တိုကျို၊ဇန်နဝါရီ ၁၆
ဂျပန်နှင့်အိန္ဒိယတို့ကြား ပထမဆုံးသော ပူးတွဲတိုက်လေယာဉ်လေ့ကျင့်မှုကို တနင်္လာနေ့ကစတင်ခဲ့ကြောင်း ဂျပန်ကာကွယ်ရေးဝန်ကြီးဌာနက အတည်ပြုခဲ့သည်။
တိုကျိုအရှေ့မြောက်ဘက် အီဘရခိစီရင်စု၏အရှေ့မြောက်ပိုင်းရှိ လေတပ်ကိုယ်ပိုင်ကာကွယ်ရေးတပ်ဖွဲ့ (ASDF) က ဟရာခုရိ လေတပ်စခန်း၌ပြုလုပ်နေသည့် စစ်ရေးလေ့ကျင့်မှုသည် ဇန်နဝါရီ ၂၆ ရက်တွင် ပြီးဆုံးမည်ဖြစ်ကြောင်းသိရသည်။
စစ်ရေးလေ့ကျင့်မှု၏ ရည်ရွယ်ချက်မှာ အပြန်အလှန် နားလည်မှုမြှင့်တင်ရန်၊ လေတပ်များကြား ကာကွယ်ရေးပူးပေါင်းဆောင်ရွက်မှု အားကောင်းစေရန်နှင့် တပ်ဖွဲ့၏နည်းဗျူဟာ ကျွမ်းကျင်မှုမြှင့်တင်ရန်ဖြစ်ကြောင်း ASDF ၏ထုတ်ပြန်ချက်တွင်ဖော်ပြထားသည်ဟု Japan Times သတင်းဌာန၌ပါရှိသည်။
အင်ဒို – ပစိဖိတ်ဒေသတွင် တရုတ်၏စစ်အင်အား တိုးချဲ့လာနေမှုကြားမှ ကာကွယ်ရေးနှင့်လုံခြုံရေးဆိုင်ရာ ဆက်ဆံမှုများကို ခိုင်မာစေရန်အတွက် စစ်ရေးလေ့ကျင့်မှုကို လုပ်ဆောင်နေခြင်းဖြစ်သည်ဟုလည်းဆိုခဲ့သည်။
တိုကျိုသည် ကမ္ဘာတစ်ဝန်းရှိ ၎င်း၏လုံခြုံရေးမဟာမိတ်များကွန်ရက်ကို ချဲ့ထွင်လာပြီး အိန္ဒိယသည် ယခုအခါ အမေရိက၊သြစတြေးလျ၊ဗြိတိန်နှင့်ဂျာမနီတို့နှင့်အတူ ပူးတွဲစစ်ရေးလေ့ကျင့်ရန်အတွက် ဂျပန်သို့တိုက်လေယာဉ်များစေလွှတ်သည့် ပဉ္စမမြောက်နိုင်ငံဖြစ်လာခဲ့သည်။
အိန္ဒိယနှင့်ဂျပန်တို့၏ မြေပြင်နှင့်ရေကြောင်း ကိုယ်ပိုင်ကာကွယ်ရေးတပ်များ ပူးတွဲစစ်ရေးလေ့ကျင့်မှုများကိုမူ ပြုလုပ်နေပြီဖြစ်သည်။
Source : WION
