ဥရောပတပ်များကိုအကြမ်းဖက်အဖွဲ့အစည်းများအဖြစ်အီရန်ကကြေညာ

အီရန်နိုင်ငံသည် ဥရောပနိုင်ငံများ၏ စစ်တပ်များကို အကြမ်းဖက်အဖွဲ့များအဖြစ် ကြေညာကြောင်း လွှတ်တော်ဥက္ကဌက ပြောကြားခဲ့သည်။ အီရန်တော်လှန်ရေးအစောင့်တပ် (အိုင်အာဂျီစီ) ကို အလားတူသတ်မှတ်ရန် အီးယူက ဆုံးဖြတ်ခဲ့ပြီးနောက်တွင် အီရန်၏ ကြေညာချက်ထွက် ပေါ်လာခြင်းဖြစ်သည်။

အိုင်အာဂျီစီကို အကြမ်းဖက်အဖွဲ့အစည်းအဖြစ် ကြေညာချက်ကို ဆန့်ကျင်သည့် တန်ပြန်အစီအမံများဆိုင်ရာ ဥပဒေပုဒ်မ ၇ အရ ဥရောပနိုင်ငံများ၏ စစ်တပ်များကို အကြမ်းဖက်အဖွဲ့များအဖြစ် သတ်မှတ်သည်ဟု စည်းလုံးညီညွတ်ခြင်းကို ပြသသည့်အနေဖြင့် အစောင့်တပ်ယူနီဖောင်းကို ဝတ်ဆင်ထားသည့် လွှတ်တော်ဥက္ကဌ မိုဟာမက် ဘာဂါ ဂါလီဘတ်ဖ်က တနင်္ဂနွေနေ့တွင် ပြောကြားခဲ့သည်။

အီရန်နိုင်ငံတွင် အစိုးရဆန့်ကျင်ရေးဆန္ဒပြပွဲများဖြစ်ပွားခဲ့ပြီးနောက်တွင် အီးယူသည် တော်လှန်ရေးအစောင့်တပ်ကို အကြမ်းဖက်အဖွဲ့အစည်းအဖြစ် သတ်မှတ်လိုက်ခြင်းဖြင့် အီရန်ခေါင်းဆောင်ပိုင်းအပေါ် ချဉ်းကပ်ပုံကို သိသာစွာပြောင်းလဲခဲ့သည်။

တော်လှန်ရေးအစောင့်တပ်ကို တိုက်ခိုက်ခြင်းသည် ဥရောပသားများက ကိုယ့်ခြေထောက်ကို ကိုယ်ပ-စ်ခတ်ရာ ရောက်ပြီး အမေရိကန်များကို မျက်စိမှိတ်နာခံကာ ၎င်းတို့ပြည်သူများ၏ အကျိုးစီးပွားကိုထိခိုက်သော ဆုံးဖြတ်ချက်ကို ထပ်မံချမှတ်ခြင်းပင်ဖြစ်သည်ဟု ဂါလီဘတ်ဖ်က ဆက်လက်ပြောကြားခဲ့သည်။

နိုင်ငံတော်လုံခြုံရေးလွှတ်တော်ကော်မရှင်သည် ဥရောပသမဂ္ဂနိုင်ငံများ၏ စစ်သံများကို နှင်ထုတ်ခြင်းနှင့် ပတ်သက်၍ ဆွေးနွေးမည်ဖြစ်ပြီး နိုင်ငံခြားရေးဝန်ကြီးဌာနနှင့် ဆက်လက်ဆောင်ရွက်သွားမည်ဖြစ်ကြောင်းလည်း ဂါလီဘတ်ဖ်က ပြောကြားခဲ့သည်။

၁၉၇၉ ခုနှစ် အီရန်တော်လှန်ရေးအပြီးတွင် ရှီးယားဘာသာရေးခေါင်းဆောင်များ၏ အုပ်ချုပ်မှုစနစ်ကို ကာကွယ်ရန်ဖွဲ့စည်းခဲ့သော တော်လှန်ရေးအစောင့်တပ်သည် နိုင်ငံတွင် ကြီးမားသော သြဇာအာဏာရှိကာ စီးပွားရေးနှင့် လက်နက်ကိုင်တပ်ဖွဲ့များကို ထိန်းချုပ်ထားသည်။

Ref: တီအာတီဝေါလ်