ကေမ္ဘာဒီးယားနိုင်ငံနှင့် နယ်စပ်အနီး ထိုင်းဘက်အခြမ်းတွင် စနေနေ့(သြဂုတ်လ ၉ရက်နေ့) က မြေမြုပ်မိုင်းပေါက်ကွဲ၍ ထိုင်းစစ်သား သုံးဦး ဒဏ်ရာရခဲ့ကြောင်း သိရသည်။ ကွာလာလမ်ပူရ်တွင် နှစ်ဖက်တွေ့ဆုံခဲ့မှုအတွင်း အပြုသဘောဆောင်ပြီး အကျိုးရလဒ်ထွက်ခဲ့သည်ဟု ချီးကျူးပြောဆိုသော ဆွေးနွေးပွဲများအပြီး နှစ်ရက်အကြာတွင် ယခုဖြစ်ရပ် ဖြစ်ပွားခဲ့သည်။
မိုင်းပေါက်ကွဲမှုကြောင့် စစ်သားတစ်ဦးသည် ဘယ်ဘက်ခြေကျင်းဝတ် ပြတ်သွားခဲ့သည်။ အခြားစစ်သားတစ်ဦးမှာ လက်နှင့်နောက်ကျောတွင် ထိခို-က်ဒဏ်ရာရခဲ့ပြီး နောက်တစ်ဦးသည် နားစည်ပေါက်ပြဲခဲ့သည်ဟု ထိုင်းဒုအမှတ် ၂ စစ်တိုင်း၏ စစ်ဆင်ရေးဌာနက ပြောကြားကြောင်း ထိုင်းသတင်းမီဒီယာများက ဖော်ပြခဲ့သည်။
အဆိုပါ စစ်သားများသည် အမှတ် ၁၁၁ ခြေလျင်တပ်ရင်းမှဖြစ်ပြီး စီဆာကက်ပြည်နယ်ရှိ Don Ao-krissana ဧရိယာတွင် သံဆူးကြိုးချနေစဉ် နံနက် ၁၀ ခန့်တွင် ၎င်းတို့ထဲမှ တစ်ဦး က မြေမြုပ်မိုင်းကို နင်းမိခဲ့ခြင်းဖြစ်သည်။
၎င်းတို့အားလုံးကို ဒေသတွင်းရှိ ဆေးရုံသို့ ပို့ဆောင်ပေးခဲ့သည်။
ပေါ-က်ကွဲမှုနှင့် ပတ်သက်သော အစီရင်ခံချက်ကို လက်ခံရရှိထားသည်ဟု ထိုင်းနိုင်ငံယာယီဝန်ကြီးချုပ် ဖမ်သမ် ဝီချာယာချိုင်းက ပြောဆိုသည်။
တရားမဝင် ဝင်ရောက်မှုများကို တားဆီးရန်အတွက် လုံခြုံရေးအစီအမံအရ နယ်စပ်ဝင်ပေါက်တစ်ခုကို ဖော်ဆောင်ရန် ရှင်းလင်းဆောင်ရွက်နေသော ဧရိယာတွင် ပေါက်ကွဲမှုဖြစ်ပွားခဲ့ခြင်းဟု ၎င်းက ပြောဆိုကြောင်း ဘန်ကောက်ပို့စ်သတင်းတွင် ဖော်ပြသည်။
ယခုဖြစ်ရပ်နှင့် ပတ်သက်၍ မှတ်ချက်ပေးရန် တောင်းဆိုမှုကို ကေမ္ဘာဒီးယားကာကွယ်ရေးဝန်ကြီးဌာနက လတ်တလောတွင် တုန့်ပြန်ဖြေကြားခြင်းမရှိသေးကြောင်း သိရသည်။
Ref: စီအင်န်အေ