၂ဝ၂၂ ခုနှစ် တက္ကသိုလ်ဝင်စာမေးပွဲအောင်မြင်သူများ သြဂုတ် ၁၈ ရက်မှစက်တင်ဘာ ၂ ရက်အထိ တက္ကသိုလ်ဝင်ခွင့်လျှောက်ထားနိုင်
၂၀၂၂ ခုနှစ် တက္ကသိုလ်ဝင်စာမေးပွဲအောင်မြင်သူများ သြဂုတ် ၁၈ ရက်မှစက်တင်ဘာ ၂ ရက်အထိ တက္ကသိုလ်ဝင်ခွင့် လျှောက်ထားနိုင်ကြောင်း ပညာရေးဝန်ကြီးဌာနက အသိပေးထုတ်ပြန်ခဲ့သည်။
ထို့ကြောင့် တက္ကသိုလ်ဝင်ခွင့်လျှောက်ထားမည့်သူများသည် မိမိတို့စာမေးပွဲဖြေဆိုခဲ့သည့် စာစစ်ဌာနကြီးကြပ်ရေးမှူးများ(အခြေခံပညာအထက် တန်းကျောင်းအုပ်ကြီးများ)ထံတွင် အမှတ်စာ ရင်း၊ အရည်အချင်းမှတ်တမ်းချုပ်ရမှတ်အဆင့်၊ တက္ကသိုလ်ဝင်ခွင့်လမ်းညွှန်စာအုပ်နှင့်တက္ကသိုလ်ဝင်ခွင့်လျှောက်ထားရမည့်ပုံစံစာအိတ်တို့အား ဩဂုတ် ၁၈ ရက်မှစတင်၍ ကိုယ်တိုင်ထုတ်ယူရမည်ဖြစ်သည်။
ထိုသို့ ထုတ်ယူပြီးနောက် တက္ကသိုလ်ဝင်ခွင့်များအား ဩဂုတ် ၁၈ ရက်မှစက်တင်ဘာ ၂ ရက်အထိ စနေနေ့တနင်္ဂနွေနေ့နှင့်ရုံးပိတ်ရက်များ အပါအဝင်(ပိတ်ရက်မရှိ)လျှောက်ထားနိုင်ကြောင်း သိရသည်။
ထိုသို့ လျှောက်ထားရာတွင် မြစ်ကြီးနားတက္ကသိုလ်၊လွိုင်ကော်တက္ကသိုလ်၊ဘားအံတက္ကသိုလ်၊ဟားခါးတက္ကသိုလ်၊မုံရွာတက္ကသိုလ်၊ရွှေဘိုတက္ကသိုလ်၊စစ်ကိုင်းတက္ကသိုလ်၊ထားဝယ်တက္ကသိုလ်၊တောင်ငူတက္ကသိုလ်၊ပြည်တက္ကသိုလ်၊ပဲခူးတက္ကသိုလ်၊မကွေးတက္ကသိုလ်နှင့်ပခုက္ကူတက္ကသိုလ်တို့တွင် လျှောက်ထားနိုင်ကြောင်း ပညာရေးဝန်ကြီးဌာနက အသိပေးထုတ်ပြန်ခဲ့သည်။
အလားတူ မန္တလေးအဝေးသင်တက္ကသိုလ်၊မိတ္ထီလာတက္ကသိုလ်၊ကျောက်ဆည်တက္ကသိုလ်၊မော်လမြိုင်တက္ကသိုလ်၊စစ်တွေတက္ကသိုလ်၊တောင်ကုတ်တက္ကသိုလ်၊ရန်ကုန်အဝေးသင်တက္ကသိုလ်၊တောင်ကြီးတက္ကသိုလ်၊လားရှိုးတက္ကသိုလ်၊ကျိုင်းတုံတက္ကသိုလ်၊ပုသိမ်တက္ကသိုလ်၊ဟင်္သာတတက္ကသိုလ်နှင့်မအူပင်တက္ကသိုလ်တို့တွင်လည်း လျှောက်ထားနိုင်ကြောင်း သိရသည်။
ယင်းသို့ လျှောက်ထားရာတွင်လည်း သတ်မှတ်ရက်ထက်ကျော်လွန်ပြီးမှ လျှောက်ထားသူများသည် ကမာရွတ်မြို့နယ်၊သထုံလမ်းရှိ အဆင့်မြင့်ပညာဦးစီးဌာန(ရန်ကုန်ရုံးခွဲ)သို့ ပေးပို့လျှောက်ထားရမည်ဖြစ်သည်။
ထို့ကြောင့် တက္ကသိုလ်ဝင်ခွင့်လျှောက်ထားမှုအားအသေးစိတ်သိရှိလိုပါက ကမာရွတ်မြို့နယ်၊သထုံလမ်းရှိ အဆင့်မြင့်ပညာဦးစီးဌာန(ရန်ကုန်) ဖုန်း-၀၁၇-၅၃၇၆၇၇ နှင့် ၁၁၇-၅၂၅၆၁၂ ၊ ၀၁၇-၅၀၃၁၄၇ တို့သို့ဆက်သွယ်စုံစမ်းနိုင်ကြောင်း သိရသည်။