မြန်မာနိုင်ငံ ဘောလုံးအဖွဲ့ချုပ်သည် မြန်မာ့လက်ရွေးစင် အမျိုးသား ယူ -၂၂ အသင်း၊ အမျိုးသား ယူ-၁၉ အသင်းတို့အတွက် ဂျပန်နိုင်ငံသား နည်းပြသစ်များကို ခန့်အပ်လိုက်ကြောင်း သိရသည်။
ယင်းအသင်းများကို ၂၀၂၅ ခုနှစ်အတွင်း ထိုင်းနိုင်ငံတွင် ကျင်းပမည့် အရှေ့တောင်အာရှ အားကစားပြိုင်ပွဲနှင့် နိုင်ငံတကာ ပြိုင်ပွဲများတွင် ယှဉ်ပြိုင်နိုင်ရန် ကြိုတင်ပြင်ဆင်မှုအဖြစ် နည်းပြသစ်များခန့်အပ်လိုက်ခြင်း ဖြစ်သည်။
မြန်မာ့ လက်ရွေးစင် အမျိုးသား ယူ-၂၂ ဘောလုံးအသင်း နည်းပြချုပ်အဖြစ် အသက် (၅၆)နှစ်အရွယ် ဂျပန်လူမျိုး မစ္စတာ Hisashi kurosaki အား (၁)နှစ်စာချုပ်ဖြင့် ခန့်အပ်ခဲ့ကာ မြန်မာ့ လက်ရွေးစင် အမျိုးသား ယူ-၁၉ အသင်း နည်းပြချုပ်အဖြစ် အသက် (၄၆) နှစ်အရွယ် မစ္စတာ Ryuji sueoka အား(၂)နှစ် စာချုပ်ဖြင့် ခန့်အပ်ခဲ့ခြင်းဖြစ်သည်။
ဂျပန်လက်ရွေးစင် ကစားသမားဟောင်း တစ်ဦးဖြစ်ခဲ့ပြီး UEFA Pro လိုင်စင်နှင့် JFA Coach (Level S) လိုင်စင်ရ နည်းပြတစ်ဦးဖြစ်သည့် အသက် (၅၆) နှစ်အရွယ် ဂျပန်လူမျိုး မစ္စတာ Hisashi kurosaki သည် ၂၀၂၅ ဆီးဂိမ်းစ်၊ အာဆီယံ ယူ -၂၂ ချန်ပီယံရှစ်၊ AFC U 23 ခြေစစ်ပွဲများတွင် အောင်မြင်မှုရရှိရန် တာဝန်ယူဆောင်ရွက်ရမည်ဖြစ်သည်။
ကစားသမားဘဝတွင် ကာရှီးမား အန်တလာ အသင်းတွင် (၁၄၄) ပွဲကစားကာ (၄၈) ဂိုးသွင်းယူနိုင်ခဲ့ကာ အခြားသော ဂျေလိဂ်အသင်းများတွင်လည်း ကစားခဲ့ပြီး နည်းပြဘဝတွင် ဂျေလိဂ်ကလပ် Albirex Niigata အသင်း၊ တရုတ်စူပါလိဂ်ကလပ် Qingdao West Coast စသည့် အသင်းများအပြင် ဂျပန်ကလပ် ကာရှီးမားအန်းတလားစ် အသင်းတွင်လည်း အကယ်ဒမီ၊ လူငယ်အသင်းများ၊ စီနီယာ အသင်းများကို နည်းပြချုပ်အဖြစ် ကိုင်တွယ်ခဲ့သူဖြစ်သည်။
ထိုနည်းတူ UEFA Pro လိုင်စင်ရ နည်းပြတစ်ဦးလည်း ဖြစ်သည့် အသက် (၄၆) နှစ်အရွယ် မစ္စတာ Ryuji sue oka သည် မြန်မာ ယူ ၁၉ အသင်းအား အာရှ ယူ၂၀၊ အာဆီယံ ယူ ၁၉ ပြိုင်ပွဲများတွင် အောင်မြင်မှု ရရှိစေရန် နည်းပြချုပ်အဖြစ် ဦးဆောင်ရမည် ဖြစ်ပြီး ဆီးဂိမ်းစ်ပြိုင်ပွဲဝင် မြန်မာ ယူ ၂၂ အသင်းကိုလည်း Hisashi kurosaki ၏ လက်ထောက်နည်းပြအဖြစ် တာဝန်ယူဆောင်ရွက်ရမည်လည်း ဖြစ်သည်။
Ryuji sueoka သည် ကစားသမားဘဝတွင် စင်ကာပူ၊ ထိုင်းစသည့် အရှေ့တောင်အာရှကလပ်များနှင့် အိန္ဒိယ က လပ်အသင်းများတွင် ကွင်းလယ်နှင့် တိုက်စစ်မှူးအဖြစ် ကစားခဲ့သူဖြစ်ပြီး UEFA Pro လိုင်စင်ရ နည်းပြတစ်ဦးလည်း ဖြစ်ကြောင်းလည်း သိရသည်။