ကမ္ဘောဒီးယား၏ ပထမဆုံးမျောက်ကျောက်လူနာအား ပြည်ဝင်ခွင့်သုံးနှစ်ပိတ်ပင်

ကမ္ဘောဒီးယား၏ ပထမဆုံးမျောက်ကျောက်လူနာအား ပြည်ဝင်ခွင့်သုံးနှစ်ပိတ်ပင်

ကမ္ဘောဒီးယားသည် မျောက်ကျောက်ရောဂါမှ ပြန်လည်ကောင်းမွန်လာသူ အသက် ၂၇ နှစ်အရွယ် နိုင်ဂျီးရီးယားအမျိုးသားတစ်ဦးကို ပြည်နှင်ဒဏ်ပေးရန်အတွက် အမိန့်ထုတ်လိုက်သည်။ အဆိုပါအမျိုးသားသည် ဇန်နဝါရီက သက်တမ်းကုန်ဆုံးခဲ့သည့် ၎င်း၏ပညာရေးဗီဇာကြောင့် ဗိုင်းရပ်စ်ပိုးတွေ့ရှိပြီးနောက် ထိုင်းနိုင်ငံမှ ပြီးခဲ့သည့်လက ထွက်ပြေးလာခဲ့ခြင်းဖြစ်သည်။

ကမ္ဘောဒီးယား လူဝင်မှုကြီးကြပ်ရေး၏ မနေ့ကကြေငြာချက်အရ ၎င်းသည်ပြန်လည်ကောင်းမွန်လာပြီးဖြစ်ကာ မကြာမီ နိုင်ဂျီးရီးယားသို့ ပြန်ပို့ရန်စီစဉ်နေကြကြောင်းသိရှိရသည်။ထိုသူအားကမ္ဘောဒီးယားသို့ သုံးနှစ်ဝင်ရောက်ခွင့်မပြုဟု လူဝင်မှုကြီးကြပ်ရေးအရာရှိများက ပြောသည်။

ကမ္ဘောဒီးယားအရာရှိများ၏ပြောကြားချက်အရ ၎င်းသည်နိုင်ငံ၏ပထမဆုံးမျောက်ကျောက်ရောဂါပိုးရှိသူတစ်ဦးဖြစ်ကာ ထိုင်းနိုင်ငံအတွက်လည်း ပထမဆုံးလူနာဖြစ်သည်ဟုဆိုသည်။၎င်းတရားခံပြေးကို ကမ္ဘောဒီးယားအာဏာပိုင်များက ဇူလိုင် ၂၃ ရက်က ဖနွမ်းပင်မြို့တော်တွင် ဖမ်းဆီးထိန်းသိမ်းခဲ့သည်။ထိုသူသည် ဆာကေအိုမြစ်ကိုဖြတ်၍ ကမ္ဘောဒီးယားနယ်စပ်သို့ ကူးလာခဲ့သည်ဟုယုံကြည်ရကြောင်းဆိုသည်။

၎င်းကို ခမာဆိုဗီယက်ချစ်ကြည်ရေး ဆေးရုံတွင် မျောက်ကျောက်ရောဂါ ကုသမှုခံယူစေခဲ့သည်။ယခုအခါ ရောဂါသက်သာလာပြီဖြစ်ကာ သြဂုတ် ၆ ရက် စနေနေ့က ဆေးရုံမှဆင်းသွားခဲ့သည်။ဇူလိုင်လ ၂၃ ရက်နေ့တွင် ကမ္ဘာ့ကျန်းမာရေးအဖွဲ့ (WHO) က မျောက်ကျောက်ရောဂါကို “ပြည်သူ့ကျန်းမာရေး အရေးပေါ်အခြေအနေ” အဖြစ် ကြေညာခဲ့ကာ အမေရိကန်ကျန်းမာရေးဝန်ကြီးကလည်း နောက်ရက်တွင်ထပ်မံ၍ အရေးပေါ်အခြေနေကြေငြာခဲ့သည်။

“ပြောင်းလဲလာတဲ့ အခြေအနေတွေကြောင့် မျောက်ကျောက်ရောဂါအတွက် ပြည်သူ့ကျန်းမာရေး အရေးပေါ်အခြေအနေ ကြေညာပြီးပါပြီ။ဒီဗိုင်းရပ်စ်ကို နှိမ်နင်းရာမှာ နောက်တစ်ဆင့်တက်လှမ်းဖို့ ပြင်ဆင်နေပါတယ်၊အမေရိကန်ပြည်သူတွေအနေနဲ့လည်း မျောက်ကျောက်ကိုပေါ့ပေါ့ဆဆမလုပ်ကြဖို့တိုက်တွန်းလိုပါတယ်” ဟုဆိုခဲ့သည်။

ထိုင်းနိုင်ငံတွင် မျောက်ကျောက်အတည်ပြုလူနာ လေးဦးရှိပြီဖြစ်ကြောင်း သတင်းထုတ်ပြန်ထားသည်။၎င်းတို့မှာ အသက် ၂၇ နှစ်အရွယ် နိုင်ဂျီးရီးယားအမျိုးသား၊အသက် ၄၇ နှစ်အရွယ် ထိုင်းအမျိုးသား၊ထိုင်းအမျိုးသမီး၏ခင်ပွန်း အသက် ၂၅ နှစ်အရွယ်ဂျာမန်အမျိုးသားနှင့် ပြီးခဲ့သည့်သောကြာက စစ်ဆေးတွေ့ရှိခဲ့သည့် ထိုင်းအမျိုးသမီးတစ်ဦးတို့ဖြစ်သည်။

လက်ရှိတွင်ကမ္ဘာတစ်ဝန်းရှိ နိုင်ငံပေါင်း ၈၈ နိုင်ငံ၌ မျောက်ကျောက်ရောဂါကူးစက်ခံရသူ ၂၈,၂၂၀ ဦးထက်မနည်းရှိပြီး ၎င်းတို့အနက် ၈၁ ဦးမှာ ယခင်က မျောက်ကျောက်ရောဂါ ဖြစ်ပွားမှုသမိုင်းကြောင်း မရှိခဲ့ကြောင်း WHO မှသိရသည်။တစ်ကမ္ဘာလုံးမှာ နေ့စဉ်ကူးစက်မှုအသစ် ၅၀၀ ရှိသည်ဟုခန့်မှန်းရသည်။

အဆိုပါမျောက်ကျောက်ဗိုင်းရပ်စ်သည် အနာများ၊ ခန္ဓာကိုယ်မှထွက်‌သောအရည်များ၊ အသက်ရှူလမ်းကြောင်းဆိုင်ရာအမှုန်အမွှားများနှင့် ညစ်ညမ်းသောပစ္စည်းများနှင့် အနီးကပ်ထိတွေ့ခြင်းတို့မှ ကူးစက်တတ်သည်။ထိုင်းကျန်းမာရေးအာဏာပိုင်များသည် မကြာသေးမီက ထိုင်းလူမျိုးများအား နိုင်ငံခြားသားများနှင့်လိင်ဆက်ဆံခြင်းမှ ရှောင်ကြဉ်ခြင်းဖြင့် မျောက်ကျောက်ရောဂါကို ကာကွယ်နိုင်ကြောင်း အကြံပေးခဲ့သည်။

ထိုင်းနိုင်ငံ ရောဂါထိန်းချုပ်ရေးဌာန ညွှန်ကြားရေးမှူးချုပ်က ဗိုင်းရပ်စ်ပိုးသည်ခန္ဓာကိုယ်အတွင်းတွေ့ရှိခြင်းကြောင့် ကွန်ဒုံးအသုံးပြုခြင်းကလည်း ရောဂါကာကွယ်ရာတွင် အထူးထိရောက်မှုမရှိကြောင်းပြောကြားထားသည်။ထိုင်းနိုင်ငံတွင် ကူးစက်နိုင်ချေအန္တရာယ်များသော လူများအားကာကွယ်ဆေးထိုးပေးနိုင်ရန် အမေရိကမှ ကျောက်ကာကွယ်ဆေးများမှာယူထားကြောင်းသိရှိရသည်။

Source – Thaiger