ကိုယ်ပိုင်ပြဌာန်းခွင့်အပြည့်အဝရှိသည့် ဖက်ဒရယ် ဒီမိုကရေစီပြည်ထောင်စု တည်ဆောက်ရေးကို ဦးထိပ်ထားကာ တစ်ဦးတစ်ယောက်ကောင်းစားရေးနှင့် မိမိအဖွဲ့အစည်းကောင်းစားရေး စိတ်ဓာတ်ကို ဖယ်ကျဉ်ထားရန် လိုအပ်ကြောင်း RCSS ဥက္ကဋ္ဌ ဗိုလ်ချုပ်ကြီး ယွက်ဆစ်က ပြောကြားလိုက်သည်။
ယနေ့ ဇန်နဝါရီလ (၂၆) ရက်တွင် နေပြည်တော်ရှိ အမျိုးသားစည်းလုံးညီညွတ်ရေးနှင့် ငြိမ်းချမ်းရေး ဖော်ဆောင်မှုကော်မတီဗဟိုဌာနတွင် ပြုလုပ်သည့် RCSS နှင့် နစက တို့အကြား တတိယအကြိမ် ငြိမ်းချမ်းရေးဆွေးနွေးပွဲ နောက်ဆုံးနေ့တွင် ၎င်းက ပြောကြားခဲ့ခြင်း ဖြစ်သည်။
“ကိုယ်ပိုင်ပြဌာန်းခွင့် အပြည့်အဝရှိတဲ့ ဖက်ဒရယ်ဒီမိုကရေစီပြည်ထောင်စု တည်ဆောက်ရေးကို ဦးထိပ်ထားပြီး အဖွဲ့အစည်းအားလုံးအနေနဲ့ လောဘ၊ ဒေါသ၊ မာန်မာန ရှေ့တန်းတင်ခြင်း၊ ကိုယ်တစ်ဦးတစ်ယောက်ကောင်းစားရေး၊ ကိုယ့်အဖွဲ့အစည်းကြီးပွားရေးစိတ်ဓါတ်များကို ဖယ်ကျဉ်ထားစေလိုပါတယ်” ဟု ဗိုလ်ချုပ်ကြီး ယွက်ဆစ်က ပြောကြားခဲ့ခြင်း ဖြစ်သည်။
ဗိုလ်ချုပ်ကြီး ယွက်ဆစ် ဦးဆောင်သည့် သျှမ်းပြည်ပြန်လည်ထူထောင်ရေးကောင်စီ (RCSS) သည် နစက ဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်၏ ငြိမ်းချမ်းရေးဖိတ်ခေါ်မှုအရ ပြီးခဲ့သည့် ၂၀၂၂ ခုနှစ်အတွင်း နစကနှင့် (၂) ကြိမ်တိုင် တွေ့ဆုံဆွေးနွေးမှုများ လုပ်ဆောင်ခဲ့ပြီး ယခု ၂၀၂၃ ခုနှစ် နှစ်ဆန်းပိုင်းတွင် (၃) ကြိမ်မြောက် ထပ်မံတွေ့ဆုံခဲ့ခြင်း ဖြစ်သည်။
အဆိုပါ တွေ့ဆုံမှု အစနေ့တွင်လည်း ဗိုလ်ချုပ်ကြီး ယွက်ဆစ်က NCA ထိုးထားသည့် ကာလအတွင်း ငြိမ်းချမ်းရေးအပါအဝင် တိုင်းပြည်တိုးတက်ရေးအတွက် တစ်စုံတရာ ရလဒ်ထွက်ခြင်း မရှိခဲ့သည့်အပေါ် NCA လက်မှတ်ထိုးခဲ့သည့် အချိန် (၇) နှစ်ကို နှမြောကြောင်း ပြောကြားခဲ့သေးသည်။
ဥက္ကဋ္ဌ ဗိုလ်ချုပ်မှုးကြီးမင်းအောင်လှိုင် ဦးဆောင်သည့် နစကအဖွဲ့အနေဖြင့် ဖက်ဒရယ်ဒီမိုကရေစီ ပြည်ထောင်စု တည်ဆောက်ရေး ၊ ပြည်တွင်းငြိမ်းချမ်းရေးနှင့် တိုင်းရင်းသားတန်းတူအခွင့်အရေး ရရှိရေးအတွက် ကြိုးပမ်းဆောင်ရွက်ရန် စိတ်ဆန္ဒရှိနေပြီး အပစ်အခတ် ရပ်စဲကြောင်း လက်မှတ်ရေးထိုးထားသည့် တိုင်းရင်းသားလက်နက်ကိုင်အဖွဲ့များနှင့် တွေ့ဆုံဆွေးနွေးမှုများ လုပ်ဆောင်လျက် ရှိနေခြင်းလည်း ဖြစ်သည်။
ယခုတစ်ကြိမ် ဆွေးနွေးပွဲတွင် ဗိုလ်ချုပ်ကြီး ယွက်ဆစ်ဦးဆောင်သည့် RCSS အနေဖြင့် ရှမ်းပြည်ဖက်ဒရယ်ဆိုင်ရာ အခြေခံမူ (၃၃)ချက်ကို ဆွေးနွေးခဲ့ပြီး ယင်းသို့ ဆွေးနွေးနိုင်ခဲ့ခြင်းမှာ ရှမ်းပြည်နယ် ကိုယ်ပိုင်ပြဌာန်းခွင့်အတွက် အစပျိုးပေးလိုက်ခြင်းဖြစ်ကြောင်း ယနေ့ အပိတ်မိန့်ခွန်းတွင် ဗိုလ်ချုပ်ကြီး ယွက်ဆစ်က ထည့်သွင်းပြောကြားခဲ့ကြောင်း RCSS နှင့် နီးစပ်သူများထံမှ သိရသည်။
တတိယအကြိမ်မြောက် နှစ်ဖက်တွေ့ဆုံဆွေးနွေးမှုကို ဇန်နဝါရီလ (၂၄) ရက်တွင် စတင်ခဲ့ခြင်းဖြစ်ပြီး ယနေ့ ဇန်နဝါရီလ (၂၆) ရက်အထိ (၃) ရက်ကြာ ပြုလုပ်ခဲ့ခြင်းဖြစ်သည်။
Photo Credit-TAI Freedom
