တိုင်းနှင့်ပြည်နယ်အလိုက် ဆိုလာလျှပ်စစ်ဓာတ်အားပေးစက်ရုံများတည်ဆောက်နိုင်ရန် နိုင်ငံတော်မှစီစဉ်ဆောင်ရွက်ပေးသွားမည်ဟု နစက ဥက္ကဋ္ဌ၊ နိုင်ငံတော်ဝန်ကြီးချုပ်၊ ဗိုလ်ချုပ်မှူးကြီးမင်းအောင်လှိုင်က ပြောသည်။
နစက ဥက္ကဋ္ဌနှင့် ပြည်ထောင်စုအဆင့် MSME ထုတ်ကုန်ပြပွဲနှင့်ပြိုင်ပွဲဖွင့်ပွဲသို့တက်ရောက်လာသည့် တိုင်းနှင့်ပြည်နယ်အသီးသီးမှ ဝန်ကြီးချုပ်များဖေဖော်ဝါရီ ၁၁ ရက်နံနက်ပိုင်းကတွေ့ဆုံစဉ် နစက ဒု-ဥက္ကဋ္ဌ၊ ဒု-ဗိုလ်ချုပ်မှူးကြီးစိုးဝင်း ၏ဆွေးနွေးပြောကြားမှုကို နစက ဥက္ကဋ္ဌမှဖြည့်စွက်ပြောကြားခဲ့ခြင်းဖြစ်သည်။
နစက ဥက္ကဋ္ဌမှ လျှပ်စစ်နှင့်စွမ်းအင်ကဏ္ဍဖွံ့ဖြိုးရန် ရေနံစိမ်းတိုးမြှင့်ထုတ်ယူနိုင်ရေး၊ ဆိုလာစနစ်ဖြင့် လျှပ်စစ်ဓာတ်အားထုတ်ယူနိုင်ရန် တိုင်းနှင့် ပြည်နယ်အလိုက် စိုက်ပျိုးမွေးမြူရေးမြေအဖြစ် သုံးစွဲရန်မသင့်လျော်သည့်နေရာများ၊ မြေလွတ်မြေရိုင်းနေရာများကို စိစစ်ဖော်ထုတ်ရမည်ဟု မှာကြသည်။
ထိုသို့ စိစစ်ဖော်ထုတ်ပြီးပါက ယင်း မြေနေရာများတွင် ဆိုလာလျှပ်စစ်ဓာတ်အားပေးစက်ရုံများတည်ဆောက်နိုင်ရေးအတွက် နိုင်ငံတော်မှစီစဉ်ဆောင်ရွက်ပေးသွားမည်ဟု နစက ဥက္ကဋ္ဌက ပြောကြားခဲ့သည်။
နစက ဒု-ဥက္ကဋ္ဌ၊ ဒု-ဗိုလ်ချုပ်မှူးကြီးစိုးဝင်းမှ MSME လုပ်ငန်းများ၌ လျှပ်စစ်မီးလိုအပ်ချက်ကို ဆိုလာစနစ်ဖြင့်ဆောင်ရွက်ပါက လုပ်ဆောင်ပြီး (၃)နှစ်တာကာလအတွင်း အရင်းကြေကာလသို့ ရောက်ရှိနိုင်မည်ဟု ဆွေးနွေးပြောကြားသည်။
ထို့ကြောင့် တိုင်းနှင့်ပြည်နယ်ဝန်ကြီးချုပ်များအနေဖြင့် မိမိတို့ဒေသအလိုက် MSME လုပ်ငန်းများအား ဆိုလာစနစ်အသုံးပြု၍ အောင်မြင်အောင်ဆောင်ရွက်နိုင်ရန် အသိပညာပေးရမည်ဟုလည်း ဆွေးနွေးပြောကြားခဲ့သည်။