ပြည်ထောင်စုရွေးကောက်ပွဲကော်မရှင်မှ ယနေ့ အောက်တိုဘာ ၁၅ ရက်က ကြေညာချက်အမှတ် ၁၃၄ /၂၀၂၅ ဖြင့် အောက်တိုဘာ ၂၈ ရက်နံနက် ၆ နာရီမှစတင်၍ ဒီဇင်ဘာ ၂၆ ရက်ည ၁၂ နာရီအထိ ရက်ပေါင်း(၆၀)ကြာ မဲဆွယ်စည်းရုံးနိုင်သည်ဟု အသိပေးထုတ်ပြန်ခဲ့သည်။
ထို့ကြောင့် ရွေးကောက်ပွဲ၌ဝင်ရောက်ယှဉ်ပြိုင်မည့် လွှတ်တော်ကိုယ်စားလှယ်လောင်းများ၊ နိုင်ငံရေးပါတီများသည် လွတ်လပ်၍တရားမျှတပြီး အေးချမ်းတည်ငြိမ်သည့်ရွေးကောက်ပွဲများဖြစ်စေရေးအတွက် ရွေး ကောက်ပွဲဆိုင်ရာ စုဝေးဟောပြောခြင်းနှင့် မဲဆွယ်စည်းရုံးခြင်းတို့ကို သက်ဆိုင်ရာလွှတ်တော်ရွေးကောက်ပွဲနည်းဥပဒေပါပြဋ္ဌာန်းချက်များအတိုင်းဆောင်ရွက်ရမည်ဖြစ်သည်။
သက်ဆိုင်ရာကော်မရှင်အဖွဲ့ခွဲများက လွှတ်တော်ရွေးကောက်ပွဲဥပဒေ၊ နည်းဥပဒေများနှင့်အညီ စိစစ်အတည်ပြုကြေညာထားသည့် နိုင်ငံရေးပါတီကိုယ်စားပြု မဲအများဆုံးရသူအနိုင်ယူစနစ်ကိုယ်စားလှယ်လောင်းများ၊ အချိုးကျကိုယ်စားပြုစနစ်ကိုယ်စားလှယ်လောင်းများ(သို့)တစ်သီးပုဂ္ဂလကိုယ်စားလှယ်လောင်းများသည် ရွေးကောက်ပွဲအနိုင်ရရှိရေးအတွက် မဲဆွယ်စည်းရုံးမှုရာ၌ ဥပဒေနှင့်အညီ လွတ်လပ်၍တရားမျှတမှုရှိစေရန် သက်ဆိုင်ရာလွှတ်တော်ရွေးကောက်ပွဲဥပဒေ ပုဒ်မ ၃၀-က နှင့် လွှတ်တော်ရွေးကောက်ပွဲနည်းဥပဒေ အခန်း(၁၀)တို့တွင် ရွေးကောက်ပွဲဆိုင်ရာစုဝေးဟော ပြောခြင်းနှင့် မဲဆွယ်စည်းရုံးခြင်းဆိုင်ရာ ပြဋ္ဌာန်းချက်များကိုထုတ်ပြန်ခဲ့ပြီးဖြစ်သည်။