စာတတ်မြောက်ရေးလုပ်ငန်းကို ရှေ့ပြေးဆောင်ရွက်ခဲ့သည့် ရှမ်းပြည်နယ် (အရှေ့ပိုင်း) မြို့နယ် (၄) မြို့နယ်၏ စဉ်ဆက်ပညာရေးဆောင်ရွက်နေမှု ဖေဖော်ဝါရီ (၅) ရက်တွင် ပြီးမြောက်မည်ဖြစ်ကြာင်း ကျောင်းပြင်ပနှင့် တစ်သက်တာပညာဦးစီးဌာနမှ သိရသည်။
စာတတ်မြောက်ရေးလုပ်ငန်းကို ရှေ့ပြေးဆောင်ရွက်ခဲ့သည့် နေပြည်တော်၊ ဧရာဝတီတိုင်းဒေသကြီးနှင့် ရှမ်းပြည်နယ် (အရှေ့ပိုင်း)တို့တွင် နောက်ဆက်တွဲလုပ်ငန်းအဖြစ် စဉ်ဆက်ပညာရေးကို သတ်မှတ်မြို့နယ်များ၌ ၂၀၂၄ ခုနှစ် နိုဝင်ဘာလမှ စတင်ဆောင်ရွက်ခဲ့ကြောင်း သိရသည်။
ကျောင်းပြင်ပနှင့် တစ်သက်တာပညာဦးစီးဌာနမှ အဆိုပါ မြို့နယ် (၄)မြို့နယ်ရှိ စာသင်ဝိုင်းများ၌ ဦးတည်အုပ်စုနှင့် ကိုက်ညီသူများအား စာဖတ်ရှိန်မြှင့်တင်ပေးခြင်း၊ ဝင်ငွေတိုးပွားရေး ချိတ်ဆက်ပေးခြင်းနှင့် ဘဝသာယာရေး အသိပညာပေးခြင်းစသည့် အစီအစဉ် (၃) ရပ် ပါဝင်သော အသိပညာပေး ဖြန့်ဝေပေးနေမှုများကို ဆောင်ရွက်လျက်ရှိကြောင်း သိရသည်။
ကျောင်းပြင်ပနှင့် တစ်သက်တာပညာဦးစီးဌာနက စဉ်ဆက်ပညာရေးလုပ်ငန်းကို ၂၀၂၅ ခုနှစ်၊ ဖေဖော်ဝါရီ လဆန်းမှစတင်၍ နေပြည်တော်၊ မန္တလေးတိုင်းဒေသကြီး၊ ဧရာဝတီတိုင်းဒေသကြီး၊ မွန်ပြည်နယ်၊ ရှမ်းပြည်နယ် (တောင်ပိုင်း)နှင့် (အရှေ့ပိုင်း)တို့ရှိ မြို့နယ်များတွင် လျာထားစာသင်သားပေါင်း (၃၈၇၅၇) ဦးကို စာသင်းဝိုင်းပေါင်း (၂၈၀၆) ဝိုင်းစုဖွဲ့၍ စေတနာ့ လုပ်အားပေး နည်းပြ/ ကြီးကြပ်ပေါင်း (၃၅၁၂) ဦးတို့ဖြင့် ဆက်လက်သင်ကြားပေးသွားမည်ဖြစ်ကြောင်း သိရသည်။
ကျောင်းပြင်ပနှင့် တစ်သက်တာ ပညာဦးစီးဌာန ညွှန်ကြားရေးမှူးချုပ် ဦးကျော်ဝင်းနှင့် တာဝန်ရှိသူများကလည်း ကျိုင်းတုံမြို့နယ်ရှိ ရပ်ကွက် ၄ အ.မ.က. (၈) မူလွန်ကျောင်းတွင် ဖွင့်လှစ်ထားသည့် စာသင်ဝိုင်းနှင့် ရပ်ကွက် ၁ အ.မ.က. (၃) မူလွန်ကျောင်းတို့တွင် ဖွင့်လှစ်ထားသည့် စာသင်ဝိုင်းများသို့ သွားရောက်ခဲ့ကြောင်း သိရသည်။
အလားတူ မိုင်းခတ်မြို့နယ် ကျိုင်းပင်ကွေ့ရွာ အ.မ.က. မူလွန်ကျောင်းရှိ စာသင်ဝိုင်းနှင့် ဝမ်ခုတ်ကျေးရွာရှိ အ.မ. က. မူလွန်ကျောင်းတို့တွင် ဖွင့်လှစ်ထားသည့် စာသင်ဝိုင်းများလည်း သွားရောက်ကြည့်ရှုခဲ့ပြီး စေတနာ့ လုပ်အားပေး နည်းပြများနှင့် ကြီးကြပ်များ၊ စာသင်သားများအား ရင်းရင်းနှီးနှီး တွေ့ဆုံအားပေးခဲ့ကြောင်း သိရသည်။