၂၀၂၃ ခုနှစ် ဖေဖော်ဝါရီလမှ ဇူလိုင်လ (၂၂)ရက်အထိ ပြည်ပသို့ ပြောင်းတန်ချိန် (၁ ဒသမ ၅) သန်းကျော်တင်ပို့ထားကြောင်း မြန်မာနိုင်ငံပြောင်းလုပ်ငန်းရှင်များအသင်းမှ သိရသည်။
ပို့ကုန်များထဲတွင် ပေါ်ပြူလာဖြစ်နေသည့် မြန်မာ့ ပြောင်းတန်ချိန် (၁ ဒသမ ၅) သန်းကျော်ကို ထိုင်း၊ တရုတ်၊ အိန္ဒိယ၊ ဗီယက်နမ်၊ ဖိလစ်ပိုင်၊ ဘင်္ဂလားဒေ့ရှ် နိုင်ငံများသို့ တင်ပို့ထားကြောင်း သိရသည်။
ယခုဘဏ္ဍာနှစ်တွင် မြန်မာ့ပြောင်းများကို ဘင်္ဂလားဒေ့ရှ်နိုင်ငံသို့ စမ်းသပ်တင်ပို့ထားရာ ဈေးကွက် အလားအလာကောင်းများရရှိလာမည့် အသံများထွက်ပေါ်နေသည်။
“အဓိကတော့ border trade နဲ့ ထိုင်းနိုင်ငံကို သွားတာဖြစ်ပါတယ်။ တင်ပို့မှု ၆၀ ရာခိုင်နှုန်းကလည်း သူ့ဆီပဲသွားတာလေ။ ဒါပေမဲ့ ထိုင်းနိုင်ငံကို နယ်စပ်ကုန်သွယ်ရေးက သွားတာရှိသလို ပင်လယ်ရေကြောင်းကနေလည်း သွားတာရှိပါတယ်။ အခြားကုန်သွယ်ဖက် နိုင်ငံအနေနဲ့ border trade နဲ့ သွားတာဆိုရင်တရုတ်ကိုရှိမယ်။ပုံမှန်လမ်းကြောင်းကနေဆိုရင် အိန္ဒိယရှိမယ်။ ဖိလစ်ပိုင်ရှိမယ်။ ဗီယက်နမ်ရှိမယ်။ ဘင်္ဂလားဒေ့ရှ်ရှိမယ်။ ဒီဘဏ္ဍာနှစ်မှာက ဘင်္ဂလားဒေ့ရှ်ကို စမ်းသပ်တင်ပို့တာဖြစ်ပါတယ်”ဟု မြန်မာနိုင်ငံပြောင်းလုပ်ငန်းရှင်အသင်းမှ ဂုဏ်ထူးဆောင် နာယက ဦးမင်းခိုင်က ပြောသည်။
ထိုင်းနိုင်ငံက မြန်မာ့ပြောင်းများကို ဖေဖော်ဝါရီ(၁)ရက်နှင့် ဩဂုတ် (၃၁)ရက်ကြား အခွန်ကင်းလွတ်ခွင့်ဖြင့် တင်သွင်းသဖြင့် ထိုကာလအတွက် အလုအယက်ပို့ကြသည်။
ကျန်ကာလများတွင်မူ ၎င်းနိုင်ငံက တောင်သူများကို ကာကွယ်ရန်အတွက် အခွန်စည်းကြပ်မှုကို ၇၃ ရာခိုင်နှုန်းအထိ သတ်မှတ်လုပ်ဆောင်ထားသည်။
“မြန်မာ့ပြောင်း အရည်အသွေးကကောင်းပါတယ်၊ ပြောင်းစျေးလည်းပေါပါတယ် ၊ စျေးပိုရမယ့်အမျိုးအစားမျိုးရွေးစိုက်နိုင်ရင်ပိုကောင်းမှာပါ”ဟု ကုန်သည်တစ်ဦးကဆိုသည်။
အခွန်ကောက်ခံသည့် စက်တင်ဘာလမှ ဇန်နဝါရီလကုန်ထိ ကြားကာလများ၌ မြန်မာ့ ပြောင်းဆံများကို အမှုန့်လုပ်၍ တင်ပို့မှုရှိသော်လည်း အမှုန့်လုပ်တင်ပို့ရာတွင် အခက်အခဲရှိနေသေးသဖြင့် မြန်မာ့ပြောင်းကို အခွန်လွတ်စနစ်ဖြင့် တစ်နှစ်ပတ်လုံး တင်ပို့ခွင့်ရပါက ပိုမိုကောင်းမွန်သည်ဟု ကုန်သည်များကပြောဆိုထားသည်။