မြေပဲ၊ နှမ်းဖြူ၊ နှမ်းညို စတဲ့ ဆီထွက်သီးနှံများအတွက် အာမခံဈေးနှုန်းများကို သတ်မှတ်ဖွင့်လှစ်ပေးထားကြောင်း မြန် မာနိုင်ငံဆီစက်လုပ်ငန်းရှင်များအသင်းထံမှ သိရသည်။
မကွေးတိုင်းဒေသကြီးအတွင်းရှိ တောင်သူများ ဆီထွက်သီးနှံများ ပိုမိုတိုးချဲ့စိုက်ပျိုးလာစေရန် ရည်ရွယ်ပြီး အာမခံဈေးနှုန်းများ သတ်မှတ်ပေးခြင်းဖြစ်ကြောင်း သိရသည်။
လာမည့် သီးနှံပေါ်ရာသီတွင် ပစ္စည်းအရည်အသွေးပေါ်မူတည်၍ မြေပဲအတောင့် တစ်တင်းလျှင် ကျပ် (၄၀,၀၀၀)၊ နှမ်းဖြူ တစ်တင်းလျှင် ကျပ် (၁၃၀,၀၀၀) မှ (၁၅၀,၀၀၀) အထိနှင့် နှမ်းညို တစ်တင်းလျှင် ကျပ် (၁၀၀,၀၀၀) မှ (၁၂၀,၀၀၀) အထိ သတ်မှတ်ထားသည်။
မကွေးတိုင်းဒေသကြီးတွင် သီးနှံစုံစိုက်ဧက (၆၄) သိန်းကျော်ရှိပြီး ယင်းအနက် ဆီထွက်သီးနှံစိုက်ဧက (၂၇) သိန်းကျော်ရှိကာ စုစုပေါင်းစိုက်ဧက၏ (၄၂) ရာခိုင်နှုန်းရှိကြောင်း သိရသည်။
လက်ရှိတွင် မကွေးတိုင်းဒေသကြီးအတွင်း မိုးရွာသွန်းမှုများ စတင်ရှိလာသဖြင့် မြေပဲ၊ နှမ်းနှင့် နေကြာများကို စတင်စိုက်ပျိုးနေကြပြီဖြစ်ကြောင်း ဒေသခံတောင်သူများထံမှ သိရသည်။
ထို့ပြင် မြန်မာနိုင်ငံ၏ စားသုံးဆီကဏ္ဍတွင် အခွင့်အလမ်းများရှိနေသော်လည်း စွမ်းအင်အခက်အခဲများ၊ တန်ဖိုးမြှင့်တင်နိုင်မှု အားနည်းခြင်း၊ စက်ပစ္စည်းများ ခေတ်မီတိုးတက်ရန် လိုအပ်နေခြင်းနှင့် ဈေးကွက်ဆိုင်ရာ စိန်ခေါ်မှုများလည်း ရှိနေကြောင်း သိရသည်။
ပြည်တွင်းစားသုံးဆီ ထုတ်လုပ်မှု လုံလောက်မှုမရှိသေးသဖြင့် စားအုန်းဆီများကို ပြည်ပမှ တင်သွင်းနေရဆဲဖြစ်သည်။
စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန၏ အချက်အလက်များအရ ၂၀၂၅-၂၀၂၆ ဘဏ္ဍာနှစ်တွင် မြေပဲ၊ နှမ်း၊ နေကြာ၊ မုန်ညင်း၊ ပန်းနှမ်းနှင့် ပဲပုပ်တို့ကို စိုက်ဧက (၈ ဒသမ ၇) သန်းနီးပါး စိုက်ပျိုးရန် လျာထားပြီး ဆီကုန်ကြမ်းများ ကြိတ်ခွဲထုတ်လုပ်ပါက စားသုံးဆီတန်ချိန် (၈ ဒသမ ၆) သိန်းခန့် ထွက်ရှိနိုင်မည်ဟု ခန့်မှန်းထားသည်။