ပဲခူးတိုင်းအတွင်း၌ ကုန်ထုတ်လုပ်မှုစဉ်ဆက်မပြ-တ်တိုး တက်စေရေးအတွက် စက်ရုံများအလိုက်တစ်ပိုင်တစ်နိုင်ဆိုလာတပ်ဆင်သုံးစွဲနိုင်ရန် ဆောင်ရွက်ပေးရမည်ဟု ပဲခူးတိုင်းဝန်ကြီးချုပ်ဦးမျိုးဆွေဝင်းမှ ပဲခူးတိုင်းဒေသကြီးရင်းနှီးမြှုပ်နှံမှုကော်မတီ၏ အစည်းအဝေးအမှတ်စဉ်(၄/၂၀၂၅)၌ ပြောကြားခဲ့ခြင်းဖြစ်သည်။
စက်မှုကဏ္ဍတိုးတက်မှုနှင့်အတူ လျှပ်စစ်စွမ်းအင်ကဏ္ဍ၊ မွေးမြူရေးနှင့်ရေလုပ်ငန်းကဏ္ဍ၊ လယ်ယာကဏ္ဍများ၌ ရင်းနှီးမြှုပ်နှံမှုတိုးတက်အောင်ဆောင်ရွက်ရမည်ဖြစ်ကာ ပြည်တွင်း/ ပြည်ပ ရင်းနှီးမြှုပ်နှံမှုများတွင် ဒေသထွက်ကုန်ကြမ်းပစ္စည်းများကိုအခြေခံ၍ ပြည်ပသို့ ကုန်ချောပစ္စည်းတင်ပို့နိုင်ရန် ဒေသတွင်းကုန်ကြမ်းပစ္စည်းများ၏ ထုတ်လုပ်မှုအရည်အသွေးကို ခေတ်နှင့်အညီဘက်စုံမြှင့်တင်ပေးရမည်ဟု ပြောသည်။
ထို့ပြင် လယ်ယာကဏ္ဍအတွက် ဓာတ်မြေဩဇာသွင်းအားစုထုတ်လုပ်သည့် ကုမ္ပဏီများလာရောက်ရင်းနှီးမြှုပ်နှံနိုင်ရေးအတွက်လည်း ချိတ်ဆက်ဆောင်ရွက်ရမည်ဖြစ်ကာ စက်မှုလုပ်ငန်းများမှထွက်ရှိသည့် အန္တရာယ်ရှိနိုင်သော စွန့်ပစ်ပစ္စည်းများကို သဘာဝပတ်ဝန်းကျင်ထိန်းသိမ်းရေးဦးစီးဌာန၏ သတ်မှတ်နည်းလမ်းအတိုင်း ဖျ-က်ဆီးစွန့်ပစ်ရမည်ဟု ပြောသည်။
ထို့အတူ ပဲခူး၊ သနပ်ပင်၊ ကဝ၊ ဝေါမြို့နယ်တို့သည် ငါးမွေးကန်များ၊ သဘာဝချောင်းမြောင်းအင်းအိုင်ပေါများသဖြင့် ရေထွက်ကုန်ပစ္စည်းများအား တန်ဖိုးမြှင့်ထုတ် ကုန်အဖြစ်ထုတ်လုပ်နိုင်သော အအေးခန်းစက်ရုံများ၊ ဆီသွပ်ဗူးစက်ရုံများ လာရောက်ဆောင်ရွက်နိုင်ရေးအတွက် ဖိတ်ခေါ်ဆောင်ရွက်ရမှာဖြစ်ကာ ဒေသတွင်း အလုပ်အကိုင်အခွင့်အလမ်းများစဉ်ဆက်မပြတ် တိုးတက်စေရေးနှင့် ထိုက်သင့်သည့်လုပ်ခလစာရရှိရေးတို့အတွက် ကြိုးစားဆောင်ရွက်ကြရမည်ဟု ပြောကြားခဲ့သည်။
ပဲခူးတိုင်းအတွင်း ၂၀၂၁ ခုနှစ်၊ ဖေဖော်ဝါရီ ၁ ရက်မှ ယနေ့အထိ နိုင်ငံခြားရင်းနှီးမြှုပ်နှံမှု အမေရိကန်ဒေါ်လာ(၂၁၂ ဒသမ ၅၆၅)သန်း၊ နိုင်ငံသားရင်းနှီးမြှုပ်နှံမှု ငွေကျပ်(၂၁၂,၈၀၀ ဒသမ ၇၉၅)သန်းရှိခဲ့ကာ အလုပ်သမား(၁၄,၀၆၃)ဦးအလုပ်အကိုင်များရရှိခဲ့သည်။