အာရှနိုင်ငံများမှ နိုင်ငံရေးခေါင်းဆောင်များနှင့် နိုင်ငံတော် အကြီးအကဲဟောင်းများသည် အမေရိကန်အစိုးရ၏ အခွန်အကောက်မူဝါဒများအပေါ် စိုးရိမ်ပူပန်နေကြပြီး စိန်ခေါ်မှုများကိုကျော်လွှားရန်အတွက် အာရှနိုင်ငံများအကြား ပိုမိုစည်းလုံးညီညွတ်မှုရှိရန်တောင်းဆိုခဲ့ကြသည်ဟုသိရသည်။
မေလ ၂၉ ရက် နေ့မှ ၃၀ ရက် နေ့အထိ တိုကျို၌ ကျင်းပသည့် အကြိမ် ၃၀ မြောက် အာရှအနာဂတ်ဖိုရမ်တွင် စင်္ကာပူဒုတိယဝန်ကြီးချုပ်က လက်ရှိကမ္ဘာ့ကုန်သွယ်ရေးစနစ်သည် ခြိမ်းခြောက်ခံနေရကြောင်းလည်းသတိပေးခဲ့သည်။
အမေရိက၏အခွန်စည်းကြပ်မှုများကြောင့် ဖြစ်ပေါ်လာသည့် ကုန်သွယ်မှုပြဿနာများကိုဖြေရှင်းရာ၌ အာရှနိုင်ငံများအနေဖြင့် စည်းစည်းလုံးလုံး ရပ်တည်ကြရန်တိုက်တွန်းခဲ့ပြီး အာဆီယံနိုင်ငံများနှင့် ကုန်သွယ်မှုနှင့်စက်မှုလုပ်ငန်းဆိုင်ရာ ဘက်စုံတိုးတက်ရေးသဘောတူစာချုပ်တို့မှတစ်ဆင့် ပူးပေါင်းဆောင်ရွက်မှုချဲ့ထွင်ရန်လည်း အရေးကြီးကြောင်း၎င်းကပြောကြားခဲ့သည်။
ကမ္ဘောဒီးယားဝန်ကြီးချုပ်က ကုန်သွယ်ရေးစစ်ပွဲများသည် လွတ်လပ်ပွင့်လင်းသည့်နိုင်ငံစုံကုန်သွယ်မှုစနစ်ကိုထိခိုက်စေသဖြင့် အကောက်ခွန်ဆိုင်ရာ ဖိအားများနှင့်ရင်ဆိုင်နေရသော နိုင်ငံအချင်းချင်း စည်းလုံးညီညွတ်မှုရှိရန်တောင်းဆိုခဲ့သည်။
လာအိုသမ္မတကမူ ငြိမ်းချမ်းစွာယှဉ်တွဲနေထိုင်ရေးနှင့် အပြန်အလှန်လေးစားမှု၏ အရေးပါမှုကို အလေးပေးပြောကြားခဲ့ပြီး လာအိုအနေဖြင့်လည်း အမေရိကနှင့်ကုန်သွယ်မှုကို ကန့်သတ်ထားသော်လည်း အခွန်မြင့်မားမှုက ၎င်း၏စီးပွားရေးနှင့်ရင်းနှီးမြှုပ်နှံမှုအပေါ် သက်ရောက်မှုရှိနေဆဲဖြစ်သည်ဟုဆိုခဲ့သည်။
ဗီယက်နမ်၏ပို့ကုန်နှင့် ရင်းနှီးမြှုပ်နှံမှုများအပေါ် အမေရိက၏စည်းကြပ်ခွန်သည် သိသိသာသာအကျိုးသက်ရောက်မှုရှိနေသည်ဟုလည်း ဗီယက်နမ်ဒုတိယဝန်ကြီးချုပ်ကပြောကြားခဲ့သည်။
မလေးရှားဝန်ကြီးချုပ်ဟောင်း မဟာသီယာမိုဟာမက်ကမူ အမေရိက၏အခွန်စည်းကြပ်မှုများကြောင့် အမေရိကန်၏စီးပွားရေးကိုပါထိခိုက်နိုင်ပြီး ပြည်တွင်း၌နေထိုင်မှုစရိတ်များ တက်လာနိုင်သည်ဟုဝေဖန်ခဲ့သည်။
နိကေးအင်ကော်ပိုရိတ်တက် ကနှစ်စဉ်ကျင်းပပြုလုပ်သည့် “အနာဂတ်အာရှ” ဖိုရမ်သည် ၁၉၉၅ ခုနှစ်၌ စတင်တည်ထောင်ခဲ့ပြီးကတည်းက ဒေသတွင်းပူးပေါင်းဆောင်ရွက်မှုကိုဆွေးနွေးရန်အတွက် အဓိကပလက်ဖောင်းတစ်ခုလည်းဖြစ်လာခဲ့သည်။
ယခုနှစ်ဖိုရမ်တွင်မူ ပူးပေါင်းဆောင်ရွက်ခြင်းအားဖြင့် ဒေသတွင်းသာယာဝပြောရေးနှင့် စီးပွားရေးတိုးတက်မှုကို မည်ကဲ့သို့မြှင့်တင်နိုင်မည်ကိုအဓိကထားဆွေးနွေးခဲ့ကြသည်ဟုသိရသည်။
Source : ရှင်းဟွာ