မလေးရှားနိုင်ငံ၌ ယနေ့မေလ၂၆ရက် တနင်္လာနေ့တွင် ၄၆ ကြိမ်မြောက် အရှေ့တောင်အာရှနိုင်ငံများအသင်း (အာဆီယံ) ထိပ်သီးအစည်းအဝေးကျင်းပနေပြီဖြစ်သည်။
ဒေသတွင်းနှင့် ကမ္ဘာလုံးဆိုင်ရာ ကိစ္စရပ်များ အထူးသဖြင့် အမေရိကန်၏ အကောက်ခွန်ကိစ္စ၊ မြန်မာပဋိပက္ခနှင့် တောင်တရုတ်ပင်လယ်ရှိ ရေပိုင်နက် အငြင်းပွားမှုများကို ဆွေးနွေးကြမည်ဖြစ်သည်။
“အားလုံးပါဝင်မှုနှင့် ရေရှည်တည်တံ့ခိုင်မြဲရေး” ခေါင်းစဉ်ဖြင့်ကျင်းပသည့် နှစ်ရက်ကြာ ထိပ်သီးဆွေးနွေးပွဲသည် အာဆီယံနှင့် ပင်လယ်ကွေ့ပူးပေါင်းဆောင်ရွက်ရေးကောင်စီ (GCC) တို့၏ ဒုတိယအကြိမ် ထိပ်သီးအစည်းအဝေးနှင့်လည်း တို-က်ဆိုင်နေသလို GCC နှင့် တရုတ်နိုင်ငံတို့ ပူးပေါင်းကျင်းပသည့် ထိပ်သီးအစည်းအဝေးလည်းရှိနေပြန်သည်။
အာဆီယံအဖွဲ့ဝင် ၁၀ နိုင်ငံသည် စီးပွားရေး ပူးပေါင်းဆောင်ရွက်မှု၊ လုံခြုံရေးနှင့် ရေရှည်တည်တံ့ခိုင်မြဲသော ဖွံ့ဖြိုးတိုးတက်မှု အပါအဝင် ဒေသတွင်းအရေးကိစ္စများကို ဆွေးနွေးမည်ဖြစ်သည်။
လုံခြုံရေးအတွက် ရဲအရာရှိ (၆၀၀၀) ကျော်ကို လေဆိပ်များ၊ ဟိုတယ်များနှင့် ကွန်ဗင်းရှင်းစင်တာများတွင် တပ်စွဲထားသည်။
အလှည့်ကျသဘာပတိအဖြစ် မလေးရှားဝန်ကြီးချုပ် အန်ဝါအီဘရာဟင်က ထိပ်သီးအစည်းအဝေး ဥက္ကဋ္ဌအဖြစ် ဆောင်ရွက်မည်ဖြစ်ကြောင်း အာဆီယံအတွင်းရေးမှူးချုပ်ရုံးကထုတ်ပြန်ထားသည်။
အာဆီယံသည် ၎င်း၏ငွေကြေးရန်ပုံငွေကို မ,တည်ရန်နှင့် ဒေသတွင်းဘဏ္ဍာရေးလုံခြုံမှုကို မြှင့်တင်မည့် စိတ်ကူးတို့ကို ပြန်လည်အသက်သွင်းနေပြီဟု အန်ဝါက မလေးမေးလ်သတင်းစာတွင် ထိပ်သီးစည်းဝေးပွဲမတိုင်မီ ပြောထားသည်။
အင်္ဂါနေ့တွင် တရုတ်ဝန်ကြီးချုပ် လီချန်၊ ဘာရိန်း၊ ကူဝိတ်၊ အိုမန်၊ ကာတာ၊ ဆော်ဒီအာရေးဗီးယားနှင့် ယူအေအီးတို့ ပါဝင်သော GCC မှ ခေါင်းဆောင်များနှင့် ထိပ်သီးဆွေးနွေးပွဲကျင်းပမည်ဖြစ်သည်။
တရုတ်-အာဆီယံ လွတ်လပ်သောကုန်သွယ်မှုနယ်မြေ ဗားရှင်း 3.0 အတွက် ဘေဂျင်းနှင့် အာဆီယံတို့သည် ဗုဒ္ဓဟူးနေ့တွင် ညှိနှိုင်းကြမည်ဖြစ်သည်။
ပြီးခဲ့သည့်လက အမေရိကန် သမ္မတထရမ့် မှ အခွန်ကိစ္စ ရက် (၉၀) ဆိုင်းငံ့ထားရန် ကြေညာခဲ့သော်လည်း အာဆီယံနိုင်ငံများသည် အမေရိကန်၏ အခွန်စည်းကြပ်မှုဒဏ်ကို (၁၀)ရာခိုင်နူန်းမှ ၄၉ ရာခိုင်နူန်းအထိ ထိခို-က်ခံစားခဲ့ရသည်။
Ref:aa.com.tr