နစက ဥက္ကဋ္ဌ၊ ဝန်ကြီးချုပ်၊ ဗိုလ်ချုပ်မှူးကြီးမင်းအောင်လှိုင်မှ ဇန်နဝါရီ ၁၅ ရက်(ယနေ့)တွင် ကျရောက်သည့် (၇၁)နှစ်မြောက် ကယားပြည်နယ်နေ့အခမ်းအနားသို့ပေးပို့သည့် သဝဏ်လွှာ၌ရေးသားပြောဆိုခဲ့ခြင်းဖြစ်သည်။
မြန်မာ့ငြိမ်းချမ်းရေးလုပ်ငန်းစဉ်တွင် ဆက်လက်ဆွေးနွေးညှိနှိုင်းရန်များ ကျန်ရှိနေဆဲဖြစ်ကာ တိုးတက်မှုရှိနေသည့် ငြိမ်းချမ်းရေးလမ်းစများပေါ် တိုင်းရင်းသားအဖွဲ့အစည်းများနှင့်သက်ဆိုင်သူအားလုံးက နိုင်ငံနှင့်ပြည်သူအကျိုးကိုရှေးရှု၍ အပြုသဘောဖြင့် ပူးပေါင်းညှိနှိုင်းဆောင်ရွက်ခြင်းသည် ငြိမ်းချမ်းရေးခရီးကို ပိုမိုထိရောက်စေနိုင်မည်ဟု ဆိုသည်။
“ပဋိပက္ခတွေနဲ့ သံသရာလည်နေတဲ့ နိုင်ငံတိုင်းအတွက် ငြိမ်းချမ်းရေးခရီးက အခက်အခဲအကျပ်အတည်းတွေ ရှိကြစမြဲဖြစ်ပါတယ်”ဟု နစက ဥက္ကဋ္ဌက သဝဏ်လွှာ၌ရေးသားပြောဆိုခဲ့သည်။
ထို့ကြောင့် ပါဝင်ပတ်သက်သူအားလုံး၏ ငြိမ်းချမ်းရေးအား အမှန်တကယ်လိုလားသည့်ဆန္ဒ၊နည်းလမ်းမှန်ကန်မှု၊ငြိမ်းချမ်းစွာစေ့စပ်ညှိနှိုင်းလိုမှု၊စိတ်ရှည်သည်းခံမှု၊တစိုက်မတ်မတ်ကြိုးစားအားထုတ်မှုများရှိမှသာ ငြိမ်းချမ်းရေးလိုရာခရီးပေါက်မည်ဟု ဆိုသည်။
ငြိမ်းချမ်းရေး လုပ်ငန်းစဉ်များသည် နိုင်ငံရေး၏ အစိတ်အပိုင်းဖြစ်သော်လည်း နိုင်ငံရေး၏ လက်နက်တစ်ခုမဟုတ်ဘဲ နိုင်ငံတည်ဆောက်ရေးနှင့် အမျိုးသားအကျိုးစီးပွားအတွက် အဓိကဦးတည်လုပ်ဆောင်မှသာ အနာဂတ်နိုင်ငံတည်ဆောက်ရေးကို အထောက်အကူဖြစ်စေမည်ဟု ဆိုသည်။
လက်နက်ကိုင်ပဋိပက္ခများရှိနေသည့် ဒေသများတွင် ပဋိပက္ခများ၏အကျိုးဆက်များကို ယင်းဒေသမှ ပြည်သူများတိုက်ရိုက်ခံစားနေကြပြီး ကျန်ပြည်သူများက သွယ်ဝိုက်၍ ခံစားနေကြရသည်ဟု ဆိုသည်။
“လက်နက်ကိုင်တိုက်ခိုက်မှုတွေကြောင့် လူ့အဖွဲ့အစည်းတွေနဲ့သက်ဆိုင်ရာဒေသဖွံ့ဖြိုးတိုးတက်ရေးကို အတားအဆီးဖြစ်စေတဲ့အပြင် ကလေးငယ်တွေရဲ့ ပညာရေး၊ကျန်းမာရေးစောင့်ရှောက်မှုတွေကိုလည်းခက်ခဲစေပါတယ်”ဟု နစက ဥက္ကဋ္ဌက သဝဏ်လွှာ၌ရေးသားပြောဆိုခဲ့သည်။
ပဋိပက္ခများကြောင့် စီးပွားရေးကျဆင်းကာ ဆင်းရဲမှုနှုန်းမြင့်တက်စေခြင်းမှာ နိုင်ငံ၏အနာဂတ်အတွက် ရင်လေးဖွယ်ရာဖြစ်သည်ကို သတိထားလုပ်ဆောင်ကြရမည်ဟု သဝဏ်လွှာတွင်ရေးသားတိုက်တွန်းထားသည်။
တိုင်းရင်းသားပြည်သူအားလုံး၏ ဆန္ဒနှင့်အညီ ဒီမိုကရေစီနှင့်ဖက်ဒရယ်စနစ်ကိုအခြေခံသည့် ပြည်ထောင်စုတည်ဆောက်နိုင်ရန် နိုင်ငံတော်အစိုးရ၊တပ်မတော်တို့နှင့်အတူ နိုင်ငံ့ဝန်ထမ်းများအားလုံး၊အရပ်ဘက်အဖွဲ့အစည်းများအားလုံး၊တိုင်းရင်းသားပြည်သူတစ်ရပ်လုံးက ဝိုင်းဝန်းပူးပေါင်းဆောင်ရွက်မှသာ မျှော်မှန်းသည့်ပန်းတိုင်ကိုအချိန်တိုအတွင်း အောင်အောင်မြင်မြင်ရောက်ရှိနိုင်မည်ဟု ဆိုသည်။
ထိုပန်းတိုင်သို့ရောက်ရှိရန် အဓိကကျသည့်အချက်မှာ “ပြည့်အင်အားသည် ပြည်တွင်းမှာသာရှိသည်” ဆိုသည့်အတိုင်း မိမိတို့တိုင်းရင်းသားအားလုံး မျိုးချစ်စိတ်ဓာတ်၊ပြည်ထောင်စုစိတ် ဓာတ်တို့ဖြင့် စည်းလုံးညီညွတ်ကြရန်နှင့်နိုင်ငံတော်ကို ဘက်ပေါင်းစုံမှထိန်းသိမ်းကာကွယ်စောင့်ရှောက်ရန် လိုအပ်မည်ဟုလည်း သဝဏ် လွှာ၌ရေးသားထားသည်။
လတ်တလောအခြေအနေတွင် ပြည်ပနိုင်ငံများ၏ သွေးထိုးလှုံ့ဆော်မှုများ၊သဘောထားကွဲလွဲပြီး နိုင်ငံနှင့်ပြည်သူအကျိုးကို မျက်ကွယ်ပြုလုပ်ဆောင်နေသည့် အချို့အဖွဲ့အစည်းများ၏ ဆောင်ရွက်မှုများ၊ကျင့်ဝတ်ဖောက်ဖျက်ပြီး နိုင်ငံတော်ကို
အန္တရာယ်ချောက်ကမ်းပါးထဲသို့ဆွဲချနေသည့် မဟုတ်မမှန်လုပ်ကြံသတင်းများ၊သဘောထားမမှန်သည့် အချို့တိုင်းရင်းသားလက်နက်ကိုင်အဖွဲ့ အစည်းများနှင့် NUG, CRPH, PDF အစရှိသည့် အကြမ်းဖက်အဖွဲ့အစည်းများ၏ သွေးဆောင်စည်းရုံးမှုနှင့် အကြမ်းဖက်လုပ်ရပ်များကြောင့် ဒေသအချို့ရှိ ပြည်သူလူထုကြားအသိအမြင်များမှားပြီး ညီညွတ်မှုများပြိုကွဲကာ
မငြိမ်းမချမ်းဖြစ်နေသည်ဟု ဆိုသည်။
“အဲဒီအခြေအနေတွေရဲ့ အကျိုးဆက်ဟာ နိုင်ငံတော်ရဲ့ကောင်းကျိုးကို ဖော်ဆောင်နိုင်မှာ မဟုတ်သလို နိုင်ငံတော်နဲ့ပြည်သူအားလုံးအတွက် အန္တရာယ်ဖြစ်စေနိုင်တာကြောင့် သတိထားဆင်ခြင်ကြဖို့လိုအပ်ပါတယ်”ဟု နစက ဥက္ကဋ္ဌက သဝဏ်လွှာ၌ရေးသားပြောဆိုခဲ့သည်၊
ထို့ကြောင့် ပြည်ထောင်စုကြီးအဓွန့်ရှည်တည်တံ့ခိုင်မြဲရန်
ဒို့တာဝန်အရေးသုံးပါးကို ဦးထိပ်ထားပြီး တိုင်းရင်းသားပြည်သူများကြား တိုင်းရင်းသားစည်းလုံးညီညွတ်ရေးစိတ်ဓာတ်နှင့်ပြည်ထောင်စုစိတ်ဓာတ်အခြေခံကောင်းများ ပွားများဖြစ်ထွန်းရန် ကြိုးပမ်းဆောင်ရွက်သွားကြရမည်ဟု သဝဏ်လွှာ၌ တိုက်တွန်းရေးသားထားသည်။