ကရင်အမျိုးသားနှစ်သစ်ကူးနေ့အား အမှောင်ကို ပယ်ခွင်းမည့် မီးရှူးတန်ဆောင်အဖြစ်ထွန်းညှိရင်း ဖက်ဒရယ်ဒီမိုကရေစီပြည်ထောင်စုတည်ထောင်နိုင်ရေးအတွက် ကြိုးပမ်းဆောင်ရွက်သွားမည်

တစ်နိုင်ငံလုံး ပစ်ခတ်တိုက်ခိုက်မှုရပ်စဲရေးသ ဘောတူစာချုပ်လက်မှတ်ရေးထိုးထားသည့် တိုင်းရင်းသားလက်နက်ကိုင်တော်လှန်ရေးအဖွဲ့အစည်းများငြိမ်းချမ်းရေးလုပ်ငန်းစဉ်ဦးဆောင်အဖွဲ့ ဦးဆောင်မှုကော်မတီ(PPST-LC)၏ ဂုဏ်ပြုသဝဏ်လွှာ၌ရေးသားထားခြင်းဖြစ်သည်။

PPST ဦးဆောင်မှုကော်မတီမှ ဒီဇင်ဘာ ၂၂ ရက် (ယနေ့)တွင်ကျရောက်သည့် ကရင်အမျိုးသားနှစ်သစ်ကူးနေ့အခမ်းအနားသို့ ဂုဏ်ပြုသဝဏ်လွှာ ပေးပို့ခဲ့သည်။

ယနေ့အချိန်ကာလသည် တိုင်းပြည်၏ ဖက်ဒရယ်ဒီမိုကရေစီရေးအတွက် ကြိုးပမ်းဆောင်ရွက်ရေး လျှောက်လှမ်းနေရသည့် ခရီးကြမ်းတွင်အမှောင် မိုက်ဆုံးအချိန်ကာလများကို ကြုံတွေ့နေရသည့် အချိန်ဖြစ်သည်ဟု ဂုဏ်ပြုသဝဏ်လွှာ၌ရေးသားထားသည်။

ကရင်တိုင်းရင်းသားလက်နက်ကိုင်တော်လှန်ရေးအဖွဲ့အစည်းများအပါအဝင် ကရင်တမျိုးသားလုံးအနေဖြင့် ကရင်သက္ကရာဇ်(၂၇၆၂)ခုနှစ်၊ ၂၀၂၂ ခုနှစ်၊ဒီဇင်ဘာ ၂၂ ရက်တွင်ကျရောက်သည့် ကရင်အမျိုးသားနှစ်သစ်ကူးနေ့ အခါသမယအား အမှောင်ကိုပယ်ခွင်းမည့် မီးရှူးတန်ဆောင်အဖြစ် ထွန်းညှိရင်း ဘဝတူညီနောင်တိုင်းရင်းသားများနှင့်လက်တွဲကာ ရေရှည်တည်တံ့ခိုင်မြဲသည့် ငြိမ်း ချမ်းရေးရရှိရေး၊မဟာလူမျိုးကြီးဝါဒနှင့်အာဏာ ရှင်စနစ်ချုပ်ငြိမ်းရေးနှင့်စစ်မှန်သည့် ဖက်ဒရယ်ဒီမိုကရေစီပြည်ထောင်စုတည်ထောင်နိုင်ရေးတို့အ တွက် ကြိုးပမ်းဆောင်ရွက်သွားမည်ဟု ယုံကြည်သည်ဟု သဝဏ်လွှာတွင်ရေးသားထားသည်။

ထို့ပြင် ကရင်အမျိုးသားများသည် ရှေးပဝေသ ဏီကတည်းကပင် လူမျိုးတစ်မျိုး၏ အမှတ်အ သားလက္ခဏာရပ်ဖြစ်သည့် ကိုယ်ပိုင်ဘာသာစကား၊စာပေယဉ်ကျေးမှု၊ရိုးရာဓလေ့ထုံးတမ်းများဖြင့် လွတ်လပ်အမှီခိုကင်းစွာ နေထိုင်လာခဲ့ကြပြီး မြန်မာပြည်အတွင်းသို့ အစောဆုံးအခြေချနေထိုင်ခဲ့ကြသူများဖြစ်သည်ဟု ရေးသားထားသည်။

ထို့ကြောင့် ကရင်အမျိုးသားထုတစ်ရပ်လုံးအနေ ဖြင့် ဘိုးဘွားမိဘအစဉ်အဆက် လက်ဆင့်ကမ်းလာခဲ့သည့် သမိုင်းကြောင်း၊ဘာသာစကား၊ယဉ် ကျေးမှုစသည့် ကိုယ်ပိုင်အမျိုးသားအမှတ်အသား ဂုဏ်လက္ခဏာများကိုဂုဏ်ယူစွာ တစိုက်မတ်မတ်ထိန်းသိမ်းစောင့်ရှောက်သွားကြမည်ကို ယုံကြည်သည်ဟု PPST မှပေးပို့သည့် သဝဏ်လွှာတွင်ရေးသားထားသည်။