အီရန်အနေဖြင့် နျူကလီးယားအစီအစဉ်နှင့် ပတ်သက်၍အမေရိကန်နှင့် တိုက်ရိုက်ဆွေးနွေးရန် အဆင်သင့်မဖြစ်သေးကြောင်း အီရန်နိုင်ငံခြားရေးဝန်ကြီး Abbas Araghchi က Fox News နှင့် အင်တာဗျူးတွင် ပြောကြားခဲ့သည်။
အီရန်သည် အမေရိကန်အစိုးရနှင့် တိုက်ရိုက်ဆွေးနွေးရန် အဆင်သင့်ဖြစ်ပြီလားဟု မေးမြန်းရာတွင် “နှစ်ဦးနှစ်ဖက် အကျိုးရှိမယ့် နည်းလမ်းရှာဖွေဖို့ သူတို့လာမယ်ဆိုရင်တော့ ကျွန်တော်တို့ ဆွေးနွေးဖို့ အသင့်ပါပဲ။ ဒါပေမယ့် လောလောဆယ်တိုက်ရိုက်ဆွေးနွေးဖို့တော့ မဟုတ်သေးပါဘူး” ဟု သူက ဖြေကြားခဲ့သည်။
“သူတို့နဲ့ ထိတွေ့ဆက်ဆံဖို့ကတော့ ကျွန်တော် အသင့်ပါပဲ” ဟု ဝန်ကြီးက အလေးထားပြောကြားခဲ့သည်။
“အီရန်ရဲ့ နျူကလီးယားအစီအစဉ်ဟာ ငြိမ်းချမ်းတယ်၊ အမြဲတမ်း ငြိမ်းချမ်းနေမှာပါ၊ အီရန်ဟာ နျူကလီးယားလက်နက်တွေ ဘယ်တော့မှ ထုတ်လုပ်မှာ မဟုတ်ဘူးဆိုတာ သက်သေပြဖို့ လိုအပ်တဲ့ ယုံကြည်မှုတည်ဆောက်ရေးဆိုင်ရာ ဆောင်ရွက်ချက်မှန်သမျှကို လုပ်ဆောင်ဖို့ ကျွန်တော်တို့ အသင့်ပါပဲ။ အပြန်အလှန်အားဖြင့် သူတို့ရဲ့ ပိတ်ဆို့အရေးယူမှုတွေကို ရုပ်သိမ်းပေးဖို့ ကျွန်တော်တို့ မျှော်လင့်ပါတယ်” ဟုလည်းအနောက်နိုင်ငံများနှင့် ပတ်သက်၍ သူကပြောကြားခဲ့သည်။
“ဒါဟာ နှစ်ဦးနှစ်ဖက် အကျိုးရှိမယ့် ကိစ္စဖြစ်ပြီး၊ အဲဒီမှာ ထိတွေ့ဆက်ဆံဖို့ ကျွန်တော်တို့ အသင့်ပါပဲ။ ဒီဆွေးနွေးပွဲတွေကို တိုက်ရိုက်နည်းလမ်းနဲ့ မစတင်နိုင်သေးပါဘူး၊ ကျွန်တော်တို့က သွယ်ဝိုက်ဆွေးနွေးမှုတွေကို ပိုနှစ်သက်နေသေးတယ်” ဟု Araghchi က ပြောကြားခဲ့ပြီး၊ ဆွေးနွေးပွဲများတွင် “သဘောတူညီချက်ရယူဖို့ အခွင့်အာဏာရှိတယ်” ဟုပါ ထပ်လောင်းပြောကြားခဲ့သည်။