြောင့် မူဆယ်၊ နမ့်ခမ်းနှင့် ပန်ဆန်း အိမ်ထောင်စုဇယား ရှိသူများကိုသာ ခွင့်ပြုပေးနေရာမှ ယခုစက်တင်ဘာလ (၄) ရက် နေ့လယ် (၁၂) နာရီက စတင်ကာ မြန်မာနိုင်ငံသားမှတ်ပုံတင်ကိုင်ဆောင်သူ မည်သူမဆိုအား ခွင့်ပြုထုတ်ပေးခဲ့ခြင်းလည်း ဖြစ်သည်။
ဓာတ်ပုံ – မူဆယ် ရွှေလီ ကျယ်ခေါင် အလုပ်အကိုင်အခွင့်အလမ်း
