၂၀၂၂ နောက်ပိုင်းပထမဆုံးအကြိမ်အဖြစ်ပူတင်နှင့် မက်ခရွန် ဖုန်းပြောဆို

         
ရုရှားသမ္မတ ဗလာဒီမာ ပူတင်နှင့် ပြင်သစ်သမ္မတ အီမန်နျူဝယ် မက်ခရွန်တို့သည် ၂၀၂၂ ခုနှစ်နောက်ပိုင်း ၌ ပထမဆုံး အကြိမ်အဖြစ် အင်္ဂါနေ့တွင် ဖုန်းဆက်သွယ်ပြောဆိုခဲ့ကြပြီး အရှေ့အလယ်ပိုင်းအရေးနှင့် ယူကရိန်းအရေးတို့ကို ဆွေးနွေးခဲ့သည်ဟု ခရမ္မလင်က သတင်းထုတ်ပြန်ခဲ့သည်။
      
  ခေါင်းဆောင်နှစ်ဦးသည် ငြိမ်းချမ်းသော နျူကလီးယားစွမ်းအင် ဖွံ့ဖြိုးတိုးတက်ရေးဆိုင်ရာ အီရန်၏ တရားဝင် အခွင့်အရေးကို လေးစားရန်၊ နိုင်ငံတကာ အဏုမြူစွမ်းအင်အေဂျင်စီနှင့် ပူးပေါင်းဆောင်ရွက်ခြင်း အပါအဝင် နျူကလီးယားလက်နက်များ မပြန့်ပွားရေးသဘောတူစာချုပ်ပါ ကတိကဝတ်များကို ဆက်လက်စောင့်ထိန်းရန် အရေးကြီးကြောင်းကို အလေးပေးပြောကြားခဲ့ကြသည်ဟု သတင်းထုတ်ပြန်ချက်တွင် ခရမ္မလင်က ပြောဆိုထားသည်။
           
အီရန်၏ နျူကလီးယားအစီအစဉ်နှင့်ပတ်သက်သော အကျပ်အတည်းနှင့် အရှေ့အလယ်ပိုင်းရှိ အခြားပဋိပက္ခများကို နိုင်ငံရေး၊ သံတမန်ရေးနည်းလမ်းများဖြင့်သာ ဖြေရှင်းရန်ကို ခေါင်းဆောင်နှစ်ဦးက အလေးပေး ပြောဆိုခဲ့ကြသည်။
         
ယူကရိန်းအရေးနှင့် ပတ်သက်၍ ပူတင်က ပြောဆိုခဲ့ရာတွင် ယူကရိန်းပဋိပက္ခသည် အနောက်တိုင်း မူဝါဒများ၏ တိုက်ရိုက်အကျိုးဆက်ဖြစ်ကြောင်းနှင့် ယင်းကဲ့သို့ မူဝါဒများသည် ယူကရိန်းကို ခေတ်မီလက်နက်အမျိုးမျိုး ပံ့ပိုးပေးခြင်းအားဖြင့် ယခုအခါ ရန်လိုမှုကို ရှည်ကြာစေခဲ့သည်ဟု ပြောကြားခဲ့သည်။
         
ငြိမ်းချမ်းစွာ ပြေလည်မှုရရေး အလားအလာနှင့် ပတ်သက်၍ ပူတင်က ယူကရိန်း အကျပ်အတည်း၏ မူလဇစ်မြစ်ကို ဖြေရှင်းရန်နှင့် လက်ရှိပကတိ နယ်မြေသစ်များအရေး ကို ထည့်သွင်းစဉ်းစားခြင်းဖြင့် ကျယ်ပြန့်၍ ရေရှည်ခိုင်မြဲသော ဖြေရှင်းချက် ရရှိရေး ကို အလေးပေး ပြောကြားခဲ့သည်။ Ref: ရှင်းဟွာ