စစ်ကိုင်းတိုင်းဒေသကြီးတွင် ယခုနှစ်မဟာသင်္ကြန်ပွဲတော်ကို စည်ကားသိုက်မြိုက်စွာကျင်းပမည်ဖြစ်ပြီး နိုင်ငံကျော် ရုပ်ရှင်၊ ဗွီဒီယိုသရုပ်ဆောင်နှင့် အဆိုတော်၊ မင်းသား၊ မင်းသမီးများ၏ ဖျော်ဖြေတင်ဆက်မှုများပါ ထည့်သွင်းသွားမည်ဖြစ်ကြောင်း သိရသည်။
မတ်လ (၁၅) ရက်က တိုင်းဒေသကြီး အစိုးရအဖွဲ့ရုံးတွင်ပြုလုပ်သည့် ၂၀၂၃ ခုနှစ် မြန်မာ့ရိုးရာ မဟာသင်္ကြန်ပွဲတော် ကျင်းပရေး လုပ်ငန်းညှိနှိုင်းအစည်းအဝေးတွင် တိုင်းဒေသကြီး ဝန်ကြီးချုပ် ဦးမြတ်ကျော်က ပြောကြားခဲ့ခြင်းဖြစ်သည်။
နစကအနေဖြင့် ရန်ကုန်၊ မန္တလေး အပါအဝင် မြို့ကြီးများတွင် မြန်မာ့ရိုးရာ သင်္ကြန်ပွဲတော်များ ကျင်းပပြုလုပ်သွားရန် စီစဉ်နေခြင်းဖြစ်ပြီး တိုင်းနှင့်ပြည်နယ်အသီးသီးတွင်လည်း အလားတူ သင်္ကြန်ပွဲအခမ်းအနားများ ကျင်းပရန် စီစဉ်နေခြင်း ဖြစ်သည်။
ယင်းသို့ စီစဉ်နေသည့်အထဲတွင် PDF များ ၊ ဒေသကာကွယ်ရေးတပ်များနှင့် စစ်ရေးအခြေအနေ တင်းမာမှုများ မြင့်တက်နေပြီး မြို့နယ်အများအပြားကို စစ်အုပ်ချုပ်ရေး ကြေညာထားရသည့် စစ်ကိုင်းတိုင်းတွင်ပါ မဟာသင်္ကြန်ပွဲတော်ကို စည်ကားသိုက်မြိုက်စွာကျင်းပရန် ပြင်ဆင်နေကြောင်း တိုင်းဒေသကြီးဝန်ကြီးချုပ်က ထုတ်ဖော်ပြောဆိုလာခြင်းလည်း ဖြစ်သည်။
စစ်ကိုင်းတိုင်းအတွင်း ပြီးခဲ့သည့် ၂၀၁၈ ခုနှစ် ၊ ၂၀၁၉ ခုနှစ်တို့တွင် ပြုလုပ်ခဲ့သည့် ချင်းတွင်းသင်္ကြန်မှာ မြန်မာနိုင်ငံ၏ သင်္ကြန်ပွဲတော်များ၌ အထင်ကရ ပွဲတော်တစ်ခု ဖြစ်ခဲ့ပြီး နိုင်ငံတကာနှင့် ကမ္ဘာလှည့် ခရီးသွားများ၏ အာရုံစိုက်ခြင်းကိုလည်း ခံခဲ့ရသည့်ပွဲတော်တစ်ခု ဖြစ်ခဲ့သည်။
အဆိုပါ ချင်းတွင်းသင်္ကြန်ကို ၂၀၂၀ ခုနှစ်မှ စတင်ရပ်နားခဲ့ပြီး ပြီးခဲ့သည့်နှစ်သင်္ကြန်အထိ ပြည်သူအများစုကပျော်ပွဲရွှင်ပွဲများနှင့် ခပ်ဝေးဝေးနေခဲ့ကြရခြင်းလည်း ဖြစ်သည်။
ယခုနှစ် သင်္ကြန်ပွဲတော်ကို ပြည်သူများ၏ မွန်းကြပ်မှုများပြေပျောက်ပြီး စိတ်လန်းဆန်းပျော်ရွှင်အောင် အကောင်းဆုံး စီမံဆောင်ရွက်ပေးကြရန်လည်း စစ်ကိုင်းတိုင်း အစိုးရအဖွဲ့ တာဝန်ရှိသူများကို တိုင်းဝန်ကြီးချုပ် ဦးမြတ်ကျော်က မှာကြားခဲ့ကြောင်း သိရသည်။
