ငလျင်ဒဏ်သင့်ဒေသများအတွက် ကူညီကယ်ဆယ်ရေးနှင့် ပြန်လည်တည်ဆောက်ရေး လုပ်ငန်းများဆောင်ရွက်ရန် နေပြည်တော်၊ တပေါင်းကွင်း၌ ယနေ့ ဧပြီ ၁ ရက်မွန်းတည့် ၁၂ နာရီခွဲက အလှူငွေပေး အပ်ပွဲအခမ်းအနားကျင်းပရာ နစက ဥက္ကဋ္ဌ၊ နိုင်ငံ တော်ဝန်ကြီးချုပ်၊ ဗိုလ်ချုပ်မှူးကြီးမင်းအောင်လှိုင်တက်ရောက်၍ အလှူငွေများကိုလက်ခံရယူခဲ့သည်။
အဆိုပါအခမ်းအနားတွင် စေတနာရှင်၊ အလှူရှင်များ၏ လှူဒါန်းမှု ငွေသား(၁၀၄ ဒသမ ၄၄)ဘီလီယံ၊ အလှူပစ္စည်း(၁၂ ဒသမ ၄)ဘီလီယံ(စုစုပေါင်း ၁၁၆ ဒသ မ ၈၄ ဘီလီယံ)လက်ခံရရှိခဲ့ခြင်းဖြစ်သည်။
နစက ဥက္ကဋ္ဌ က အခမ်းအနားတွင် ကျေးဇူးတင်စကားပြောကြားစဉ် မြန်မာနိုင်ငံတွင်လှုပ်ခတ်ခဲ့သည့် ငလျင်ကြီး(၁၈)ကြိမ်အနက် ၁၉၁၂ ခုနှစ်၊ မေ ၁၃ ရက်တွင်လှုပ်ခတ်ခဲ့သည့် ပြင်းအား (၈)ရစ်(ခ်)တာစကေးရှိ မေမြို့ငလျင်သည် အပြင်းထန်ဆုံးဖြစ်ပြီး ဒုတိယအပြင်းထန်ဆုံးမှာ လက်ရှိဖြစ်ပေါ်ခဲ့သည့် ပြင်းအား (၇ ဒသမ ၇)ရစ် (ခ်)တာစကေးရှိငလျင်ဖြစ်ကြောင်း ထည့်သွင်းပြောကြားခဲ့သည်။
ထို့ကြောင့် ငလျင်နှင့်ပတ်သက်ပါက သင်ခန်းစာများရှိပြီးဖြစ်၍ ငလျင်ကြောင့်ဖြစ်ပေါ်လာသည့် ဖြစ်ပျက်မှုတွေကိုသတိပြုရန်၊ သင်ခန်းစာရယူနိုင်ရန်နှင့် အင်ဂျင်နီယာရှုထောင့်အရ အဆောက်အဦများတည်ဆောက်ရာတွင် စနစ်တကျတွက်ချက်ဆောက် လုပ်ရန်တို့ကိုသင်ခန်းစာဖော်ထုတ်ရန်လိုအပ်ကြောင်းကိုလည်း ပြောကြားသည်။
အလားတူ နိုင်ငံတော်အနေဖြင့် ဘီလီယံ(၅၀၀)မတည်၍ ကူညီကယ်ဆယ်ရေးလုပ်ငန်းများကို စတင်ဆောင်ရွက်နေပြီဖြစ်ကာ အင်တိုက်အားတိုက် ဆက်လက်ဆောင်ရွက်နေကြောင်း ပြောကြားသည်။
အဆောက်အဦများ ဆောက်လုပ်ရာတွင် ဖြစ်ပေါ်လာနိုင်မည့် ငလျင်ဒဏ်ကိုထည့်သွင်းစဉ်းစားခြင်းမရှိဘဲဆောင်ရွက်ခဲ့ခြင်းများကြောင့် မလိုလားအပ်ဘဲသေဆုံးခဲ့ရမှုများ၊ ဒဏ်ရာရရှိခဲ့ရမှုများနှင့် အပျောက်အဆုံးများရှိခဲ့ပြီး ဧပြီ ၁ ရက် မနက် ၈ နာရီအထိ စာရင်းကောက်ယူမှုများအရ ငလျင်ဒဏ်ကြောင့် သေဆုံးသူ(၂၇၁၉)ဦး၊ ထိခိုက်ဒဏ်ရာရသူ(၄၅၂၁)ဦး၊ ပျောက်ဆုံးသူ(၄၄၁)ဦးရှိကြောင်းလည်း ပြောကြားခဲ့သည်။