မကွေးတိုင်း၊ မင်းဘူးမြို့ရှိ မြို့မစျေးအတွင်းဖွင့်လှစ်ထားသော စျေးဆိုင်များ၌ ကျန်းမာရေးနှင့်ညီညွတ်မှုမရှိသော၊ ဘေးထွက်ဆိုးကျိုးဖြစ်စေသော စားသောက်ကုန်များရောင်းချခြင်းမရှိစေရေးအတွက် ဖေဖော်ဝါရီ ၂ ရက်နံနက်ပိုင်းက စစ်ဆေးမှုများပြုလုပ်ခဲ့ကြောင်း သိရသည်။
ဈေးဆိုင်များတွင် ဘေးအန္တရာယ်ဖြစ်စေသော ဓာတုပစ္စည်းများ၊ အဏုဇီဝပိုးမွှားများပါဝင်မှုရှိ/မရှိ၊ စားသုံးဆီများတွင် ကျန်းမာရေးအတွက်ဆိုးကျိုးဖြစ်စေသော အသွင်ပြောင်းအဆီပါဝင်မှုနှုန်း၊ ငရုတ်သီးမှုန့်၊ မြေပဲ၊ ပဲအမျိုးမျိုး၊ နှမ်း၊ မြေပဲဆီနှင့် ပြောင်းနှင့်လုပ်သော မုန့်များတွင် မှိုပါဝင်မှုရှိ/မရှိ၊ အစားအသောက်များတွင် လူကိုဘေးဥပဒ်ဖြစ်စေတတ်သော ဓာတ်သတ္တုများပါဝင်မှုရှိ/မရှိ၊ အစားအသောက်၊ ဆေးဝါး၊ ဆေးဝါးနှင့် အလှကုန်စသည့် စားသောက်ကုန်ပစ္စည်း (၁၅) မျိုးကို ဓာတ်ခွဲစစ်ဆေးခဲ့ကြကြောင်း သိရသည်။
မကွေးတိုင်းဒေသကြီး အစားအသောက်နှင့် ဆေးဝါးကွပ်ကဲရေးဦးစီးဌာန၊ မင်းဘူးမြို့နယ်ထွေအုပ်၊ ပြည်သူ့ကျန်းမာရေးဦးစီးဌာန၊ စားသုံးသူရေးရာဦးစီးဌာန၊ ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ မြို့နယ်စည်ပင်၊ ရဲတပ်ဖွဲ့ဝင်များကပူးပေါင်းစစ်ဆေးခဲ့ကြခြင်းဖြစ်ကြောင်း သိရသည်။