နီပေါနိုင်ငံက အိမ်ရှင်နိုင်ငံအဖြစ် ကျင်းပပြုလုပ်မည့် (၄) နိုင်ငံ အုပ်စုပတ်လည် အမျိုးသမီး ဖိတ်ခေါ်ဘောလုံးပြိုင်ပွဲကို ယခုလဖေဖော်ဝါရီ (၁၇)ရက်မှ (၂၆)ရက်အထိ ကျင်းပမည်ဖြစ်ရာ မြန်မာအမျိုးသမီးလက်ရွေးစင်ဘောလုံးအသင်း သွားရောက်ယှဉ်ပြိုင် ကစားမည်ဖြစ်ကြောင်း သိရသည်။
ပြိုင်ပွဲအတွင်း အိမ်ရှင် နီပေါ၊ ကာဂျစ်စတန်၊ လက်ဘနွန်နှင့်မြန်မာအသင်းတို့ယှဉ်ပြိုင်ကစားကြမည်ဖြစ်ပြီး၊ အုပ်စုပွဲဦး ထွက်အနေဖြင့် ဖေဖော်ဝါရီ(၁၇)ရက်တွင် မြန်မာနှင့် လက်ဘနွန်၊ နီပေါနှင့် ကာဂျစ်စတန်အသင်းတို့ ယှဉ်ပြိုင်ကစားသွားကြမည်ဖြစ်သည်။
ထို့နောက် ဖေဖော်ဝါရီ (၂၀)ရက်တွင်မြန်မာနှင့် ကာဂျစ်စတန် ၊ လက်ဘနွန်နှင့်နီပေါတို့ ယှဉ်ပြိုင်ကစားကြမည်ဖြစ်ကာ ဖေဖော်ဝါရီ (၂၃)ရက်၌ နီပေါနှင့် မြန်မာတို့ ယှဉ်ပြိုင်ကစားကြမည်ဖြစ်ပြီး ဖေဖော်ဝါရီ (၂၆)ရက်တွင် လေးသင်းပတ်လည်မှ အမှတ်အများဆုံးရရှိသည့် အသင်း(၂)တို့ ဗိုလ်လုပွဲကစားသွားကြမည်ဖြစ်သည်။
မြန်မာလက်ရွေးစင် အမျိုးသမီးအသင်းသည် ပြိုင်ပွဲမတိုင်မီ အိန္ဒိယ အသင်းနှင့် ခြေစမ်းကစားခဲ့ကြပြီး ပထမအကျော့ခြေစမ်းပွဲတွင် အနိုင်ရရှိကာ ဒုတိယခြေစမ်းပွဲတွင် သရေရလဒ်ထွက်ပေါ်ထားသည်။
ထို့ပြင် ဟောင်ကောင်အသင်းနှင့် ခြေစမ်းပွဲ ကစားရာ၌လည်း နှစ်ကျော့ပေါင်း (၄)ဂိုး(၁) ဖြင့် အနိုင်ရလဒ်ထွက်ပေါ်ထားသည်။
လက်ရှိ လေးနိုင်ငံ အမျိုးသမီးဖိတ်ခေါ်ဘောလုံးပြိုင်ပွဲအတွင်း ပါဝင်မည့် အသင်း (၄)သင်းမှာ FIFA ၏ ကမ္ဘာ့အဆင့်သတ်မှတ်ချက်တွင် နီပေါအသင်း (၁၀၃) အဆင့်၊ ကာဂျစ်စတ န် (၁၂၈)၊ လက်ဘနွန် (၁၃၄) နှင့် မြန်မာ(၅၅)အဆင့်များဖြင့် ရပ်တည်နေကြသည့် အသင်းများဖြစ်သည်။
မြန်မာလက်ရွေးစင် အမျိုးသမီးအသင်း ပဏာမကစားသမား (၃၂)ဦးဖြင့်ဖွဲ့စည်းပြင်ဆင်ထားပြီး ဖေဖော်ဝါရီ (၁၄) ရက်တွင် နီပေါနိုင်ငံသို့ ထွက်ခွာမည်ဖြစ်သည်။
ပြိုင်ပွဲအတွင်း အိန္ဒိယ ပြည်တွင်းကလပ်၌ သွားရောက်ကစားနေသည့် တိုက်စစ်မှူး ဝင်းသိင်္ဂီထွန်းနှင့် မကြာမီအချိန်က မြန်မာ့လက်ရွေးစင်အသင်းသို့ ခေါ်ယူထားသည့် မေထက်လူတို့ ပါဝင်မည်ဖြစ်ကြောင်း သိရသည်။