ရန်ကုန် ဇူလိုင် ၂၉
ကိုဗစ်-၁၉ရောဂါနှင့်ပတ်သက်၍ အသုံးပြုရသော ဆရာဝန်ညွှန်ကြားချက်ဖြင့်သုံးရသည့် Prescription Only Medicine(POM) ဆေးဝါးများ၊ ကျန်းမာရေးအထောက်အကူပြုဆေးဝါးများနှင့်အသုံးများသည့် ဆရာဝန်ညွှန်ကြားချက် မလိုသောဆေးဝါးများ (OTC ) ကို သွင်းကုန်ထောက်ခံချက် လျှောက်ထားခြင်းမှ ယာယီကင်းလွတ်ခွင့်ပြုလိုက်ကြောင်း အစားအသောက်နှင့်ဆေးဝါးကွပ်ကဲရေး ဦးစီးဌာန မှကြေညာလိုက်သည်။
အဆိုပါ ကင်းလွတ်ခွင့်ပြုသော OTCဆေးဝါးများမှာ Paracetamol, ORS, Mucolytic, Cetirizine, Loratidine, Domperidone(POM ဆေးဝါးဖြစ်၍ ခြွင်းချက်ဖြင့်) ဖြစ်ပြီး ယာယီကင်းလွတ်ခွင့်ပြု ဆောင်ရွက်ပေးသွားမည်ဖြစ်ကြောင်းသိရသည်။
တင်သွင်းသူများအနေဖြင့်လည်း DIAC ရရှိထား၍ ဆေးဝါးနှင့်ပတ်သက်ပြီး တာဝန်ခံမှုရှိကာ မိမိတင်သွင်းသောဆေးဝါး၏ Shelf Life တွင်လည်း အနည်းဆုံး(၁)နှစ်သက်တမ်းရှိရမည်။ ဖတ်ရှု၍ရနိုင်သော အင်္ဂလိပ်-မြန်မာ အညွှန်းဖြစ်ရမည်ဟုလည်းပြောကြားထားသည်။
POM ဆေးဝါးနှင့်ပတ်သက်၍ ဆေးဝါးတင်သွင်းခြင်း၊ လုပ်ငန်းလုပ်ကိုင်ခွင့် လက်မှတ်ရရှိထားပြီး မှတ်ပုံတင်(DRC) သက်တမ်းတိုး ဆဲဖြစ်ပါက သတ်မှတ်စာအုပ် အပ်ပြီးကြောင်း အထောက်အထားဖြင့်တင်သွင်းခွင့်ပြုခြင်း၊ တင်သွင်းသူ အနေဖြင့် မိမိတင်သွင်း သည့်ဆေးဝါး နှင့်ပတ်သက်၍ အရည်အသွေး၊ အာနိသင်၊ ဘေးကင်းရှင်းမှု၊ မှတ်ပုံတင်မရှိသော်လည်း လှူဒါန်းမည့် ဆေးဝါးဖြစ်ပါက ရရှိမှုအထောက်အထား၊ ဆေးဝါးစိစစ်မှုဖြင့်ပတ်သက်၍ တင်သွင်းသည့် အရည်အသွေးနှင့် ဘေးကင်းမှုတို့ ကို တာဝန်ယူမှု တာဝန်ခံမှု ရှိပါက တင်သွင်းခွင့်ပြုကြောင်းသိရသည်။
ထိုနောက် ကျန်းမာရေးအထောက်အကူပြု အစားအသောက်များနှင့် ဆရာဝန်ညွှန်ကြားချက်မလိုသည့် ဆေးဝါးများကို တင်သွင်းမည့် လူပုဂ္ဂိုလ်၊ လုပ်ငန်းများအနေဖြင့် အဆိုပါအစားအသောက်များ၏ ဘေးကင်းမှုနှင့် အရည်အသွေးကိုလည်း အပြည့်အဝ တာဝန်ယူ ရမည် ဖြစ်ပြီး စားသောက်ကုန်၏ အသေးစိတ်သတ်အှတ်ချက်များ၊ အသိအမှတ်ပြု ဓာတ်ခွဲခန်းအဖြေများ သက်ဆိုင်ရာ အဖွဲအစည်း မှထုတ်ပေး သော ဘေးကင်းမှုဆိုင်ရာ လက်မှတ်များ တင်သွင်းခဲ့သောပမာဏများနှင့် မြန်မာနိုင်ငံအတွင်းဖြန့်ဖြူးခဲ့သောနေရာ မှတ်တမ်း အထောက်အထား များကို တောင်းခံပါက ပြည့်စုံမှန်ကန်စွာ တင်ပြရမည်ဖြစ်ကြောင်း သိရသည်။
သိုသော် သတ်မှတ်ချက်များတွင် အသက်(၂)နှစ်အောက် ကလေးများအတွက် ထုတ်လုပ်ထားသော Vitamin C, D, K နှင့် Zinc များ မပါဝင်ကြောင်းသိရသည်။
ပုဂ္ဂလိကဆေးဝါးလုပ်ငန်းရှင်များအနေဖြင့် နိုင်ငံတကာအတွင်း အရည်အသွေးအာနိသင်ရှိပြီး ဘေးရှင်းသည့် ကိုဗစ်-၁၉ ကာကွယ်ဆေး များကို မိမိတိုအစီအစဉ်ဖြင့် တင်သွင်းဖြန့်ဖြူးခြင်း၊ ကာကွယ်ဆေးထိုးနှံပေးခြင်းများဆောင်ရွက်လိုပါက သတ်မှတ်အထောက် အထား များဖြင့် အစား အသောက်နှင့်ဆေးဝါးကွပ်ကဲရေးဦးစီးဌာနသို့လျှောက်ထားနိုင်ကြောင်း အသိပေးထားသည်။