လူမှုဖူလုံရေးအဖွဲ့အား အာမခံအလုပ်သမားများ အားကိုး အားထားပြုရသည့် ဌာနတစ်ခုဖြစ်လာစေရန် အရည်အသွေးပြည့်ဝသည့် ကျန်းမာရေးဝန်ဆောင်မှုများ ပေးအပ်နိုင်ရန် လိုအပ်ကြောင်း အလုပ်သမားဝန်ကြီး ဒေါက်တာပွင့်ဆန်းက ပြောသည်။
အာမခံ အလုပ်သမားများအား ကျန်းမာရေးစောင့်ရှောက်မှုပေးနေခြင်းနှင့် ပတ်သက်၍ အလုပ်သမားဝန်ကြီးဌာန ပြည်ထောင်စုဝန်ကြီး ဒေါက်တာ ပွင့်ဆန်းနှင့် အလုပ်သမားဆေးရုံကြီး (မန္တလေး) ၏ ခေတ္တဆေးရုံအုပ်ကြီး၊ ဝန်ထမ်းများ ဧပြီ (၂၀) ရက်နံနက်ပိုင်းက တွေ့ဆုံစဥ်ပြောကြားခဲ့ခြင်း ဖြစ်သည်။
ယင်းသို့ တွေ့ဆုံစဉ် ပြည်ထောင်စုဝန်ကြီးက အလုပ်ရှင်နှင့် အာမခံအလုပ်သမားများ အားကိုးယုံကြည်ရသည့် လူမှုဖူလုံရေး စီမံကိန်းဖြစ်စေရန် အာမခံ အလုပ်သမားများ ၏ ကျန်းမာရေး စောင့်ရှောက်မှုကို တိုးမြှင့်ဆောင်ရွက်သွားမည်ဖြစ်ပြီး ယင်းသို့ဆောင်ရွက်ရာတွင် အရည်အသွေးပြည့်မီသည့် ကျန်းမာရေးဝန်ဆောင်မှုများကို ပေးအပ် နိုင်ရန်လိုအပ်သည်ဟု ပြောကြားခဲ့သည်။
ထို့အပြင် အလုပ်ရှင်နှင့် ၊ အလုပ်သမားများ၏ အဓိက လိုအပ်ချက်ဖြစ်သည့် ကောင်းမွန်သည့်ဆေးကုသမှုဝန်ဆောင်မှုပေးနိုင်ရန် ယခုထက် ပိုမိုထိရောက်အောင်ဆောင်ရွက်ပေးရမည်ဟုလည်း အလုပ်သမား ဝန်ကြီးက မှာ ကြားခဲ့သည်။
ပြည်ထောင်စုဝန်ကြီးသည် အောင်မြေသာစံမြို့နယ်ရှိ အလုပ်သမားညွှန်ကြားရေးဦးစီးဌာန (တိုင်းဒေသကြီးရုံး)၌ ပြည်ပနိုင်ငံများသို့ အလုပ်သမားစေလွှတ်ရေးအတွက် အလုပ်ခန့်ထားမှုဆိုင်ရာ သဘောတူစာချုပ်ချုပ်ဆိုနေမှုများကို ကြည့်ရှုစစ်ဆေးခဲ့ကြောင်း သိရသည်။
ထို့နောက် ပြည်ထောင်စု ဝန်ကြီးသည်လာမည့် မေလ (၁) ရက်တွင် ကျရောက်မည့် အလုပ်သမားနေ့ကို ဂုဏ်ပြုသောအားဖြင့် ချမ်းအေးသာစံမြို့နယ်ရှိ မြို့တော်ခန်းမတွင် ပြုလုပ်သည့် လုပ်ငန်းခွင်ဘေး အန္တရာယ်ကင်းရှင်းရေးနှင့် ကျန်းမာရေးဆိုင်ရာ သုံးပွင့်ဆိုင်ဆွေးနွေးပွဲသို့လည်း တက်ရောက်၍ အမှာစကားပြောကြားခဲ့ကြောင်း သိရသည်။