စစ်ကိုင်းတိုင်းဒေသကြီး၊ စစ်ကိုင်းပြည်သူ့ဆေးရုံကြီးတွင် အမျိုးသမီးများအား သားအိမ်ခေါင်းကင်ဆာ ရောဂါရှာဖွေခြင်းနှင့် အခမဲ့ ကာကွယ်ကုသပေးခြင်း လုပ်ငန်းများကို ပြီးခဲ့သည့် မေလ ၂၀ ရက်နေ့မှ စတင်၍ ကွင်းဆင်းဆောင်ရွက်ပေးလျက်ရှိကြောင်း သိရသည်။
ဘယ်သူတွေ လာရောက်စစ်ဆေးနိုင်မလဲ အဆိုပါ အခမဲ့ကျန်းမာရေး စောင့်ရှောက်မှုအစီအစဉ်တွင် အသက် (၃၅) နှစ်မှ (၄၉) နှစ်ကြားရှိ အမျိုးသမီးများအားလုံး လာရောက်ပြသ စစ်ဆေးနိုင်မည်ဖြစ်သည်။
ကုသပေးမည့် အစီအစဉ်
ဆေးရုံကြီးတွင် လာရောက်စစ်ဆေးမှုများ ပြုလုပ်စဉ် သားအိမ်ခေါင်းကင်ဆာမဖြစ်မီ ကြိုတင်လက္ခဏာများ (Pre-cancerous lesions) ရှာဖွေတွေ့ရှိပါက (ခွဲစိတ်ကုသမှု ခံယူရန် မလိုသေးသည့်အဆင့်တွင်) ရောဂါအမြစ်ပြတ် ချက်ချင်းပျောက်ကင်းအောင် ကုသမှုများကိုပါ တစ်ပါတည်း အခမဲ့ ဆောင်ရွက်ပေးသွားမည်ဖြစ်ကြောင်း ထုတ်ပြန်ထားသည်။
အထူးသတိပြုရန် ကျန်းမာရေးအသိ
သားအိမ်ခေါင်းကင်ဆာရောဂါသည် စောစီးစွာ စစ်ဆေးတွေ့ရှိပါက ရာနှုန်းပြည့်နီးပါး ပြန်လည်ပျောက်ကင်းအောင် ကုသနိုင်သော ရောဂါမျိုး ဖြစ်သည်။ ယခုအခါတွင်လည်း အဆိုပါရောဂါကို ကြိုတင်ကာကွယ်နိုင်ရန်အတွက် အသက်အရွယ် သတ်မှတ်ချက်အလိုက် HPV ကာကွယ်ဆေး (Human Papillomavirus Vaccine) ကို ပြည်သူ့ကျန်းမာရေးကဏ္ဍအနေဖြင့် ထိုးနှံပေးမှုများပါ တစ်ပြိုင်တည်း လုပ်ဆောင်ပေးလျက်ရှိကြောင်း သိရသည်။