လူ ၁၇၉ ဦးေ-သဆုံးခဲ့ရသည့် နိုင်ငံ၏ အဆိုးဝါးဆုံးလေကြောင်းမတော်တဆမှုဖြစ်သော ဂျေဂျူးလေယာဉ်ပျ-က်ကျမှုကို စုံစမ်းစစ်ဆေးနေသူများက ၎င်းတို့အနေဖြင့် ပြန်လည်ရယူထားသည့် လေယာဉ်၏ ဘလက်ဘောက်စ်နှစ်ခုအနက် တစ်ခုကို အမေရိကသို့ ပို့ဆောင်စစ်ဆေးသွားမည်ဟု ဇန်နဝါရီလ ၁ ရက်တွင် ပြောကြားခဲ့သည်။
လူ ၁၈၁ ဦးဖြင့် ထိုင်းနိုင်ငံမှ တောင်ကိုရီးယားနိုင်ငံကို ပျံသန်းခဲ့သော လေယာဉ်သည် ဘေးဒုက္ခကြုံနေကြောင်း ဆက်သွယ်အသိပေးခဲ့ပြီး ဝမ်းဗိုက်ဖြင့် ဆင်းသက်ခဲ့ရာတွင် ပြေးလမ်းကိုကျော်သွားကာ အတားအဆီးတံတိုင်းတစ်ခုနှင့် တိုက်မိပြီး ပေါက်ကွဲမီးလောင်ခဲ့သည်။ ယင်းဖြစ်စဉ်ကြောင့် လေယာဉ်အမှုထမ်းနှစ်ဦးမှအပ လေယာဉ်ပေါ်ပါသူအားလုံး ေ-သဆုံးခဲ့ရသည်။
၂၀၂၄ ခုနှစ် ဒီဇင်ဘာ ၂၄ ရက်က နိုင်ငံ၏ အနောက်တောင်ပိုင်း Muan မြို့လေဆိပ်တွင် ယင်းအဖြစ်ဆိုးဖြစ်ပွားခဲ့ပြီးနောက်ပိုင်း ဘိုးရင်းကုမ္ပဏီမှ အပါအဝင် တောင်ကိုရီးယားနှင့် အမေရိကန်စုံစမ်းစစ်ဆေးသူများသည် အခင်းဖြစ်နေရာတွင် ပိုက်စိပ်တိုက် စစ်ဆေးရှာဖွေမှုများလုပ်ခဲ့သည်။
“လေယာဉ်ပျံသန်းမှု မှတ်တမ်းတင်ကိရိယာ(ဘလက်ဘောက်စ်) က ပျက်စီးခဲ့တာမို့ ပြည်တွင်းမှာတော့ ဒေတာထုတ်ယူလို့ မရလောက်ဘူးလို့ ယူဆထားပါတယ်” ဟု တောင်ကိုရီးယား မြို့ပြလေကြောင်းပျံသန်းမှု ဝန်ကြီးဌာန ဒုတိယဝန်ကြီး ဂျိုဂျွန်ဝမ်က ပြောဆိုသည်။
ဘလက်ဘောက်ကို အမေရိကသို့ ပို့ဆောင်၍ စစ်ဆေးဖော်ထုတ်မှုလုပ်ဆောင်ရန် အမေရိကန် နိုင်ငံသယ်ယူပို့ဆောင်မှုဘေးကင်းရေးဘုတ်အဖွဲ့နှင့် ယနေ့တွင် သဘောတူညီမှုရခဲ့သည်ဟု သူက ပြောဆိုခဲ့သည်။
လေယာဉ်၏ ဘလက်ဘောက်စ်နှစ်ခုလုံးကို ပြန်လည်ရယူထားနိုင်ကြောင်းနှင့် လေယာဉ်မှူးခန်း အသံမှတ်တမ်းတင်ကိရိယာအတွက် ကနဦးဒေတာထုတ်ယူမှု ပြီးမြောက်ခဲ့ပြီဖြစ်ကြောင်း မစ္စတာ ဂျိုးက အစောပိုင်းတွင် ပြောကြားထားသည်။
သည်စထရိတ်တိုင်းမ်စ်