ကုလအတွင်း‌ရေးမှူးချုပ် ကုလငြိမ်းချမ်းရေးအခန်းကဏ္ဍမီးမောင်းထိုးပြ

ဘယ်လင်၊ မေ ၁၃

ကုလသမဂ္ဂ အတွင်းရေးမှူးချုပ် အန်တိုနီယို ဂူတာရက်စ်က အင်္ဂါနေ့တွင် ကုလသမဂ္ဂ ငြိမ်းချမ်းရေး လုပ်ငန်းများ ဆောင်ရွက်မှု၏ အခန်းကဏ္ဍကို မီးမောင်းထိုးပြခဲ့ပြီး အဖွဲ့ဝင်နိုင်ငံများ၏ ထောက်ခံမှုကို ပိုမိုရရှိရန် တောင်းဆိုခဲ့သည်။

ဂျာမနီနိုင်ငံ၊ ဘယ်လင်မြို့၌ ပြုလုပ်သည့် ကုလသမဂ္ဂ ငြိမ်းချမ်းရေး ထိန်းသိမ်းမှု ဝန်ကြီးအဆင့်အစည်းအဝေး ၂၀၂၅ သို့ အမှာစကား ပြောကြားရာတွင် ဂူတာရက်စ် က ငြိမ်းချမ်းရေးထိန်းသိမ်းမှုလုပ်ငန်းများ၌ နိုင်ငံအများအပြားကို ကူညီဆောင်ရွက်ပေးခဲ့ကြောင်း ချီးကျူးဂုဏ်ပြုခဲ့ပြီး ၎င်းတို့၏ ကြိုးပမ်းမှုများသည် “ပဋိပက္ခမှ ငြိမ်းချမ်းရေးသို့ နိုင်ငံများကို ငြိမ်းချမ်းစွာ ကူးပြောင်းနိုင်ရေး အတွက် ကမ္ဘာလုံးဆိုင်ရာ အသိအမှတ်ပြုမှု အရှိဆုံး သင်္ကေတဖြစ်သည်” ဟု ပြောကြားခဲ့သည်။

အတွင်းရေးမှူးချုပ်က ဆယ်စုနှစ်များတစ်လျှောက် ငြိမ်းချမ်းရေးထိန်းသိမ်းသူ ၄,၄၀၀ သည် တာဝန် ထမ်းဆောင်စဉ် ကျဆုံးခဲ့ကြောင်းကိုလည်း မှတ်ချက်ပြုခဲ့သည်။

ရှုပ်ထွေးသောပဋိပက္ခများ၊ ကမ္ဘာလုံးဆိုင်ရာကွဲပြားမှုကြီးထွားလာခြင်း၊ သတင်းမှ-ားများ၊ အကြမ်းဖက်ဝါဒနှင့် နိုင်ငံဖြတ်ကျော်မှုခင်းများအပါအဝင် ယနေ့ခေတ် ငြိမ်းချမ်းရေးထိန်းသိမ်းသူများ ရင်ဆိုင်နေရသော စိန်ခေါ်မှုများကို ဂူတာရက်စ် က အလေးပေးပြောကြားခဲ့သည်။

“ကုလသမဂ္ဂ စတင်ဖွဲ့စည်းချိန်ကစလို့ ယခုအချိန်ဟာ ကျွန်တော်တို့အနေနဲ့ ပဋိပက္ခတွေ အများဆုံး ကြုံတွေ့နေရပြီး ဘေးကင်းရာ ရှာရင်းနဲ့ ခိုလှုံရာကို ရှာဖွေဖို့အတွက် နယ်စပ်ဖြတ်ကျော် ထွက်ပြေးလာတဲ့ အရေအတွက် စံချိန်တင် များပြားနေပါတယ်” ဟု ဂူတာရက်စ်က ပြောကြားခဲ့သည်။

ငြိမ်းချမ်းရေးထိန်းသိမ်းမှု လုပ်ငန်းများကို ပိုမိုလိုက်လျောညီထွေဖြစ်အောင်၊ ပြောင်းလွယ်ပြင်လွယ်မှုရှိစေရန်၊ ပြန်လည်ရုန်းထနိုင်ရန် ကြိုးပမ်းဆောင်ရွက်ကြရန် တိုက်တွန်းထားပြီး၊ ထိုလုပ်ငန်းများမှာလည်း တိကျသေချာသောတာဝန်များ၊ ရှင်းလင်းပြီး ကြိုတင် မှန်းဆ၍ရသော ရေရှည်တည်တံ့သည့် အထောက်အပံ့များဖြင့် ကျောထောက်နောက်ခံပြုထားမှသာ အောင်မြင်နိုင်မည်ဖြစ်ကြောင်း ၎င်းက ပြောကြားခဲ့သည်။

နှစ်ရက်ကြာကျင်းပ‌သော ဤ အခမ်းအနားကို နိုင်ငံပေါင်း ၁၃၀ ခန့်မှကိုယ်စားလှယ်များ စုဆုံကြပြီး နိုင်ငံရေးဆွေးနွေးပွဲတစ်ခုအနေဖြင့် ငြိမ်းချမ်းရေးထိန်းသိမ်းမှု အနာဂတ်ကို ဆွေးနွေးခဲ့ကြပါသည်။

Ref: ရှင်းဟွာ