အိုင်စီစီမှ နုတ်ထွက်ရန် ဟန်ဂေရီလွှတ်တော် အတည်ပြု

တရားရုံးသည် နိုင်ငံရေးအသွင်ဆန်လာသည်ဟု ဝန်ကြီးချုပ် ဗစ်ခ်တာ အော်ဘန်အစိုးရက ပြောဆိုခဲ့သည့် နိုင်ငံတကာရာဇဝတ်တရားရုံး(အိုင်စီစီ) မှ နိုင်ငံ နုတ်ထွက်မည့် တစ်နှစ်ကြာ လုပ်ငန်းစဉ် စတင်ရမည့် ဥပဒေမူကြမ်းကို ဟန်ဂေရီပါလီမန်က အင်္ဂါနေ့တွင် အတည်ပြုလိုက်ကြောင်း သိရသည်။

အစ္စရေးဝန်ကြီးချုပ် နေတန်ယာဟုသည် အိုင်စီစီ ဖမ်းဝရမ်းကို အာခံကာ ရှားရှားပါးပါးနိုင်ငံခြားခရီးစဉ်အဖြစ် ဟန်ဂေရီနိုင်ငံသို့ နိုင်ငံတော်ခရီးစဉ်ကို သွားရောက်ခဲ့ပြီးနောက် သိပ်မကြာခင် ဧပြီလ ၃ ရက် နေ့တွင် အော်ဘန်၏ အစိုးရက နုတ်ထွက်မည့်အစီအစဉ်ကို ကြေညာခဲ့ခြင်းဖြစ်သည်။

အိုင်စီစီသည် ဘက်မလိုက်သော တရားရုံး၊ တရားဥပဒေစိုးမိုးသော တရားရုံးမဟုတ်တော့ဘဲ နိုင်ငံရေး အသွင်ဆန်သော တရားရုံးဖြစ်နေသည်ဟု ပြီးခဲ့သည့်လတွင် အော်ဘန်က ပြောကြားခဲ့သည်။

ဟန်ဂေရီသည် အစ္စရေးဝန်ကြီးချုပ်ကို ဖမ်းဆီးရန် စိတ်ကူးကို ပယ်ချခဲ့ပြီး ဖမ်းဝရမ်းထုတ်ခြင်းသည် အရှက်မဲ့သောလုပ်ရပ်ဖြစ်သည်ဟု မှတ်ချက်ပြုခဲ့သည်။

ဟန်ဂေရီသည် အိုင်စီစီကို စတင်တည်ထောင်စဥ်ကတည်းက အဖွဲ့သို့ဝင် ခဲ့သည့် အဖွဲ့ဝင်နိုင်ငံဖြစ်ပြီး အဖွဲ့၏ တည်ထောင်မှုစာတမ်းကို ၂၀၀၁ ခုနှစ်တွင် အတည်ပြုခဲ့သည်။ သို့သော်လည်း အဆိုပါဥပဒေကို အတည်ပြုပြဌာန်းခြင်း မရှိသေးပေ။

အိုင်စီစီမှ နုတ်ထွက်မည့် ဥပဒေမူကြမ်းကို လွှတ်တော်အမတ် ၁၃၄ ဦးက ထောက်ခံမဲပေးခဲ့ပြီး ၃၇ ဦးက ကန့်ကွက်မဲပေးခဲ့ကာ အတည်ပြုနိုင်ခဲ့သည်။

ဒုတိယဝန်ကြီးချုပ် Zsolt Semjen က တင်သွင်းသော ဥပဒေကြမ်းသည် နိုင်ငံတကာအဖွဲ့အစည်းများ အထူးသဖြင့် ရာဇဝတ်တရားရုံးများကို နိုင်ငံရေးသြဇာလွှမ်းမိုးမှုသော လက်နက်များအဖြစ် အသုံးချခြင်းကို ဟန်ဂေရီနိုင်ငံက ပြတ်ပြတ်သားသား ပယ်ချခြင်းဖြစ်ကြောင်း ပါလီမန်၏ ဝက်ဘ်ဆိုက်တွင် ဖော်ပြခဲ့သည်။

အိုင်စီစီမှ နုတ်ထွက်ရန် ဟန်ဂေရီ၏ ဆုံးဖြတ်ချက်သည် ရဲရင့်ပြီး စမူဝါဒနှင့်ကိုက်ညီ‌သော ဆုံးဖြတ်ချက်ဖြစ်သည်ဟု နေတန်ယာဟုက မှတ်ချက်ပြုခဲ့သည်။

Ref: သည်စထရိတ်တိုင်းမ်စ်