ဖနောင်ပင်၊ဇန်နဝါရီ ၁
ကမ္ဘောဒီးယားသည် ၂၀၂၄ ခုနှစ်၌ မူးယစ်ဆေးနှင့်ဆက်စပ်သည့်သံသယတရားခံများဖမ်းမိမှုအပါအဝင် မူးယစ်ဆေးဖမ်းဆီးရမိမှုများပါ သိသိသာသာမြင့်တက်လာခဲ့ကြောင်း မူးယစ်ဆေးဝါးတိုက်ဖျက်ရေးဌာန၏ထုတ်ပြန်ချက်အရသိရသည်။
ကမ္ဘောဒီးယားအာဏာပိုင်များသည် ၂၀၂၄ ခုနှစ်တွင် မူးယစ်ဆေးဝါးနှင့်ပတ်သက်သည့် သံသယရှိသူ ၂၆,၀၃၃ ဦးကိုဖမ်းဆီးနိုင်ခဲ့ပြီး ယခင်နှစ်ကဖမ်းမိခဲ့သည့် ၁၉,၉၄၀ ထက် ၃၀ ဒသမ ၅ ရာခိုင်နှုန်းတိုးလာကာ ယင်းသို့ဖမ်းမိသူများအနက် ၉၅၄ ဦးသည် နိုင်ငံပေါင်း ၂၀ မှနိုင်ငံခြားသားများဖြစ်ကြောင်းလည်း အစီရင်ခံစာ၌ဖော်ပြထားသည်။
နှစ်စဉ်ထုတ်ပြန်ချက်များအရ ကမ္ဘောဒီးယား၌ ၂၀၂၃ ခုနှစ်တစ်ခုလုံးတွင် မူးယစ်ဆေးဝါး ၂ ဒသမ ၉၇ တန်သာ သိမ်းဆည်းရမိခဲ့ကြောင်းလည်းသိရသည်။သိမ်းဆည်းရမိသည့် မူးယစ်ဆေးဝါးအများစုမှာ ကက်တမင်း၊ခရစ်စတယ်မက်သာဖက်တမင်း၊မက်သာဖက်တမင်းဆေးပြားနှင့်စိတ်ကြွဆေးပြားများ၊ဘိန်းဖြူနှင့် ကိုကင်းများဖြစ်သည်ဟုဆိုသည်။
ကမ္ဘောဒီးယား၌ ဝန်ကြီးချုပ်ဟွန်မာနက် အာဏာရလာသည့် ၂၀၂၃ ခုနှစ် သြဂုတ်လမှစတင်ကာ တရားမဝင်မူးယစ်ဆေးဝါးများကိုတိုက်ဖျက်ရေးကြိုးပမ်းမှုများကိုအရှိန်မြှင့်လုပ်ဆောင်ခဲ့ပြီး နိုက်ကလပ်များနှင့် အခြားဖျော်ဖြေရေးလုပ်ငန်းများတွင် မူးယစ်ဆေးဝါး ဖြန့်ဖြူးအသုံးပြုမှုကိုတားမြစ်ရန် ပြည်နယ်နှင့် ဒေသဆိုင်ရာအာဏာပိုင်များကိုညွှန်ကြားခဲ့သည်။
သို့သော် နိုင်ငံ၏ဥပဒေအရ မူးယစ်ဆေးဝါး ရောင်းဝယ်ဖောက်ကားသူများကို သေဒဏ်ပေးခြင်းမျိုးမရှိပဲ မူးယစ်ဆေးဝါး ၈၀ ဂရမ်ထက်ပိုသော ရောင်းဝယ်ဖောက်ကားမှုဖြင့် အပြစ်ရှိကြောင်း တွေ့ရှိပါက ထောင်ဒဏ်တစ်သက်တစ်ကျွန်းအထိချမှတ်နိုင်သည်ဟုသိရသည်။
Source : ရှင်းဟွာ