ဖိလစ်ပိုင်နှင့် မြန်မာအကြား စိုက်ပျိုးရေးနှင့် အသေးစား၊ အငယ်စား၊ အလတ်စား လုပ်ငန်းများ ဖွံ့ဖြိုးတိုးတက်ရေးတွင် ပူးပေါင်းဆောင်ရွက်ရန်အတွက် ASEAN-BAC ဖိလစ်ပိုင် ဥက္ကဋ္ဌ Mr. Jose Ma. A Concepcion III နှင့် ASEAN-BAC မြန်မာဥက္ကဋ္ဌ ဦးအေးဝင်းတို့က နားလည်မှုစာချွန်လွှာကို လက်မှတ်ရေးထိုးခဲ့ကြသည်။
၂၀၂၃ခုနှစ် ၊ စက်တင်ဘာလ (၅) ရက်နေ့တွင် အင်ဒိုနီးရှားနိုင်ငံ၊ ဂျာကာတာမြို့၊ The Sultan Hotel ၌ အာဆီယံအဖွဲ့ဝင်နိုင်ငံများမှ စီးပွားရေးလုပ်ငန်းရှင်များ အများအပြားတက်ရောက်သော ဖိလစ်ပိုင်-အင်ဒိုနီးရှား စားပွဲဝိုင်း ဆွေးနွေးပွဲကို ကျင်းပပြုလုပ်ခဲ့ခြင်းဖြစ်သည်။
ကမ္ဘောဒီးယားဝန်ကြီးချုပ် ဟွန်မာနက် လည်း နားလည်မှုစာချွန်လွှာ ရေးထိုးပွဲအခမ်းအနားသို့ တက်ရောက်အားပေးခဲ့သည်။
ယင်းအခမ်းအနားတွင် ASEAN-BAC နိုင်ငံများဖြစ်သော ဖိလစ်ပိုင်၊ကမ္ဘောဒီးယား၊အင်ဒိုနီးရှား၊လာအို၊ဘရူနိုင်း၊မြန်မာ၊စင်္ကာပူ၊ထိုင်း တို့နှင့် စီးပွားရေးပူးပေါင်းဆောင်ရွက်မှုဆိုင်ရာ နားလည်မှုစာချွန်လွှာအသီးသီး လက်မှတ်ရေးထိုးခဲ့ကြသည်။
အဆိုပါ နားလည်မှုစာချွန်လွှာတွင် (၁)အသေးစား၊ အလတ်စားနှင့် အကြီးစား တောင်သူလယ်သမားများ၊ လုပ်ငန်းရှင်များနှင့် သက်ဆိုင်ရာအဖွဲ့အစည်းများအကြား အလားအလာရှိသော စိုက်ပျိုးရေးကဏ္ဍ ၊ စိုက်ပျိုးရေးနည်းပညာ၊ စားနပ် ရိက္ခာဖူလုံရေး၊ စားနပ်ရိက္ခာဘေးအန္တရာယ်ကင်းရှင်းရေးနှင့် စိုက်ပျိုးရေးအခြေခံစားနပ်ရိက္ခာ ထုတ်လုပ်ရေး၊ စိုက်ပျိုးမွေးမြူရေးလုပ်ငန်းပုံစံများနှင့် တန်ဖိုးမြှင့်ထောက်ပံ့မှုကွင်းဆက်များ ဖွံ့ဖြိုးတိုးတက်ရေးတို့အတွက် လေ့လာမှုများနှင့် လမ်းညွှန်မှုများပြုလုပ်ကြရန်၊
(၂) ကုန်သွယ်မှုနှင့် ရင်းနှီးမြှုပ်နှံမှု အခွင့်အလမ်းများ ဖွံ့ဖြိုးတိုးတက်စေရန်၊ နည်းပညာဖလှယ်ခြင်း၊ ဆန်နှင့် လယ်ယာထွက်ကုန်များ၊ ဝန်ဆောင်မှုကဏ္ဍများတွင် လိုအပ်သည့် စီးပွားရေးဆိုင်ရာ လိုအပ်ချက်များကို သတ်မှတ်ရန်၊
(၃)ရာသီဥတုပြောင်းလဲမှုကို ရင်ဆိုင်ဖြေရှင်းရာတွင် ထိရောက်သော မဟာဗျူဟာများကို မြှင့်တင်ရန်နှင့် မြန်မာနှင့်ဖိလစ်ပိုင်နိုင်ငံတို့အတွက် ရေရှည်တည်တံ့သော လယ်ယာစီးပွားရေး ပတ်ဝန်းကျင်ကို ရရှိရန် တို့ ပါဝင်ကြောင်း သိရသည်။
ASEAN Business Advisory Council Myanmar (ASEAN-BAC Myanmar) ကို ၂၀၀၃ ခုနှစ်တွင် ကျင်းပခဲ့သည့် (၇)ကြိမ်မြောက် အာဆီယံထိပ်သီးအစည်းအဝေးတွင် အတည်ပြုချက်ရရှိခဲ့ပြီးနောက် စတင်ဖွဲ့စည်းခဲ့ပြီး ပုဂ္ဂလိကကဏ္ဍမှ အကြံပြုချက်များပေးရန်နှင့် စီးပွားရေးပေါင်းစည်းမှုဆီသို့ အာဆီယံ၏ ကြိုးပမ်းအားထုတ်မှုများကို မြှင့်တင်ရန်အတွက်ဖွဲ့စည်းထားခြင်းဖြစ်သည်။
ASEAN Business Advisory Council Philippines (ASEAN-BAC Philippines) သည် ဖိလစ်ပိုင်နိုင်ငံ၏ စီးပွားရေးစံနမူနာပုံစံများနှင့် ကောင်းမွန်သောစီးပွားရေးပတ်ဝန်းကျင် အပါအဝင် အဓိကလယ်ယာ စိုက်ပျိုးရေးထွက်ကုန်နှင့် စက်မှုလုပ်ငန်းများ၏ အသွင်ကူးပြောင်းမှုကို မြှင့်တင်ရန် ရည်ရွယ် ဖွဲ့စည်းထားခြင်းဖြစ်သည်။
အခမ်းအနားသို့ ကုန်သည်စက်မှုအသင်းချုပ် ဥက္ကဋ္ဌ ဦးအေးဝင်း (Chair, ASEAN-BAC Myanmar) ၊ အသင်းချုပ် ဒုတိယဥက္ကဋ္ဌ ဦးသောင်းတင်(Member of ASEAN-BAC Myanmar)၊ ဒုတိယဥက္ကဋ္ဌ ဒေါက်တာဝင်းစည်သူ၊ အထွေထွေအတွင်းရေးမှူးချုပ် ဒေါ်ခိုင်ခိုင်နွယ်၊ အကျိုးဆောင်စာရင်းစစ် ဦးဝေဖြိုး၊ Senior Executive Adviser ဦးဇော်မင်းဝင်း တို့ တက်ရောက်ခဲ့ကြသည်။
