(၈၃)ကြိမ်မြောက် ကျောက်ကပ်အစားထိုး ခွဲစိတ်ကုသမှုကို မန္တလေး ပြည်သူ့ဆေးရုံကြီး၌ အောင်မြင်စွာကုသပေးနိုင်ခဲ့ပြီဖြစ်ကြောင်း ကျန်းမာရေးဝန်ကြီးဌာနထံက သိရသည်။
ကျောက်ကပ်အစားထိုးခွဲစိတ်ကုသမှုအဖြစ် မန္တလေးတိုင်း၊ ပြည်ကြီးတံခွန် မြို့နယ်တွင် နေထိုင်သူ အသက် (၂၆)နှစ်အရွယ်ရှိ အမျိုးသားလူနာနှင့် ၎င်း၏ ဇနီးဖြစ်သူ အသက် (၂၆)နှစ်အရွယ်ရှိကျောက်ကပ်အလှူရှင်တို့ နှစ်ဦးအား ခွဲစိတ်ကုသခဲ့ခြင်းဖြစ်ပြီး ခွဲစိတ်ကုသမှုကို ဖေဖော်ဝါရီ(၂၀)ရက် နံနက် (၉)နာရီ (၂၂)မိနစ်အချိန်မှ စတင်ဆောင်ရွက်ခဲ့ကာ မွန်း လွဲ (၂)နာရီ (၄၅)မိနစ်အချိန်တွင် အောင်မြင်စွာ ပြီးစီးခဲ့ခြင်းဖြစ်သည်။
လက်ရှိတွင် ကျောက်ကပ်အစားထိုး ခွဲစိတ်ကုသမှုခံယူခဲ့သည့် လူနာနှင့် ကျောက်ကပ်အလှူရှင်တို့၏ ခွဲစိတ်ပြီးကျန်းမာရေးအခြေအနေမှာ ကောင်းမွန်လျက်ရှိပြီး ဘာသာရပ်ဆိုင်ရာပါမောက္ခ/ အထူးကုဆရာဝန်ကြီးများ၊ ကျွမ်းကျင်သူနာပြုများက လိုအပ်သော ပြုစုကုသမှုများကို အနီးကပ် ဆက်လက် ဆောင်ရွက်ပေးလျက်ရှိကြောင်း သိရသည်။
ကျန်းမာရေးဝန်ကြီးဌာနသည် ပြည်သူများလိုအပ်သော နိုင်ငံတကာအဆင့်မီကုသမှုများကို ပြည်တွင်း၌ လက်လှမ်းမီ ရရှိနိုင်ခြင်းဖြင့် ပြည်သူများ ဆေးကုသမှုအတွက် စိုက်ထုတ်ကုန်ကျစရိတ် သက်သာစေရေးနှင့် ပြည်သူ့ဆေးရုံများ၏ ကုသမှုအရည်အသွေးတိုးတက်စေရေးအတွက် လုပ်ငန်းစဉ်များချမှတ် ဆောင်ရွက်လျက်ရှိရာ မန္တလေးပြည်သူ့ဆေးရုံကြီး၌ (၈၃)ကြိမ်မြောက် ကျောက်ကပ် အစားထိုးခွဲစိတ်ကုသမှုအောင်မြင်ခဲ့ခြင်းဖြစ်သည်ဟုဆိုသည်။
မန္တလေးပြည်သူ့ဆေးရုံကြီး၌ ကျောက်ကပ်အစားထိုးခွဲစိတ်ကုသမှုကို ၂၀၀၁ ခုနှစ်မှ စတင်ဆောင်ရွက်ခဲ့ပြီး၂၀၂၀ ပြည့်နှစ်၊ မတ်လ၌ (၈၂)ကြိမ်မြောက်အဖြစ် ကျောက်ကပ်အစားထိုးခွဲစိတ် ကုသမှုဆောင်ရွက်ပြီးနောက် ကိုဗစ်-၁၉ ကပ်ရောဂါဖြစ်ပွားမှု အခြေအနေများကြောင့် ယာယီရပ်နားခဲ့ရကာ ယခု (၈၃)ကြိမ်မြောက်အဖြစ် ပြန်လည်စတင်နိုင်ခဲ့ခြင်းဖြစ်ကြောင်း သိရသည်။
ကျောက်ကပ်အစားထိုး ခွဲစိတ်ကုသမှုများကို ပြည်သူ့ဆေးရုံများအနေဖြင့် အထူးကုဆေးရုံကြီး(ခုတင် ၅၀၀) ရန်ကုန်၊ နေပြည်တော်ပြည်သူ့ဆေးရုံကြီး (ခုတင်၁၀၀၀)နှင့် မန္တလေးပြည်သူ့ဆေးရုံကြီးတို့၌ လည်းကောင်း၊ တပ်မတော်ဆေးရုံများအနေဖြင့် ရန်ကုန်ရှိ အမှတ် (၁)တပ်မတော်ဆေးရုံ(ခုတ င် ၁၀၀၀)၊ နေပြည်တော်ရှိ အမှတ်(၂)တပ်မတော်ဆေးရုံ (ခု တင် ၁၀၀၀)၊ ပြင်ဦးလွင်ရှိ အမှတ်(၁) တပ်မတော် ဆေးရုံ (ခုတင် ၇၀၀)နှင့် အောင်ပန်းရှိအမှတ်(၂) တပ်မတော်ဆေးရုံ (ခုတင် ၇၀၀)တို့၌လည်းကောင်း၊ ပုဂ္ဂလိကဆေးရုံများအနေ ဖြင့် ရန်ကုန်ရှိ ပန်းလှိုင်ဆေးရုံနှင့် ကန်သာယာဆေးရုံတို့၌ လည်းကောင်း ဆောင်ရွက်ပေးလျက်ရှိကြောင်း သိရသည်။