တရုတ်နှင့် မြောက်ကိုရီးယားနိုင်ငံတို့သည် အရေးပါသော နိုင်ငံတကာနှင့် ဒေသဆိုင်ရာ ကိစ္စရပ်များနှင့် ဆက်သွယ်ရေးနှင့် ညှိနှိုင်းဆောင်ရွက်မှုကို ပိုမိုမြှင့်တင်သင့်ကြောင်းကို သောကြာနေ့က မြောက်ကိုရီးယားခေါင်းဆောင် ကင်မ်ဂျုံအန်နှင့် တွေ့ဆုံစဉ် တရုတ်နိုင်ငံခြားရေးဝန်ကြီး ဝမ်ယိက ပြောကြားခဲ့သည်ဟု တရုတ်နိုင်ငံဘက်မှသတင်းထုတ်ပြန်ချက်တစ်ခုတွင် ဖော်ပြခဲ့သည်။
ကင်မ်သည် မော်စကိုနှင့် ဆက်ဆံရေးကို မြှင့်တင်နေခဲ့မှုနှင့် ကိုဗစ်-၁၉ ကပ်ရောဂါကြောင့် နှစ်ဖက်အပြန်အလှန်ဆက်ဆံမှုများ ရပ်တန့်သွားခဲ့ပြီးနောက် နှစ်နိုင်ငံအကြား ဆက်ဆံရေးတိုးမြှင့်ရန် ရည်ရွယ်၍ ကြာသပတေးနေ့မှစကာ ဝန်ကြီးဝမ်ယိ ပြုံယမ်းသို့ နှစ်ရက်ကြာခရီး ရောက်ရှိနေခဲ့ခြင်းဖြစ်သည်။
“နိုင်ငံတကာအခြေအနေတွေ ရှုပ်ထွေးပြီး မငြိမ်သက်ဖြစ်နေတဲ့အချိန်မှာ တရုတ်နဲ့ မြောက်ကိုရီးယားတို့ဟာ အဓိကကျတဲ့ နိုင်ငံတကာနဲ့ ဒေသတွင်း ကိစ္စရပ်တွေမှာ ဆက်သွယ်ရေးနဲ့ ညှိနှိုင်းဆောင်ရွက်မှုကို ပိုမိုအားကောင်းအောင် ဆောင်ရွက်သင့်ပါတယ်” ဟု ဝမ်က ကင်မ်ကို ပြောခဲ့ကြောင်း တရုတ်နိုင်ငံခြားရေးဝန်ကြီးဌာန၏ ထုတ်ပြန်ချက်တွင် ဖော်ပြထားသည်။
နှစ်နိုင်ငံအကြား အဆင့်အသီးသီးတွင် အပြန်အလှန်ဆက်ဆံမှုနှင့် ဆက်သွယ်မှု ပိုမိုအားကောင်းရန် လိုအပ်ကြောင်း ကင်မ်ကလည်း အလေးပေးပြောကြားခဲ့ကာ ဘုံအကျိုးစီးပွားများကို ကာကွယ်ရန်အတွက် ဆက်ဆံရေးပိုမိုခိုင်မာရန် အရေးကြီးကြောင်း ဆက်လက်ပြောကြားခဲ့သည်ဟု မြောက်ကိုရီးယားနိုင်ငံပိုင် ကေစီအင်န်အေ သတင်းဌာနက စနေနေ့တွင် သတင်းဖော်ပြခဲ့သည်။
ဝမ်သည် ကြာသပေတေးနေ့တွင် မြောက်ကိုရီးယားနိုင်ငံခြားရေးဝန်ကြီးနှင့် တွေ့ဆုံခဲ့ပြီး ပြုံယမ်းနှင့် နှစ်နိုင်ငံဆက်ဆံရေးဖွံဖြိုးတိုးတက်မှုတွင် အပြုသဘောဆောင်သော အရှိန်အဟုန်ကို ဆက်လက်ခိုင်မာစေရန် ကတိပြုခဲ့သည်။
အမေရိကန်သမ္မတ ဒေါ်နယ်ထရမ့်ပ်သည် လာမည့်လတွင် တရုတ်နိုင်ငံသို့ သွားရောက်လည်ပတ်ရန် မျှော်လင့်ရသည်။ ထရမ့်ပ်သည် မြောက်ကိုရီးယားခေါင်းဆောင် ကင်မ်နှင့် ဆွေးနွေးပွဲများ ပြန်လည်စတင်ရန် စိတ်ဝင်စားကြောင်းကို ယခင်က ပြသထားသည်။
Ref: သယ်စထရိတ်တိုင်းမ်စ်