စံချိန်တင်မြင့်တက်ခဲ့သည့် ရွှေနှင့် ဒေါ်လာဈေးများ ပြန်လည်ကျဆင်းလာ

အခေါက်ရွှေတစ်ကျပ်သား သိန်း (၄၀) ကျော်အထိ စံချိန်တင် မြင့်တက်ခဲ့ရာမှ တဖြေးဖြေးပြန်လည်ကျဆင်းလာသည့် ပြည်တွင်း အခေါက်ရွှေဈေးနှုန်းမှာ ယနေ့ စက်တင်ဘာ (၈) ရက် နံနက်ပိုင်းတွင် တစ်ကျပ်သား (၃၅) သိန်း ဝန်းကျင်ထိ ပြန်လည် ကျဆင်းခဲ့ကြောင်း သိရသည်။

ပြီးခဲ့သည့် ဩဂုတ်လ အတွင်းက ဒေါ်လာဈေးမြင့်တက်မှုကို အကြောင်းပြကာ တစ်ကျပ်သား သိန်း (၄၀) ဝန်းကျင်အထိ ဈေးဆွဲတင်ခဲ့ကြသော်လည်း စက်တင်ဘာ လဆန်းပိုင်းမှစတင်ကာ တရိပ်ရိပ် ပြန်လည် ကျဆင်းလာခြင်းလည်း ဖြစ်သည်။

ကျပ်ငွေနှစ်​သောင်းတန်နှင့်စင်္ကာပူဘဏ် ဂယက်တို့​ကြောင့် တစ်ဒေါ်လာ ၄၀၀၀ ကျပ် ဝန်းကျင်အထိ မြင့်တက်ခဲ့သည့် အမေရိကန်ဒေါ်လာ ဈေးနှုန်းမှာလည်း တဖြေးဖြေးပြန်လည် ကျလျက်ရှိနေရာ ယနေ့ စက်တင်ဘာ (၈) ရက် ပြည်တွင်းနိုင်ငံခြားငွေဈေးကွက်၌ တစ်ဒေါ်လာ ၃၅၃၀ ကျပ်ဝန်းကျင်အထိ ပြန်လည် ကျဆင်းသွားကြောင်း သိရသည်။အချို့ကုန်သည်များTT ကို ၃၄၈၀ နှင့်ဖြတ်ကြသည်ဟုလည်းကြားသိရသည်။

ရွှေဈေး၊ ဒေါ်လာဈေး စံချိန်တင်မြင့်တက်မှုကို​လျော့ချရန် ဗဟိုဘဏ်အပါအဝင် သက်ဆိုင်ရာ အဖွဲ့အစည်းများက လုပ်ဆောင်လျက်ရှိပြီး ခေါ်ယူသတိပေးခြင်း၊ ဈေးကွက်အတွင်း၌ မသမာသည့်နည်းလမ်း ဈေးကစားနေသူများကို ဖမ်းဆီးအရေးယူခြင်းများ လုပ်ဆောင်နေသလို ပြီးခဲ့သည့် ရက်ပိုင်းက ငွေကြေးဈေးကွက်အတွင်း အသွင်ယူဖမ်းဆီးစစ်ဆေးခြင်းများ ပြုလုပ်ခဲ့ခြင်းများကြောင့် ဈေးကျလာခဲ့ခြင်းဖြစ်သည်။

“ဈေးကွက်အနေအထားက မှန်းရခက်တယ်။ ရွေကလည်း ကျလာသလို ဒေါ်လာကလည်းကျလာတယ်။ ပြီးခဲ့တယ့်ရက်တွေက အသွင်ယူပြီးဖမ်းတာတွေတွေရှိတော့ ဈေးကွက်ထဲအရောင်းအဝယ်မရှိဖြစ်နေတာ”ဟု နိုင်ငံခြားငွေရောင်းဝယ်သူတစ်ဦးက ပြောသည်။

ယင်းအခြေအနေများကြောင့် ငွေကြေးဈေးကွက်အတွင်း အရောင်းအဝယ်များ ရပ်တန့်သွား၍ ဈေးနှုန်း ပြန်လည်ကျဆင်းလာခြင်းဖြစ်ပြီး လက်ရှိဈေးကွက်အခြေအနေသည် မှန်းရခက်သည့် အနေအထားတွင်ရှိနေ​သေးကြောင်း ဈေးကွက်အတွင်း ကုန်သည်အချို့က သုံးသပ်ထားသည်။