ငလျင်ဘေးသင့်ခဲ့ရသည့် နေပြည်တော်၊ စစ်ကိုင်းနှင့် မန္တလေးမြို့များအတွင်း ဝန်ထမ်းအိမ်ရာများသို့ ဈေးကားများဖြင့် စားသောက်ကုန်မျိုးစုံကို သက်သာသောဈေးနှုန်းဖြင့် လှည့်လည်ရောင်းချပေးလျက်ရှိကြောင်း သိရသည်။
ယင်းသို့ရောင်းချမှုကို စီးပွားရေးနှင့် ကူးသန်းရောင်းဝယ် ရေးဝန်ကြီးဌာနနှင့် မြန်မာနိုင်ငံကုန်သည်များနှင့် စက်မှုလက်မှုလုပ်ငန်းရှင်များအသင်းချုပ် (UMFCCI)တို့၏ စီစဉ်မှုဖြင့် ပြုလုပ်ခြင်း ဖြစ်သည်။
ယင်းစျေးကားများတွင် ဆန်၊ ဆီ၊ ဆား၊ ပဲ၊ ငါးပိနှင့် ကုန်မျိုးစုံပါဝင်ပြီး ငလျင်ဒဏ်သင့်ဝန်ထမ်း အိမ်ရာများသို့ မတ် (၃၀) ရက်မှစ၍ အိမ်တိုင်ရာရောက် သွားရောက်ကာ ရောင်းချပေးနေပြီး တလနီးပါး ကြာမြင့်ခဲ့ပြီလည်းဖြစ်သည်။
ရောင်းချပေးမှုအရ မတ် (၃၀) ရက်မှ ဧပြီ (၂၉) ရက်အထိ ရေဆင်းစိုက်ပျိုးရေး တက္ကသိုလ်၊ နေပြည်တော်ဘူတာကြီး၊ စက်ခေါင်းအလုပ်ရုံဌာနဝန်ထမ်းအိမ်ရာ၊ သူနာပြုသင်တန်းကျောင်း၊ ဥတ္တရသီရိ ဆေးရုံဝန်ထမ်း အိမ်ရာများ၊ ပိတောက်အိမ်ရာ၊ ကံ့ကော်အိမ်ရာ၊ ဓနသိဒ္ဓိရပ်ကွက် အိမ်ရာ၊ ဗလသိဒ္ဓိရပ်ကွက်အိမ်ရာ၊ ဉာဏသိဒ္ဓိရပ်ကွက်အိမ်ရာ၊ သုခသိဒ္ဓိရပ်ကွက်အိမ်ရာ၊ ဝဏ္ဏသိဒ္ဓိရပ်ကွက်အိမ်ရာ၊ ပညာရေးဝန်ထမ်းအိမ်ရာ၊ လယ်ဝေးမြို့ယာယီကယ်ဆယ်ရေးစခန်း၊ ပို့ဆောင်ရေး နှင့်ဆက်သွယ်ရေးဝန်ကြီးဌာန၊ ကျန်းမာရေးလူ့စွမ်းအား အရင်းအမြစ်ဦးစီးဌာန၊ စိုက်ပျိုးရေးသုတေသနဦးစီးဌာန၊ စိုက်ပျိုးရေးဦးစီးဌာန၊ တပ်ကုန်းမြို့ရှိ အမှတ်(၁၀၉) တပ်ရင်းနှင့် ခုတင် (၁၀၀)ဆေးရုံ၊ နေပြည်တော်ကောင်စီဝင်းအတွင်းရှိ တိုင်းခရိုင် အဆင့်ဌာနဆိုင်ရာများ၊ မြန်မာနိုင်ငံရဲတပ်ဖွဲ့တိုင်းရုံးနှင့်ရဲတပ်ရင်းများ၊ သယံဇာတနှင့်သဘာဝပတ်ဝန်းကျင် ထိန်းသိမ်းရေးဝန်ကြီးဌာနတို့ရှိ ဝန်ထမ်းများကိုလည်း ရောင်းချပေးခဲ့သည်ဟု ဆိုသည်။
ထိုနည်းတူ စစ်ကိုင်းမြို့တွင် ဈေးကားလေးစီးဖြင့် ရောင်းချပေးလျက်ရှိရာ ယနေ့အထိ ဆန် (၂၄) ပြည်ပါ (ရွှေဝါထွန်း) (၂၉၄) အိတ်၊ စားအုန်းဆီ (၄,၇၄၅) ပိဿာ၊ ဆား (၅၇) ပိဿာ၊ ကုလားပဲ (၂၀)ကျပ် သားပါ (၂၉၄) ဘူး၊ ငါးပိ (၁၈) ပိဿာ၊ ကြက်သွန်နီ (၅၄၈) ပိဿာ၊ အသားတု (၂၄) ပိဿာ၊ ကြက်ဥ၊ ဘဲဥများ၊ ငါးနီတူခြောက်များ၊ ပုစွန်ခြောက်များကို သက်သာသောဈေးနှုန်းများဖြင့် ရောင်းချပေးခဲ့ပြီး မန္တလေးမြို့တွင် ဈေးကားလေးစီးဖြင့် လှည့်လည်ရောင်းချပေးလျက်ရှိရာ ယနေ့အထိ ဆန် (၂၄) ပြည်ပါ (မနောသုခ) အိတ် (၅၈၀) ၊ စားအုန်းဆီပိဿာ (၅၅,၀၀၀) ၊ ဆား (၁၀၅) ပိဿာ၊ ကုလားပဲ (၂၅) ကျပ်သားပါ (၈၆) ထုပ်၊ ငါးပိ ပိဿာ (၈၀)၊ ငါးနီတူခြောက်၊ အာပဲ့ခြောက်၊ ကြက်ဥ၊ ဘဲဥများ၊ ခေါက်ဆွဲခြောက်ထုပ်များကို ရောင်းချပေးခဲ့ပြီး နေ့စဉ်ဆက်လက် ရောင်းချပေးသွားမည်ဖြစ်ကြောင်းလည်း သိရသည်။