ယူကရိန်း စစ်သုံ့ပန်း ၆၅ ဦး ပါဝင်သွားခဲ့တယ်ဆိုတဲ့ ရုရှားစစ်ဘက် သယ်ပို့လေယာဉ်တစ်စင်း ပြီးခဲ့တဲ့ သီတင်းပတ်က ပျက်ကျမှုဖြစ်ခဲ့ပြီးနောက်ပိုင်း ရုရှားနဲ့ ယူကရိန်းတို့ ပထမဆုံးအကြိမ်အဖြစ် ရာနဲ့ချီတဲ့ စစ်အကျဉ်းသား လဲလှယ်မှုလုပ်ခဲ့ကြောင်း သိရပါတယ်။
တစ်ဖက်ကို စစ်သား ၁၉၅ ဦးစီ အပြန်အလှန် လက်ခံရရှိခဲ့ကြပြီး ၎င်းတို့စစ်သားတွေကိုတော့ စိတ်ပိုင်းဆိုင်ရာနဲ့ ကျန်းမာရေးဆိုင်ရာ စစ်ဆေးကုသမှုတွေလုပ်ဖို့အတွက် မော်စကိုမြို့ကို ခေါ်ဆောင်မှာဖြစ်တယ်လို့ ရုရှားကာကွယ်ရေးဝန်ကြီးဋ္ဌာနက ပြောဆိုခဲ့ပါတယ်။
“စေ့စပ်ညှိနှိုင်းမှု လုပ်ငန်းစဉ်ရဲ့ ရလဒ်တစ်ခုအဖြစ် ဖမ်းဆီးခံထားရတဲ့ ရုရှား စစ်မှုထမ်း ၁၉၅ ဦးဟာ ဇန်နဝါရီ ၃၁ ရက်မှာ ကိဗ်အစိုးရ ထိန်းချုပ်တဲ့ နယ်မြေကနေ ပြန်ရောက်ရှိလာခဲ့ပြီး အပြန်အလှန်အားဖြင့် ယူကရိန်းလက်နက်ကိုင်တပ်ဖွဲ့ရဲ့ အကျဉ်းသား ၁၉၅ ဦးတိတိကိုလည်း လွှဲပြောင်းပေးခဲ့ပါတယ်” လို့ ကာကွယ်ရေးဝန်ကြီးဋ္ဌာနရဲ့ ထုတ်ပြန်ချက်မှာ ဆိုခဲ့ပါတယ်။
အကျဉ်းသားလဲလှယ်ရေး သဘောတူညီချက်အတွက် ယူအေအီးနိုင်ငံက ကြားဝင်ဆောင်ရွက်ပေးခဲ့တာဖြစ်တယ်လို့ နိုင်ငံပိုင် သတင်းအေဂျင်စီ RIA က ဖော်ပြပါတယ်။
ဒီဖြစ်စဉ်ဟာ ပမာဏအများဆုံး အကျဉ်းသား လဲလှယ်မှုအစီအစဉ်တွေထဲက တစ်ခုဖြစ်တယ်လို့ ယူကရိန်း သမ္မတ ဗိုလိုဒီမာ
ဇယ်လင်စကီက သူ့ရဲ့ တရားဝင် X အကောင့်မှာ ပြောဆိုထားခဲ့ပါတယ်။ ပြန်ရောက်လာတဲ့ ယူကရိန်းစစ်သားအရေအတွက်ကို သူက ထုတ်ပြောရာမှာတော့ အနည်းငယ်ပိုများနေခဲ့ပြီး ၂၀၇ ဦး ရှိတယ်လို့ ဆိုထားပါတယ်။
ယူကရိန်းအစိုးရရဲ့ စစ်အကျဉ်းသားဆိုင်ရာ တာဝန်ရှိအဖွဲ့အစည်းက ပြောဆိုရာမှာတော့ ဒါဟာ အကြိမ် ၅၀ မြောက် အကျဉ်းသား လဲလှယ်မှုဖြစ်တယ်လို့ ဆိုပါတယ်။ ပြန်ရောက်လာတဲ့ စစ်သားတွေထဲမှာ မာရီယူပိုးလ်နဲ့ ခါဆွန်မြို့ ခုခံကာကွယ်ရေးတိုက်ပွဲတွေမှာ ဖမ်းဆီးခံခဲ့ရသူတွေအပြင် ပင်လယ်နက်ရှိ မြွေကျွန်းပေါ်ကနေ ရုရှားတို့ ဖမ်းဆီးသွားခဲ့တဲ့ စစ်သားတွေလည်း ပါဝင်ခဲ့တယ်လို့ ဆိုခဲ့ပါတယ်။
Ref: အယ်ဂျာဇီးယား