ငလျင်ဒဏ်သင့် တုကီးယေးနှင့် ဆီးရီးယားနိုင်ငံများသို့ ကမ္ဘာ့နိုင်ငံကြီးများက အကူအညီများ ပေးပို့

ပါရီ၊ ဇန်နဝါရီ ၇

တုကီယေးနှင့် ဆီးရီးယားတွင် လူပေါင်း သုံးထောင်ကျော် သေဆုံးစေခဲ့သော ငလျင်အပြင်းစား လှုပ်ခတ်ပြီးနောက် ကမ္ဘာတစ်ဝန်းရှိ နိုင်ငံများသည် တနင်္လာနေ့တွင် အကူအညီများနှင့် ကယ်ဆယ်ရေးလုပ်သားများကို အလျင်အမြန် စေလွှတ်နိုင်ရန် ဆော်ဩစည်းရုံးခဲ့ကြကြောင်း သိရသည်။

ဥရောပသမဂ္ဂသည် ငလျင်ဒဏ်သင့် တုကီးယေးက ၎င်းထံမှ အကူအညီများ တောင်းခံခဲ့ပြီးနောက် စေလွှတ်ရန်အတွက် ရှာဖွေရေးနှင့် ကယ်ဆယ်ရေးအဖွဲ့ ၁၀ ဖွဲ့ကို စုစည်းထားပြီဖြစ်ကြောင်း အီးယူ နိုင်ငံခြားရေးမူဝါဒ အကြီးအကဲ ဂျိုးဇက်ဘာရယ် နှင့် အီးယူ ကပ်ကာလ စီမံခန့်ခွဲရေး ကော်မရှင်အဖွဲ့ဝင် ယန်နက် လနာချိ့ချ်က ပြောကြားခဲ့သည်။

ကုလသမဂ္ဂအဖွဲ့များသည် ငလျင်ဖြစ်ပွားရာနေရာများတွင် လိုအပ်သည်များကို အကဲဖြတ်ကာ အကူအညီများ ပေးအပ်နေကြောင်း၊ အခြားနိုင်ငံများကိုလည်း ငလျင်ကြောင့် ဒုက္ခရောက်နေသော မိသားစုများအား ကူညီပေးရန် အားကိုးပါကြောင်း ကုလအတွင်းရေးမှူးချုပ် ဂူတာရက်စ်က ပြောခဲ့သည်။

ငလျင်ဒဏ်နှင့် အကျွမ်းတဝင်ရှိနေသော ဂျပန််နိုင်ငံသည်လည်း သဘာဝဘေးအန္တရာယ် ကယ်ဆယ်ရေး အဖွဲ့အား တုကီယေးသို့ စေလွှတ်ထားပြီ ဖြစ်ကြောင်း သိရသည်။

အိန္ဒိယသည် ငလျင်ဒဏ်သင့် နေရာများသို့ ကယ်ဆယ်ရေးခွေးများနှင့် စက်ရိယာများ အပါအဝင် အမှုထမ်း ၁၀၀ ပါရှိသည့် သဘာဝဘေးအန္တရာယ် တုံ့ပြန်ရေးတပ်ဖွဲ့ နှစ်ဖွဲ့ကို စေလွှတ်ရန် အဆင့်ပြင်ထားပြီ ဖြစ်ကြောင်း အိန္ဒိယနိုင်ငံခြားရေးဝန်ကြီးဌာနက ပြောခဲ့သည်။

အမေရိကန် အမျိုးသားလုံခြုံရေး ပြောရေးဆိုခွင့်ရှိသူ ဂျွန်ခါဘီက အမေရိကသည် တစ်ဖွဲ့လျှင် လူ ၇၉ ဦးစီ ပါဝင်သည့် ရှာဖွေရေးနှင့် ကယ်ဆယ်ရေးအဖွဲ့ နှစ်ဖွဲ့ကို စေလွှတ်ထားပြီဟု ထုတ်ပြန်ခဲ့သည်။

ရုရှားသမ္မတ ပူတင်သည် ဆီးရီးယား သမ္မတ၊ တုကီယေး သမ္မတတို့နှင့် ဖုန်းပြောရာတွင် နှစ်နိုင်ငံစလုံးသို့ ရုရှားအဖွဲ့များ စေလွှတ်မည်ဟု ကတိပြုခဲ့သည်။ ဆီရီးယားတွင် တပ်စွဲထားသော ရုရှားစစ်ဘက်ဝန်ထမ်း ၃၀၀ သည်လည်း ရှင်းလင်းရေးတွင် ပါဝင်ကူညီနေကြောင်း ကာကွယ်ရေးဝန်ကြီးဌာနက ပြောကြားထားသည်။

ဗြိတိန်သည် စက်ကိရိယာများ၊ ကယ်ဆယ်ရေးခွေးများနှင့် ရှာဖွေကယ်ဆယ်ရေး အထူးကျွမ်းကျင်သူ ၇၆ ဦး ပါဝင်သည့် အဖွဲ့တစ်ဖွဲ့ကို စေလွှတ်ထားကြောင်း နိုင်ငံခြားရေးဝန်ကြီး ဂျိမ်းစ် ကလဲဗလီးက ပြောကြားခဲ့သည်။

ပိုလန် မီးသတ်သမားများကို တုကီယေးရှိ ဂဇီရန်းတစ်ပ် မြို့သို့ စေလွှတ်ထားပြီး ၎င်းတို့သည် နေရာ နှစ်နေရာတွင် တစ်ရက်လျှင် ၂၄ နာရီ မနားတမ်း ကူညီသွားမည်ဖြစ်ကြောင်း ပိုလန် နိုင်ငံ ရှိ ဝါဆော ပြည်နယ်မီးသတ်တပ်ဖွဲ့မှူး အန်ဂျေ ဘတ်ကိုဝီရက်က ပြောခဲ့သည်။

အာရပ်စော်ဘွားများ ပြည်ထောင်စုသည် ရှာဖွေရေးနှင့် ကယ်ဆယ်ရေးအဖွဲ့များ၊ အရေးပေါ် ကယ်ဆယ်ရေးပစ္စည်းများနှင့် အရေးပေါ်အကူအညီများ အပါအဝင် ဆီးရီးယားသို့ အမေရိကန်ဒေါ်လာ ၁၃ ဒသမ ၆ သန်းခန့် တန်ဖိုးရှိသော လူသားချင်းစာနာမှု အကူအညီများအား ပေးပို့ရန် ကတိပြုခဲ့သည်။

Source: CNN