စစ်ကိုင်း၊ စက်တင်ဘာ ၁၄
စစ်ကိုင်းတိုင်းဒေသကြီး၊ စစ်ကိုင်းမြို့ရှိ နှစ် ၇၀၀ အားကစားကွင်းကို နိုင်ငံတကာအဆင့်မီ ကွင်းတစ်ကွင်းဖြစ်လာစေရန်အတွက် ၂၀၂၆-၂၀၂၇ ဘဏ္ဍာနှစ် ပြည်ထောင်စုဘတ်ဂျက်ဖြင့် အဆင့်မြှင့်တင်ရေးလုပ်ငန်းများ အရှိန်အဟုန်မြှင့် ဆောင်ရွက်လျက်ရှိသည်။
လက်ရှိတွင် အားကစားကွင်းအတွင်း ဘောလုံးကွင်းမြက်ခင်းနှင့် ရေဖျန်းစနစ် ပုံမှန်လည်ပတ်နိုင်ရေး ပြုပြင်ခြင်း၊ ဂါလန် ၃,၆၀၀ ဆံ့ ရေစင် (Over Head Tank) သစ် တည်ဆောက်ခြင်း၊ ပေ ၄၄၀ x ၃၅ ပေ အကျယ်ရှိ အမိုးမပါ ရိုးရိုးတန်း နှစ်ထပ်ပွဲကြည့်စင် တည်ဆောက်ခြင်း၊ ပေ ၂,၅၄၀ x ၇ ပေ အုတ်တံတိုင်းကာရံခြင်းနှင့် ဦးစီးအရာရှိနေအိမ် တည်ဆောက်ခြင်း စသည့် ဘက်စုံဖွံ့ဖြိုးရေးလုပ်ငန်းများကို ဆောင်ရွက်လျက်ရှိသည်။
အဆိုပါ လုပ်ငန်းခွင်သို့ အားကစားရေးရာဝန်ကြီးဌာန ပြည်ထောင်စုဝန်ကြီး ဦးရဲမြင့်ထွန်း၊ စစ်ကိုင်းတိုင်းဒေသကြီး ဝန်ကြီးချုပ် ဦးကိုလေးနှင့် တာဝန်ရှိသူများက ကွင်းဆင်းကြည့်ရှုစစ်ဆေးခဲ့ပြီး အရည်အသွေး ထိန်းသိမ်းရေး၊ သတ်မှတ်စံချိန်စံညွှန်းများအတိုင်း စနစ်တကျ တည်ဆောက်ရေးနှင့် ရေရှည်ခိုင်ခံ့မှုရှိစေရေးအတွက် လိုအပ်သည်များ မှာကြားခဲ့သည်။
ထို့နောက် ပြည်ထောင်စုဝန်ကြီးနှင့်အဖွဲ့သည် တိုင်းဒေသကြီးအစိုးရ ဘတ်ဂျက်ဖြင့် ဆောင်ရွက်နေသည့် စစ်ကိုင်းမြို့နယ် ပိုးတန်းအားကစားကွင်းအတွင်း ခရိုင်အားကစားရုံ တည်ဆောက်ရေးလုပ်ငန်းခွင်ကို လှည့်လည်ကြည့်ရှုခဲ့ကြသည်။