ဂရိတွင်လှေနစ်မြုပ်ပြီး လူ ၅၀ ခန့်ပျောက်ဆုံးနေ

ဂရိတွင်လှေနစ်မြုပ်ပြီး လူ ၅၀ ခန့်ပျောက်ဆုံးနေ

အာဂျီးယန်းပင်လယ်ထဲတွင် ရွှေ့ပြောင်းလုပ်သားများကိုတင်‌ေဆာင်လာ‌ေသာလှေတစ်စင်း နစ်မြုပ်သွားပြီးနောက် လူ ၅၀ ခန့် ပျောက်ဆုံးသွားကာ လေကြောင်းနှင့် ပင်လယ်ပြင် ကယ်ဆယ်ရေးလုပ်ငန်းများ လုပ်ဆောင်နေကြောင်း ဂရိကမ်းခြေစောင့်တပ်ကပြောကြားခဲ့သည်။

အဆိုပါသင်္ဘောသည် တူရကီတောင်ပိုင်း အင်တဲလ်လီယာမှ အင်္ဂါနေ့ကစတင်ထွက်ခွာခဲ့ပြီး အီတလီနိုင်ငံသို့ ဦးတည်သွား‌နေရာမှ ကားလ်ပါရှော့ နှင့် ရို့ဇ်ကျွန်းများအနီး၌ အရုဏ်တက်ချိန်တွင် နစ်မြုပ်ခဲ့သည်ဟုဆိုသည်။

“ယခုအချိန်ထိ ကယ်ဆယ်နိုင်သူ ၂၉ ဦး၏ ပြောကြားချက်များအရ လှေပေါ်တွင် လူ ၈၀ ခန့်ရှိပြီး ၅၀ ခန့် ပျောက်ဆုံးနေကြောင်း” ကမ်းခြေစောင့်သတင်းထောက်ရုံးမှ တာဝန်ရှိသူတစ်ဦးက AFP သို့ ပြောကြားခဲ့သည်။သို့သော် နိုင်ငံပိုင် ရုပ်မြင်သံကြားချန်နယ် ERT ကလှေပေါ်တွင် လိုက်ပါလာသူဦးရေမှာ ၃၀ မှ ၆၀ အကြားသာရှိသည်ဟု ဆိုသည်။

ကမ်းခြေစောင့်တပ်ဖွဲ့ ပြောရေးဆိုခွင့်ရှိသူ Nikos Kokalas ကမူ ” လှေရဲ့အနေအထားအရ လှေပေါ်မှာရွှေ့ပြောင်းနေထိုင်သူ ၈၀ ပါတယ်ဆိုတာမဖြစ်နိုင်ပါဘူး၊ ဒီထက်အရေအတွက်နည်းမယ်လို့ ထင်ပါတယ်”ဟုဆိုခဲ့သည်။

အာဂျီးယန်း ပင်လယ်တောင်ပိုင်း၌ စတင်လုပ်ဆောင်နေပြီဖြစ်သော ကယ်ဆယ်ရေးလုပ်ငန်းစဉ်တွင် ရေယာဉ်လေးစင်း၊ ကမ်းရိုးတန်းစောင့် ကင်းလှည့်သင်္ဘောနှစ်စင်းနှင့် ဂရိလေတပ်ရဟတ်ယာဉ်တစ်စင်းတို့ပါဝင်သည်ဟုသိရှိရသည်။

တစ်နာရီလျှင် ကီလိုမီတာ ၅၀ (တစ်နာရီ မိုင် ၃၀) နှုန်းဖြင့် လေပြင်းတိုက်ခတ်မှုကြောင့် ကယ်ဆယ်ရေးလုပ်ငန်းကို အဟန့်အတားဖြစ်စေခဲ့ကြောင်း Kokalas က Skai ရေဒီယိုသို့ပြောကြားခဲ့ပြီး “သင်္ဘောပျက်တဲ့ထဲက သူအများစုဟာ အသက်ကယ်အင်္ကျီတွေ မဝတ်ထားပါဘူး” ဟုလည်း၎င်းကပြောသည်။

ယခုလှေသည် အီတလီသို့သွားရန်ဖြစ်သည်ဟုဆိုသော်ငြား ဂရိသည်လည်းရွှေ့ပြောင်းလုပ်သားတို့အတွက် ခိုလှုံစရာကောင်းသည့်နိုင်ငံတစ်ခုဖြစ်သည်။ကျဉ်းမြောင်းပြီး အန္တရာယ်များသောပင်လယ်ကိုဖြတ်ကျော်ကာ တူရကီမှတစ်ဆင့် ဂရိနိုင်ငံသို့ထောင်နှင့်ချီသောလူများလာရောက်ခိုလှုံတတ်ကြသည်။

ယင်းသို့လာရောက်ရာ၌ ဇန်န၀ါရီလမှစ၍ မြေထဲပင်လယ်အရှေ့ပိုင်းတွင် လူပေါင်း ခြောက်ဆယ့်လေးဦး သေဆုံးခဲ့‌ကြောင်းနိုင်ငံတကာ ရွှေ့ပြောင်းနေထိုင်သူများဆိုင်ရာ အဖွဲ့အစည်းကပြောခဲ့သည်။ရွှေ့ပြောင်းဝင်ရောက်သူအရေအတွက်သည် ယခုနှစ်အတွင်း မြင့်တက်လာပြီး မှောင်ခိုသမားများ နယ်စပ်ကိုဖြတ်၍ မကြာခဏဆိုသလို အန္တရာယ်များသော ခရီးတိုလှေများဖြင့် ပို့ဆောင်ခြင်းအား မတားဆီးခဲ့ဟုတူရကီအား ဂရိကစွပ်စွဲခဲ့သည်။

ဇွန်လကုန်က ဥရောပသမဂ္ဂသည် ၎င်း၏ပိုင်နက်နယ်မြေမှ “အင်အားသုံး၍ တရားမဝင်နှင်ထုတ်ခြင်း” ကို ရပ်တန့်ရန် အန်ကာရာကိုတိုက်တွန်းခဲ့သည်။ပရဟိတအဖွဲ့များနှင့် မီဒီယာများကမူ အေသင်မြို့သည် ရွှေ့ပြောင်းနေထိုင်သူများကို တရားမ၀င် ပြန်လည်လွှဲပြောင်းပေးသည်ဟု စွပ်စွဲခဲ့သော်လည်း ဂရိအစိုးရကငြင်းဆိုထားသည်။

Source – Wio News