ရန်ကုန်တိုင်းဒေသကြီး ပုဂ္ဂလိကသယ်ယူပို့ဆောင်ရေးကြီးကြပ်မှုကော်မတီ(YRTC) ၂၀၂၂ ခုနှစ်အတွက် YBS စံပြယာဥ်မောင်းဆုနှင့်တာဝန်သိယာဥ်မောင်းဆုများအား ဇန်နဝါရီ ၂၇ ရက်(ယနေ့) နံနက် ၁၀ နာရီက ချီးမြှင့်ပေးအပ်ခဲ့သည်။
“YRTC ရဲ့ဆောင်ပုဒ်ဖြစ်တဲ့ “Safe Public Transportation to All” အတိုင်း ၂၀၂၂ ခုနှစ်အတွင်းမှာ ခရီးသွားလုပ်သားပြည်သူတွေ လိုရာခရီးကိုဘေးကင်းလုံခြုံအောင် ပို့ဆောင်ရာမှာ တာဝန်ကျေပွန်စွာထမ်းဆောင်ပေးခဲ့ကြတဲ့ စံပြ YBS ယာဥ်မောင်းတွေကိုဆုချီးမြှင့်ပေးတာပါ”ဟု YRTC ၏ ဒု-ဥက္ကဋ္ဌဦးချစ်ကိုကိုကပြောသည်။
စံပြယာဉ်မောင်းဆုရရှိသူ YBS ယာဥ်မောင်း ၅၃ ဦးအား တစ်ဦးလျင်ဆုကြေးငွေကျပ် ၄၀၀၀၀၀ သိန်းနှင့်ဂုဏ်ပြုမှတ်တမ်းလွှာ၊ တာဝန်သိ YBS ယာဉ်မောင်း ၃၀ ဦးအား တစ်ဦးလျင်ဆုကြေးငွေကျပ် ၂၀၀၀၀၀ သိန်းနှင့်ဂုဏ်ပြုမှတ်တမ်းလွှာများအား ချီးမြှင့်ပေးအပ်ခဲ့သည်။
ထို့ပြင် စံပြယာဥ်မောင်းဆုနှင့်တာဝန်သိယာဥ်မောင်းဆုများရရှိခဲ့ကြသည့် YBS ယာဥ်မောင်းများအား YBPC Co., Ltd ၊ လူထုမိတ်ဆွေကုမ္ပဏီ၊ Asia Starmar Transport Intelligent Co., Ltd, နှင့် Super One Co., Ltd တို့မှလည်း ဂုဏ်ပြုလက်ဆောင်များချီးမြှင့်ပေးခဲ့သည်။
“YBS ယာဥ်လိုင်းတွေကနေ နေ့စဥ် ကားစီးရေ ၃၅၀၀ ကျော်လောက်နဲ့ခရီးသည်တွေကို တင်ဆောင်ပြေးဆွဲပေးနေပါတယ် အဲဒီထဲကမှ ခရီးသွားတွေကို စိတ်ချမ်းချမ်းသာသာနဲ့သွားလာနိုင်အောင်ပြေးဆွဲပေးခဲ့တဲ့ ယာဥ်မောင်းကြီးတွေကို ၂၀၂၂ ခုနှစ်အတွက် စံပြယာဥ်မောင်းဆုနဲ့တာဝန်သိယာဥ်မောင်းဆုပေးအပ်ချီးမြှင့်တာပါ”ဟု YRTC ၏တွဲဖက်အတွင်းရေးမှူးဦးလျန်ကျင့်မန်ကပြောသည်။
စံပြယာဥ်မောင်းဆုနှင့်တာဝန်သိယာဥ်မောင်းဆုများရွေးချယ်ရာ၌ ယာဥ်စည်းကမ်းလမ်းစည်းကမ်းအတိုင်းမောင်းနှင်သည့် ယာဥ်မောင်းများအနက် ဒဏ်ကြေး၊သတိပေးခံရခြင်းမရှိသည့် ယာဥ်မောင်းများနှင့်တာဝန်သိသိဖြင့် ဝန်ဆောင်မှုကောင်းသည့် ယာဥ်မောင်းများ၊ခရီးသည်များကျန်ခဲ့သည့်ပစ္စည်းများအား တာဝန်သိစွာဖြင့် ပြန်လည်ပေးအပ်သော ယာဥ်မောင်းများအား ရွေးချယ်ချီးမြှင့်ခြင်းဖြစ်ကြောင်း YRTC ၏တွဲဖက်အတွင်းရေးမှူးဦးလျန်ကျင့်မန်၏ ပြောကြားချက်အရ သိရသည်။
