ကိုဗစ်အပြီး တရုတ်သည် ဂျာမနီနှင့်အတူ နှစ်ဦးနှစ်ဖက် အကျိုးရှိသော ပူးပေါင်းဆောင်ရွက်မှုများ တိုးချဲ့လုပ်ဆောင်သွားမည်ဟုဝမ်ယိ ပြော

တရုတ်နိုင်ငံသည် ဂျာမနီ၊ ဥရောပတို့နှင့် နယ်ပယ်အသီးသီးတွင် ဖလှယ်မှုများ ပြန်လည်စတင်ရန်၊ အပြန်အလှန် အကျိုးရှိသော ပူးပေါင်းဆောင်ရွက်မှုများ တိုးချဲ့ရန်နှင့် နှစ်ဦးနှစ်ဖက် နားလည်မှု မြင့်တင်ရန်အတွက် အဆင်သင့်ဖြစ်နေကြောင်း တရုတ် ဝါရင့်သံတမန် ဝမ်ယိက ဖေဖော်ဝါရီလ ၁၇ ရက် သောကြာနေ့တွင် ပြောကြားခဲ့သည်။

သောကြာနေ့က စတင်ခဲ့သော ၅၉ ကြိမ်မြောက် မြူးနစ် လုံခြုံရေး ညီလာ၏ ပြင်ပတွင် ဂျာမနီ ဝန်ကြီးချုပ် အိုလက်ဖ် ရှို့ဇ်နှင့် တွေ့ဆုံခဲ့စဉ် တရုတ် ကွန်မြူနစ်ပါတီ ဗဟို ကော်မီတီ နိုင်ငံခြားရေး ေကာ်မရှင် ရုံး ညွှန်ကြားရေးဝန် ဝမ်ယိက ယခုကဲ့သို့ ပြောလာခြင်းဖြစ်သည်။

တရုတ်နှင့် ဂျာမနီတို့သည် အစိုးရအချင်းချင်း ညှိနှိုင်းဆွေးနွေးပွဲအသစ်များ ပြုလုပ်ရန် ပြင်ဆင်ပြီး တရုတ်-ဂျာမနီ ပူးပေါင်းဆောင်ရွက်မှုကို ကမ္ဘာ့ထိပ်တန်းအဆင့်တွင် ထိန်းသိမ်းထားနိုင်ရန်အတွက် နှစ်နိုင်ငံဆက်ဆံရေး ဖွံ့ဖြိုးတိုးတက်ရေး လမ်းစဉ်များကို ရေးဆွဲနိုင်ကြောင်း ဝမ်ယိက ပြောခဲ့သည်။

ထို့ပြင် နှစ်နိုင်ငံစလုံးသည် နိုင်ငံစုံ ပါဝင်ရေးဝါဒနှင့် လွတ်လပ်စွာ ကုန်သွယ်ရေးကို ထောက်ခံသင့်ကြောင်း၊ နိုင်ငံများအား ခွဲထုတ်ခြင်းနှင့် ကုန်ကြမ်းကွင်းဆက်များ ဖြတ်တောက်သည့် အလေ့အကျင့်များကို ပယ်ချသင့်ကြောင်း၊ ကမ္ဘာ့ကုန်ထုတ်လုပ်မှုနှင့် ကုန်ကြမ်းကွင်းဆက်များ၏ တည်ငြိမ်မှုကို ကာကွယ်သင့်ကြောင်း ဝမ်ယိက ထည့်သွင်းပြောကြားခဲ့သည်။

ရှို့ဇ်ကလည်း တရုတ်နိုင်ငံသည် ကိုဗစ်ကပ်ရောဂါအား ကျော်လွှားနိုင်ခဲ့သည့်အ တွက် ဝမ်းသာကြောင်း ပြောကြားကာ ကဏ္ဍပေါင်းစုံတွင် ပူးပေါင်းမှုများ ကို  ပြန်လည်စတင်ရန်နှင့် အစိုးရအချင်းချင်း ညှိနှိုင်းဆွေးနွေးမှုများကို တတ်နိုင်သမျှ အမြန်ဆုံး စတင်သွားရန် သဘောတူခဲ့သည်။

Source: CGTN