မန္တလေးငလျင်ကြီးဒဏ်သင့် အာမခံအလုပ်သမားများအား သဘာဝဘေးအန္တရာယ်ကျရောက်မှုဆိုင် ရာ မိသားစုထောက်ပံ့မှုအကျိုးခံစားခွင့် ငွေကျပ် (၂၁ ဒသမ ၇၀၃ ဘီလီယံ)ထောက်ပံ့ပေးရန် စီစဉ်လျက်ရှိသည်ဟု ယနေ့ မေ ၁ ရက်တွင်ကျရောက်သည့် အပြည်ပြည်ဆိုင်ရာအလုပ်သမားနေ့အခမ်းအနားသို့ နစက ဥက္ကဋ္ဌ၊ နိုင်ငံတော်ဝန်ကြီးချုပ်၊ ဗိုလ်ချုပ်မှူးကြီးမင်းအောင်လှိုင်မှ သဝဏ်လွှာပေးပို့၍ ပြောကြားခဲ့ခြင်းဖြစ်သည်။
မန္တလေးငလျင်ကြီးဒဏ်သင့် အာမခံအလုပ်သမားများအား ငွေကျပ်ငွေ(၂၁ ဒသမ ၇၀၃ ဘီလီယံ) ထောက်ပံ့ပေးရန်စီစဉ်လျက်ရှိပြီး ကိုဗစ်-၁၉ ရောဂါကာလအတွင်းကလည်း အာမခံအလုပ်သမားများအား လူမှုဖူလုံရေးအကျိုးခံစားခွင့်အဖြစ် ငွေကျပ် (၇၁ ဒသမ ၈၅၆ ဘီလီယံ)၊ ရာဂီမုန်တိုင်းအရှိန်ကြောင့်ရေဘေးသင့်ခဲ့ရသည့် အာမခံအလုပ်သမား (၃,၃၉၄)ဦးအား ငွေကျပ်(၂၆၆ ဒသမ ၂၉၇ သန်း) ထောက်ပံ့ပေးနိုင်ခဲ့သည်ဟု ပြောသည်။
ထို့အတူ နိုင်ငံတော်၏ အဓိကကုန်ထုတ်စွမ်းအားစုဖြစ်သော အလုပ်သမားများ၏ လူမှုဘဝလုံခြုံရေးနှင့် ကျန်းမာရေးအတွက် လူမှုဖူလုံရေးစီမံကိန်းကို အကောင်အထည်ဖော်ဆောင်ရွက်လျက်ရှိရာ စီမံကိန်းအရ အကျုံးဝင်မြို့နယ်ပေါင်း(၁၂၆)မြို့နယ်မှ အာမခံအလုပ်သမားအား ဆေးကုသမှုခံယူခွင့်နှင့် ငွေကြေးအကျိုးခံစားခွင့်များခွင့်ပြုထုတ်ပေးလျက်ရှိသည်ဟု ပြောသည်။
ထို့ပြင် မြန်မာနိုင်ငံသည် အပြည်ပြည်ဆိုင်ရာ အလုပ်သမားရေးရာအဖွဲ့(ILO)တွင် အဖွဲ့ဝင်နိုင်ငံဖြစ်၍ အဆိုးရွားဆုံးပုံစံဖြင့် ကလေးအလုပ်သမားခိုင်းစေခြင်းဆိုင်ရာ ILO ပြဋ္ဌာန်းချက်(၁၈၂)အရ ကလေးသူငယ်များအား အဆိုးရွားဆုံးပုံစံဖြင့်ခိုင်းစေခြင်းမရှိစေရန် တည်ဆဲဥပဒေများနှင့်အညီ ကာကွယ်တားဆီးခြင်း၊ ပညာပေးဟောပြောခြင်းတို့ကို မြန်မာနိုင်ငံကလေးအလုပ်သမားပပျောက်ရေးဆိုင် ရာ အမျိုးသားအဆင့်လုပ်ငန်းစီမံချက်ဖြင့် ထိန်းသိမ်းကြပ်မတ်ဆောင်ရွက်လျက်ရှိသည်ဟု ပြောသည်။
ထို့အတူ အလုပ်ရှင်နှင့်အလုပ်သမားများကြား ဆက်ဆံရေးကောင်းမွန်ပြီး လုပ်ငန်းခွင်အေးချမ်းသာယာစေရေးနှင့် အငြင်းပွားမှုများအား တရားမျှတစွာဖြေရှင်းဆောင်ရွက်ပေးခြင်းဖြင့် ရပိုင်ခွင့်များကို မျှတမှန်ကန်စွာနှင့် မြန်ဆန်စွာရရှိခံစားနိုင်စေရေးမှာ အလွန်အရေးကြီး၍ စက်ရုံ၊ အလုပ်ရုံနှင့် လုပ်ငန်းခွင်များတွင် အလုပ်သမားရေးရာလုပ်ငန်းညှိနှိုင်းရေးကော်မတီ(၂,၉၈၂)ဖွဲ့၊ မြို့နယ်ညှိနှိုင်းဖျန် ဖြေရေးအဖွဲ့(၃၂၅)ဖွဲ့၊ ခုံသမာဓိအဖွဲ့(၁၅)ဖွဲ့၊ ခုံသမာဓိကောင်စီ(၁)ဖွဲ့တို့ဖြင့် ညှိနှိုင်းဖြေရှင်းဆောင်ရွက်ပေးလျက်ရှိသည်ဟု နစက ဥက္ကဋ္ဌကပြောကြားခဲ့သည်။