ဂါဇာတွင် လူမျိုးစုလိုက် ရှင်းလင်းဖယ်ရှားခြင်းမလုပ်ရန် ကုလအကြီးအကဲ သတိပေး

ဂါဇာကမ်းမြောင်ဒေသကို အမေရိကန်ပြည်ထောင်စုက ထိန်းချုပ်ရယူကာ ပါလက်စတိုင်းများကို အခြားနေရာများသို့ ရွှေ့ပြောင်းချထားမည်ဆိုသည့် ထရမ့်ပ်၏ အဆိုပြုချက်ထွက်ပေါ်လာပြီးနောက် ဂါဇာတွင် လူမျိုးစုလိုက် ဖယ်ရှားရှင်းလင်းခြင်း ကို မလုပ်ရန် ကုလသမဂ္ဂအတွင်းရေးမှူးချုပ် အန်တိုနီယို ဂူတာရက်စ်က သတိပေးလိုက်သည်။

“ဖြေရှင်းနည်းတွေကို ရှာဖွေရာမှာ ပြဿနာကို ပိုးဆိုးသွားစေအောင် လုပ်လို့မရပါဘူး။နိုင်ငံတကာဥပဒေရဲ့ အခြေခံအုတ်မြစ်ကို သစ္စာစောင့်သိဖို့ အင်မတန်အရေးကြီးပါတယ်၊ လူမျိုးစုအလိုက် ရှင်းလင်းဖယ်ရှားတဲ့ ဘယ်ပုံစံမျိုးကိုမဆို မဖြစ်မနေ ရှောင်ရှားရပါမယ်” ဟု ကုလသမဂ္ဂကော်မတီအစည်းအဝေးတွင် ဂူတာရက်စ်က ပြောကြားခဲ့သည်။

“နှစ်နိုင်ငံ ဖြေရှင်းချက်ကို ကျွန်တော်တို့ ထပ်လောင်းအတည်ပြုရပါမယ်” ဟုလည်း သူက ပြောသည်။

ပါလက်စတိုင်းပြည်သူများနှင့် ခွဲခြား၍ မရသော အခွင့်အရေးများဆိုင်ရာ ကော်မတီသို့ မိန့်ခွန်းပြောရောတွင် ထရမ့်ပ် သို့မဟုတ် သူ၏ ဂါဇာဆိုင်ရာ အဆိုပြုချက်နှင့်ပတ်သက်၍ ဂူတာရက်စ်က အမည်တပ်ပြောခြင်းမျိုးမရှိခဲ့ပေ။ သို့ရာတွင် ဂူတာရက်စ်၏ ပြောဆိုချက်သည် တုန့်ပြန်မှုအဖြစ် ရှုမြင်မည်ဆိုလျှင်လည်း မျှတသောယူဆချက်ဖြစ်လိမ့်မည်ဟု သူ၏ ပြောရေးဆိုခွင့်ရှိသူ စတီဖင် ဒူဂျာရစ်က သတင်းထောက်များကို ပြောဆိုခဲ့သည်။

ဗုဒ္ဓဟူးနေ့အစောပိုင်းတွင် ဂူတာရက်စ်သည် ဒေသတွင်းအခြေအနေများနှင့် ပတ်သက်၍ ဂျော်ဒန်ဘုရင် အဗ္ဗဒူလာနှင့် စကားပြောခဲ့သည်ဟု ဒူဂျာရစ်က ပြောဆိုသည်။

ကုလသမဂ္ဂသည် လုံခြုံပြီး အသိအမှတ်ပြုထားသည့် နယ်စပ်များအတွင်း ဘေးချင်းကပ်နေထိုင်သည့် နှစ်နိုင်ငံ မျှော်မှန်းချက်ကို ကာလကြာရှည် ထောက်ခံထားသည်။ ပါလက်စတိုင်းတို့သည် ၁၉၆၇ ခုနှစ်ကစ၍ အစ္စရေးတို့ တရားမဝင်သိမ်းပိုက်ထားသော နယ်မြေများဖြစ်သည့် အနောက်ဘက်ကမ်းဒေသ၊ အရှေ့ဂျေရုဆလင်နှင့် ဂါဇာကမ်းမြောင်တို့ပါဝင်သော နိုင်ငံတစ်ခုကို ထူထောင်လိုကြသည်။

အစ္စရေးသည် ၂၀၀၅ ခုနှစ်တွင် ဂါဇာကမ်းမြောင်မှ စစ်သားများနှင့် အခြေချနေထိုင်သူများကို ရုပ်သိမ်းခဲ့သည်။ အဆိုပါနယ်မြေကို ၂၀၀၇ ခုနှစ်ကစ၍ ဟားမတ်စ်တို့က အုပ်ချုပ်နေခဲ့သော်လည်း အစ္စရေး သိမ်းပိုက်ထားဆဲအခြေအနေအဖြစ် ကုလသမဂ္ဂက မှတ်ယူထားသည်။ ဂါဇာကမ်းမြောင်သို့ ဝင်ရောက်ခွင့်ကို အစ္စရေးနှင့် အီဂျစ်က ထိန်းချုပ်ထားသည်။

Ref: သည်နူးအာရပ်