အွန်လိုင်းငွေလိ-မ်ဂိုဏ်းများကိုအမြစ်ဖြတ်ရန် ဟွန်မာနက်အမိန့်ထုတ်

နိုင်ငံတစ်ဝန်းရှိ အွန်လိုင်းအလိမ်အညာလုပ်ငန်းများကို အမြစ်ပြတ်ရှင်းလင်းရန် ကမ္ဘောဒီးယားဝန်ကြီးချုပ် ဟွန်မာနက်က အာဏာပိုင်များကို အမိန့်ထုတ်လိုက်ပြီး နှိမ်နင်းရေးလုပ်ငန်းစဉ်များကို တားဆီးသည့် မည်သည့်အရာရှိမဆို အလုပ်ထုတ်ခံရမည်ဟု သတိပေးခဲ့သည်။

တနင်္လာနေ့(ဇူလိုင်လ ၁၄ရက်နေ့) တွင် လက်မှတ်ရေးထိုးခဲ့ကာ အင်္ဂါနေ့ညပိုင်းတွင် လူသိရှင်ကြားထုတ်ပြန်လိုက်သော အမိန့်၌ နိုင်ငံခြားသား ရာဇဝတ်ဂိုဏ်းအချို့သည် ကမ္ဘောဒီးယားနိုင်ငံတွင် အခြေစိုက်ကာ ၎င်းတို့၏ အွန်လိုင်းလိ-မ်ညာမှုများကို ဆောင်ရွက်လျက်ရှိကြောင်း ဟွန်မာနက်က ပြောသည်။

ရဲတပ်ဖွဲ့အပြင် မြို့ကြီးများနှင့် ပြည်နယ်များဆိုင်ရာ ခေါင်းဆောင်များသည် ၎င်းတို့၏ အပိုင်နယ်မြေနှင့် တရားစီရင်ရေးနယ်နိမိတ်အတွင်းရှိ အွန်လိုင်းငွေလိ-မ်ဂိုဏ်းများကို တရားဥပဒေနှင့်အညီ ရှင်းလင်းသုတ်သင်ရန် တာဝန်ယူရမည်ဟု ၎င်းက ပြောကြားခဲ့သည်။

လက်နက်ကိုင်အဖွဲ့များအနေဖြင့် နှိမ်နင်းရေး စီမံချက်များတွင် ပံ့ပိုးကူညီရန် အသင့်ပြင်ထားရေးကိုလည်း ဝန်ကြီးချုပ်က အမိန့်ထုတ်ခဲ့သည်။

ထို့အပြင် ကမ္ဘောဒီးယားနိုင်ငံအတွင်းကို နိုင်ငံခြားသားများ တရားမဝင် ဝင်ရောက်ခြင်းများကို ဟန့်တားရန်နှင့် တရားမဝင် ဝင်ရောက်သူ၊ နေထိုင်သူနှင့် နိုင်ငံအတွင်း တရားမဝင်လုပ်ငန်းများတွင် လုပ်ကိုင်နေသူများကို ပြည်နှင်ဒဏ်ပေးရန်လည်း အာဏာပိုင်များကို ၎င်းက ညွှန်ကြားခဲ့သည်။

“ဒီအမိန့်ကို ပြတ်ပြတ်သားသားနဲ့ တာဝန်သိသိ အကောင်အထည်ဖော်ရပါမယ်” ဟု ၎င်းက ပြောခဲ့ပြီး အမိန့်ကို လိုက်နာရန် ပျက်ကွက်ခြင်း သို့မဟုတ် မည်သည့်အကြောင်းကိစ္စအတွက်ဖြစ်စေ ပူးပေါင်းဆောင်ရွက်ရန် ပျက်ကွက်ပါက ရာထူးခန့်အပ်ခြင်း၊ ဖယ်ရှားခြင်း သို့မဟုတ် ရပ်စဲခြင်းဆိုင်ရာ အကဲဖြတ်မှုခံရမည်ဖြစ်ကြောင်း သူက ပြာကြားခဲ့သည်။

ယခုအစီအစဉ်သည် လုံခြုံရေး၊ ပြည်သူလူထု ငြိမ်ဝပ်ပိပြားရေးနှင့် လူမှုလုံခြုံရေးတို့ကို ထိန်းသိမ်း ကာကွယ်ရန် ရည်ရွယ်သည်ဟု ဟွန်မာနက်က ပြောကြားခဲ့သည်။

Ref: ရှင်းဟွာ